Read lubukusu Yosh. 8 Bible Online

Yosh. 8 - lubukusu bible

Yosh. 8

¹Wele Omunyali Owa Bioosi aboolela Yoshua ali, “Bukula banamae boosi mala muche Ai. Mukharia namwe mwafwa kimiooyo tawe. Nja khumua enywe bukhili khuula omwami owa Ai ne babaandu bewe. Lukoba, ne sibala siabwe sicha khuba sisienywe.

²Kholela Ai ne omwami walwo niko mwakhola khu Yeriko ne omwami walwo. Ne kakhali siise sino munyala mwabukula kimiaandu kie lukoba ne chikhaafu bibe bibienywe. Yirekekha khukhwibwaakala lukoba matundubiikha khukhwamila enyuma.”

³Nono Yoshua erekekha khucha e Ai ne banamae bewe boosi. Arobora banamae bewe balayi chielefu kamakhumi kataru mala abaruma siilo.

⁴Abalaka ali, “Kane mwikise enyuma we lukoba, ne mukhaba sinao khukhwama mu lukoba tawe, mwirekekhe khukhwibwaakala.

⁵Ese ne babaandu boosi nibo ndi nabo khulacha e lukoba. Babaandu ba Ai ne becha khu khuupania efwe, khulabafutarira mala khwilukhe nga ne khwakhola ekhunyoa.

⁶Bacha khukhuloondakho khukhwola nga ne khubayila sinao khukhwama mu lukoba. Bacha khwibaasia bali khulikho khubelukha, nga ne khwakhola mu khunyoa.

⁷Abwenao, enywe mularura niio mwikisile mala mubukule lukoba. Wele Omunyali Owa Bioosi, Wele wenywe acha khumua enywe lukoba olwo.

⁸Ne mumalile khuaamba lukoba chana, mulwoosie, nga Wele Omunyali Owa Bioosi ne aalaka. Kano niko ese mulakiliisie.”

⁹Nono Yoshua abaruma, mala bacha abuundu wabwe e khukhwikisa, baliindila ebweeneyo, akari we lukoba lwa Ai ne Beteli, lubeka lwe mumbo mwa Ai. Yoshua akona siilo esio mu kambi.

¹⁰Kumutikhinyi makhelebeende Yoshua enyokha mala alaanga banamae alala. Nio niye ne babemeelesi ba Isiraeli barangirira Baisiraeli khukhwola Ai.

¹¹Banamae ne naye bacha elubeka lwe silibwa sie khukhwingila mu lukoba. Baapa ekambi lubeka lwe ebunaswa owa Ai. Litooma liaba akari wabwe ne Ai.

¹²Yoshua abukula babaandu embi chielefu chiraano mala abakisa mumbo mwe lukoba, akari wa Ai ne Beteli.

¹³Nono beemia banamae, ebololi emboofu yaba ebunaswa we lukoba ne ebololi eye enyuma lubeka lwe mumbo. Yoshua akona mwitooma siilo esio.

¹⁴Omwami owa Ai abona babaandu ba Yoshua. Akhola khangu, niye ne babaandu bewe. Nio boosi barura bacha lubeka lwe mwitooma lia Yoritani khu khuupana ne Baisiraeli. Se aamanya ali acha khwibwaakalwa khukhwamila enyuma we lukoba tawe.

¹⁵Yoshua ne babaandu bewe baomela oli balikho babunisibwa, mala belukha bacha lubeka lwe sichiimi.

¹⁶Babaandu boosi be mu lukoba lwa Ai baba balangiilwe alala khuloonda khu Baisiraeli. Nga bachiililila khubatimakho, bachiililila khuba sinao ne lukoba.

¹⁷Buli mundu mu Ai ne Beteli[3] atimaka khu Baisiraeli, mala lukoba lwalekhwa busa khwasie, khaba omundu mulala yeng'ene owaramamo tawe.

¹⁸Nio Wele Omunyali Owa Bioosi aboolela Yoshua ali, “Yekesielela Ai lifumo liowo. Ndikho nda lukoba olwo mumakhono kowo.” Nio Yoshua okesielela lifumo liliaba mukhono mwewe e lukoba olwo.

¹⁹Ne nga ne asuta kumukhono kwewe, babaandu ba baaba ne bekisile benyokha khangu, batima bengila mu lukoba, baluaamba, mala ao ne nao baluaambia.

