Read lubukusu 2 Bates. 1 Bible Online

2 Bates. 1 - lubukusu bible

2 Bates. 1

¹ Khukhwama khu Paulo, Sila ne Timoteo — khu kanisa eye Batesalonike, mu Wele Paapa wefwe no Mwami Yesu Kristo:

²Kumwalaalo kube khwinywe ne kumuleembe khukhwama khu Wele Paapa wefwe no Mwami Yesu Kristo.

³Bawandaayefwe, khukhwola khupile Wele orio buli siise sikila enywe. Buli bulayi khwifwe khukhola khurio, sikila lisuubila lienywe lilikho litasikha lukali ne busiime nibwo buli mulala khwinywe ali nabwo khu basie bulikho butasikha.

⁴Ako niko kakila efwe ne khwebonia sikila enywe mu chikanisa cha Wele. Khwebonia nga ne muchiililila khukhwekhaliilikha ne khusuubila khubirira mu binyaasio bioosi alala ne khuchuunisibwa nikhwo mulikho munyoola.

⁵Kano koosi kekesia kali likhalaka lia Wele lili lia ng'ali, ne khulwako mulaba babolaana khuba mu Bwami bwewe, sikila nibwo bukila ne mulikho mupwa siibi.

⁶Wele alakhola kaali kang'ali, alareera sinyaasio khwaabo bamunyaasianga enywe,

⁷ne alamuuluusia enywe mu mupa siibi ne nafwe fweesi. Akhakhole kano nga Omwami Yesu akhabonekhe khukhwama mwikulu ne malaika bewe be kamaani,

⁸ne kumulilo kwe lumemu, khuukuuma abo ba baloba Wele, ne khuloba khuria Elomo Endayi eyo Mwami wefwe Yesu.

⁹ Bakhanyoole siiukuumo sie libunia lia mindali, bakhaukhasibwe khukhwama ebweeni wo Mwami ne khukhwama khu luyali lwewe lwe kamaani,

¹⁰nga ne akheeche khu Ndaalo eye khunyoola luyali khukhwama khu baandu bewe boosi, ne lukoosi khukhwama khu boosi ba basuubila. Ne enywe mweesi mukhabe balala khu nibo, sikila mwasuubila elomo niyo khwamuboolela.

¹¹Ako niko kakila buli lwoosi ne khumusabilanga enywe. Khusabanga Wele wefwe amukhole enywe mwole khumenya limenya nilio amulangila mumenye. Akhoyeele mu bunyali bwewe amuelesie liliekoomba lienywe lioosi khulwe bulayi, mala atabusie kimilimo kienywe kie lisuubila.

¹²Mu ngila yino lisina lio Mwami wefwe Yesu lilanyoola luyali khukhwama khwinywe, ne enywe munyoole khukhwama khu niye, khulwe kumwalaalo kwa Wele wefwe nende kwo Mwami Yesu Kristo.