Read lubukusu Yosh. 9 Bible Online

Yosh. 9 - lubukusu bible

Yosh. 9

¹Bukhili bwa Isiraeli bwauliilikhana khu baami boosi ba baaba lubeka lwe mumbo mwa Yoritani, mumaayo mwe bikulu, ne elubeka lwoosi lwe nyanja eya Mediterenia khukhwola elubeka lwe ebunaswa owa Lebanoni. Babaami be lubeka lwe mumbo mwa Yoritani bano baba be Bahiti, be Baamori, be Bakanaani, be Baperisi, be Bahibi nende be Bayebusi.

²Bebuusiana alala mala baambania banamae babwe khu khuupana ne Yoshua ne Baisiraeli.

³Ne nga babaandu be e Kibeoni, baulila niko Yoshua akhola e Yeriko ne Ai,

⁴bakhalaka khubea Baisiraeli. Babukula biakhulia biabwe mala bala khu punda chabwe kamakunia kamatabukhake ne chioochwa che ndali chikhale nicho banabilisia.

⁵Bafwara chingubo che bitasitasi lundi biraaro bibiawelelela. Siakhulia nisio basuta nasio siaba sisioomu lundi sisiapa lukukhu.

⁶Nio bacha mu kambi eye Kilikali mala baboolela Yoshua ne babaandu Baisiraeli bali, “Khwama mu sibala sie aleeyi. Khwenya khukhole endakaano ne nanywe.”

⁷ Ne kakhali Baisiraeli bareeba bali, “Siina sikila efwe khukhole endakaano ne nanywe? Wakana mumenyile aembi?”

⁸Baboolela Yoshua bali, “Efwe khuli bakholi bowo” Yoshua abareeba ali, “Enywe muli naanu? Ne mwama waena?”

⁹Nio bamuboolela bali: “Khwama mu sibala sie aleeyi lukali. Khwechile khulwe lisina lia Wele Omunyali Owa Bioosi, Wele wowo. Khwaulile koosi niko aakhola mu Misiri.

¹⁰ Lundi khwaulile niko aakhola khu baami babili be Baamori lubeka lwe ebukwe owa Yoritani: Omwami Sihoni owa Heshiboni ne omwami Oku owa Bashani, babaamenya mu Asitaroti.

¹¹Ne babemeelesi befwe ne babaandu boosi baamenyile mu sibala siefwe bakhuboolela efwe bali khubukule biakhulia mala khwiche khumwakaanane enywe. Bakhuboolela bali khube bakholi bowo. Nono khu khusaba okhole endakaano ne nafwe.

¹²Lola siakhulia siefwe. Nga ne khwarura engo khukhwakaanana, siaba sisibilile. Ne luno sili sisioomu lundi siapile lukukhu.

¹³Nga ne khwechusia endali mu oochwa chino, chaba chimbia ne lola chatabuukhe! Chingubo chefwe chatabuukhe ne biraaro biefwe biaweleleele sikila lukeendo luleeyi.”

¹⁴Nono Baisiraeli babukula biakhulia biabwe, ne se bareeba Wele Omunyali Owa Bioosi nisio benyekhaane bakhole tawe.

¹⁵Yoshua akhola endakaano eye kumuleembe ne babaandu ba Kibeoni ne khubafukiilila bamenye. Babemeelesi be Baisiraeli balaka bali bacha khukhola nga endakaano ne yenyekhana.

¹⁶Enyuma we chindaalo chitaru endakaano ne malile khukholwa, Baisiraeli baulila bali babaandu bano bali be aembi.

¹⁷Baisiraeli barakikha lukeendo mala enyuma we chindaalo chitaru bola mu ngoba nimwo babaandu bano bamenya. Chingoba chino chaba: Kibeoni, Kefira, Beeroti, ne Kiriati-Yearimu.

¹⁸Baisiraeli se babeera tawe, sikila babemeelesi babwe baba babechubile mwisina lia Wele Omunyali Owa Bioosi, Wele owa Isiraeli. Nio Baisiraeli boosi belung'unya khu bemeelesi babwe.

¹⁹Ne kakhali babemeelesi baboolela Baisiraeli boosi bali, “Khwechubila ba Kibeoni mu lisina lia Wele Omunyali Owa Bioosi, Wele owa Isiraeli. Luno se khunyala khwabakholela bubi tawe.

²⁰Khukhoya khubalekhe bamenye sikila khwabechubila. Khwaaba ne khukhakhola khurio tawe, Wele acha khukhua kumunaanio.

²¹Balekhe bamenye, ne kakhali bacha khukhwasakila chiikhu ne khukhuchiila kameechi.” Lino nilio babemeelesi babisia mala kaba kario.

²²Yoshua alaka babaandu be e Kibeoni baleerwe ebweeni wewe, mala abareeba ali, “Siina sikila ne mwakhubea ne mukhuboolela muli mwama aleeyi, ne khane mwamenya busa aembi?

²³Sikila mwakholile murio, Wele abalaamile, ne muliba nasioobi befwe. Muliasaka chiikhu ne khusuta kameechi khulwe enju eya Wele wase.”

²⁴Bakobosia Yoshua bali, “Khwakhola khurio, sikila khwaba ne buuri khuli mulakhwira. Khwaulila khuli Wele Omunyali Owa Bioosi, Wele wenywe alaka omukholi wewe Musa khumuelesia enywe sibala siosi ne khukhwira babaandu babasimenyamo. Khwaria sikila bulamu bwefwe mala khwakhola likhuwa lino.

²⁵Ne nono luno khuli mu bunyali bwenywe, mukhukholele nilio mwibaasia muli lili lilayi khwinywe lundi lia ng'ali.”

²⁶Nono lino nilio Yoshua akhola: abaliinda ne se aalekha Baisiraeli babeera tawe.

²⁷Ne kakhali abakhola khuba babasaaka chiikhu ne khucha kameechi khulwe Baisiraeli ne khulwe alutare eya Wele Omunyali Owa Bioosi. Khukhwola endaalo eya luno basichiililila khukhola kumulimo kuno abuundu niio Wele Omunyali Owa Bioosi aarobora khumwisaayilao.