²⁰Nio babaandu ba Ai nga balola enyuma, babona liliisi lituukha ne liniina mungaaki. Se ba baakho ne bunyali bwe khukhwilukha bache eyi namwe eyi tawe, sikila Baisiraeli ba baaba ne batima ne belukhila lubeka lwe mu sichiimi, ba bakaluukhanakho khubebwaakala.

²¹Nga Yoshua ne babaandu bewe ne babona bali babasiaabwe Baisiraeli babukuule lukoba, lundi baluambiisie, bakobola enyuma mala barakikha khukhwira babaandu ba Ai.

²²Baisiraeli ba baaba mu lukoba beekha baambana ne nabo mwiie. Nono babaandu ba Ai banyoolekhana ne bakariirwe ne Baisiraeli, mala boosi berwa. Mbao owelukha namwe owaona tawe,

²³nakhali omwami owe Ai. Bamuaamba bamuyila khu Yoshua.

²⁴Baisiraeli beerera buli mundu mu sibala sie sichiimi nisio babaandu ba Ai babatimanisiliamo. Nio bakobola e Ai mala beera buli mundu ebweeneyo.

²⁵Babaandu boosi ba Ai baberwa endaalo eyo be siseecha nende be siikhasi baba chielefu likhumi na babili; babaandu boosi ba Ai.

²⁶Yoshua achiililila ne khukhwekesielela lifumo liewe e Ai mala se alira asi tawe khukhwola nga buli mulala ebweeneyo ne erwa.

²⁷Baisiraeli babukula chikhaafu ne kimiaandu kie lukoba olwo, nga Wele Omunyali Owa Bioosi ne aboolela Yoshua.

²⁸Nono Yoshua osia Ai mala alulekha mwimuusi. Lukoba lwa Ai lusiili lurio khukhwola luno.

²⁹Asuunga Omwami owa Ai khu murongooro mala alekhakho kumubili kwewe khukhwola ekolooba. Ekolooba Yoshua alaka Baisiraeli basuungula kumubili okwo, mala bakumwaata asi mu silibwa nisio bengilila mu lukoba. Bafuuma khu mubili okwo situumi siboofu sie kamabaale. Situumi esio sisiilio khukhwola luno.

³⁰ Nio Yoshua ombakhila Wele Omunyali Owa Bioosi, Wele owa Isiraeli, alutare khu sikulu sia Ebali.

³¹ Akhola khuloondekhana ne kamalaka niko Musa, omukholi owa Wele Omunyali Owa Bioosi, aelesia Baisiraeli. Lilaka lia Musa liaandikwa lili: “Alutare elikholwa khukhwama khu mabaale niko bakhabeechakho ne embasa eye sichuuma tawe.” Baanila khu alutare ng'eneyo biianwa bie khukhwosia khu Wele Omunyali Owa Bioosi, lundi barusirakho biianwa biabwe bie kumuleembe.

³²Abwenao, mumoni che Baisiraeli, Yoshua aandika khu mabaale kamalaka niko Musa aandika.

³³ Baisiraeli boosi: bakasa, ne babemeelesi babwe, banamae, bakhalaki, basaalwa, alala ne baakwa ba babamenyamo, bema chimbeka chombi che Lisanduku lie ndakaano eya Wele Omunyali Owa Bioosi. Boosi baloleelela basaayi ba baaba Balawi, babaasuta lisaanduku lie ndakaano eya Wele Omunyali Owa Bioosi. Enusu eye babaandu bema ne bapile kimikoongo kiabwe ebweeni we sikulu sia Kerisimu ne babaandi bema ne bapile kimikoongo kiabwe ebweeni we sikulu sia Ebali. Musa, omukholi owa Wele Omunyali Owa Bioosi aba ababoolela khukhola bario siise ne siola khu nibo khubiitwa chikhabi.

³⁴Enyuma wa kano, Yoshua asoma kamalaka koosi, alala ne chikhabi ne bilaamo, nga ne biaandikwa mu sitabu sie lilaka.

³⁵Yoshua asoma kamalaka koosi niko Musa aamulaka. Libuusiana lie Baisiraeli boosi: be siseecha, nende be siikhasi, babaana ne bakwa boosi baulila kamakhuwa ka Yoshua.