Read lubukusu 2 Bates. 3 Bible Online

2 Bates. 3 - lubukusu bible

2 Bates. 3

¹Ekhumaliilikha, bawandaayefwe, khusabile nio burume bwo Omwami buchiililile khusalanila khangu ne khukhwakanilwa ne lukoosi, bulayi bwene nga ne bwafukiililwa mwinywe.

²Saba lundi muli Wele akhuonie efwe khukhwama khu baandu baabi lundi bamayaanu; sikila se kali bali buli mundu asuubila burume buno tawe.

³Ne kakhali Omwami ali omusuubilwa, ne alamutasa kamaani ne khumuliinda bulayi khukhwama khu Mumayaanu oyo.

⁴Ne khuli ne lisuubila mu Mwami khwinywe khuli mulikho mukhola, lundi mulachiililila khukhola niko khumuboolela.

⁵Omwami akhoyeele amuelesie limanya mu miooyo kienywe mu busiime bwa Wele ne liliekhaliilikha nilio Kristo aananga.

⁶Bawandaayefwe, khumulakiilisia enywe mu lisina lio Mwami wefwe Yesu Kristo khuli, yeyaula khu bawandaayefwe abo boosi bamenyile limenya lie bukara lundi bakhaloonda kamekisio niko khwamuelesia tawe.

⁷Enywe mwabene mumanyile bulayi bwene muli, mukhoyele khukhola niko efwe khwakhola nga ne khwaba nanywe. Se khwaba bakara tawe.

⁸Se khwafukiilila buyeeti bwo mundu yesi yesi ne khukhamuruungire tawe. Ne kakhali, khwakhola kimilimo lukali po; siilo ne kumuusi nio khukhaba butinyu khu mundu yesi yesi khwinywe tawe.

⁹Mu khukhola kano, se kali bali khwataamba bung'ali bwe khureeba buyeeti bwefwe tawe; ne kakhali khwekhola khuba nibo mubonelakho nio mukhole murio.

¹⁰Nga ne khwaba nanywe, khwamuboolelanga enywe khuli, “Yesi yesi oloba khukhola kimilimo akhalia tawe.”

¹¹Khuloma kano sikila khulaulilanga bali balimo balala mwinywe, balekhalanga busa ne khumenya limenya lie bukara mala se bakholakho siosi tawe, nekhali khukhwekhupa mu makhuwa ke babaandu babaandi.

¹²Mu lisina lio Mwami Yesu Kristo khulakiilisia babaandu bano ne khubakaambila bamenye limenya lilayi, mala bakhole kimilimo banyoole sie khukhweyeeta mu limenya liabwe.

¹³Ne enywe, wandaayefwe, khukhwola mukhalua khukhola kamalayi tawe.

¹⁴Yesi yesi oloba khuria niko khulikho khuandika mu barwa yino, omwenoyo mumanye, mala mukhaambaanakho naye mu ngila yosi yosi tawe, nio aambwe chisoni.

¹⁵Ne mukhamubukula nga omusiku tawe, ne kakhali, mukaambile nga wandaayefwe.

¹⁶Nono Omwami owe kumuleembe omwene, akhoya amuelesie kumuleembe mu biise bioosi lundi mu ngila choosi. Omwami abe nanywe mweesi.

¹⁷Ese Paulo mbandika kimileembe kino ne kumukhono kwase kumwene. Eyino niyo engila niyo mbikhilangamo esayini yase. Mbandikanga ndi mu buli ebarwa yase.

¹⁸Kumwalaalo kwo Omwami wefwe Yesu Kristo kukhoya kwaaba nanywe mweesi.