Read lubukusu 1 Tim. 1 Bible Online

1 Tim. 1 - lubukusu bible

1 Tim. 1

¹Khukhwama khu Paulo, omurumwa owa Yesu Kristo khulwe lilaka lia Wele Omuonia wefwe ne Yesu Kristo ooli lilieyikina liefwe.

² Khu Timoteo, omwana wase omwene mu lisuubila. Wele Paapa ne Yesu Kristo Omwami wefwe bakhoya bakhuelesie ewe kumwalaalo, siisa ne kumuleembe.

³Nenya ewe orame mu Efeso, nga ne nakhutanyilila ne ndi khu lukeendo lwase khucha e Masedonia. Babaandu balala ebweeneyo balikho bekisia kamekisio ke bubeeyi ne khukhwola obakaanie balekhe.

⁴Baboolele balekhe chingano echo ne kamasina kamakali ke bakuuka, kareeranga khuyingana khwong'ene se kayeetangakho siosi siosi khu lirekekha lia Wele limanyikhananga khubirira mu lisuubila tawe.

⁵Sifuno sie lilaka lino sili khusanyulusia busiime bubwamanga mu mwoyo kumukwalaafu, liba lilayi ne lisuubila lia ng'ali.

⁶Babaandu balala bauukhe khukhwama khu kano mala batibile mu mbakha che siisilu.

⁷Benya khuba babekisia be lilaka lia Wele, ne se bamanyile niko babeene baloma tawe, namwe bibiindu nibio balomalomakho ne sinani sikali tawe.

⁸Khumanyile khuli Lilaka lili lilayi liaba bali lirumikhirwa nga ne likhoyeele.

⁹Khukhwola khukhebulile, kakhaba kario khuli, kamalaka se karebwao sikila babaandu balayi tawe, ne kakhali karebwao sikila abo bafunaka kamalaka, babi, bakhasuubila mu Wele tawe, ne babooni. Lundi karebwao sikila abo bakhali mu dini, namwe mu roho tawe. Karebwao sikila abo babeera baraarawabwe namwe bamaawabwe, ne babeeri.

¹⁰Sikila abo bakhola kamabi, nende be luuswa, baamba babaandu, babea nende barusia buloli bwe bubeeyi khu baandi namwe bakhola siosi siosi sikhacha alala ne kamekisio kamaluungi tawe.

¹¹Liliekisia elio linyoolekhana mu lomo eya Wele eyaanwa khwise ngiboole, Elomo Endayi khukhwama khu Wele owe luyali lundi owe fuma.

¹²Khupila orio Yesu Kristo Omwami wefwe, owambelesie ese kamaani khu milimo kiase. Ese mupila niye orio khulwe khu khumbukula ese khuuba owenyekhana ne khu khundobora ese khumukholela,

¹³ akhaba khaale ne naloma kamabi khu niye ne khumupia siibi ne khumukhoma. Ne Wele akholela ese siisa sikila abeele ese khaba ne lisuubila tawe, khwako se namanya niko nakholanga tawe.

¹⁴Ne Omwami wefwe aanjalaala lukali mala aambelesia lisuubila ne busiime, bili bibiefwe mu bulala ne Yesu Kristo.

¹⁵Yino eli elomo eya ng'ali ekhoyeele khufukiililwa elala ne khusuubilwa: Kristo echa mu sibala khuonia babooni. Ese ndi omubi khukhila nibo boosi,

¹⁶ne kakhali Wele aakholela ese siisa nio Kristo efwiilisie lukali mu khunjeeta ese owe bubwoni bukali mu boosi, nio mbe sisiekesio khwaabo bakhakeleo bamusuubile niye mala banyoole bulamu bwa mindali.

¹⁷Khu Mwami owa mindali, okhanyala afwa tawe, lundi okhabonekha tawe. Wele mulala yeng'ene abe ne lukoosi buli lwoosi! Amina.

¹⁸Timoteo, mwana wase ese ndikho khuelesia ewe lilaka lino, liloondekhana ne kamakhuwa ke bung'oosi kakalomwa khaale khwiwe. Rumikhira kamakhuwa ako nga bulwaani nio upane bulayi,

¹⁹lundi oliinde lisuubila liowo ne liiba liowo lie mukari libe lilayi. Babaandu balala se baloonda liiba liabwe lie mukari tawe, mala bonake lisuubila liabwe.

²⁰Balala khwaabo bali Himenea ne Alekisanda, nibo ese mbukuumile khubirira mu khubara nibo mu bunyali bwa Sietani; kano kakhabekisie khulekha embelekeu yabwe khu Wele.