Read lubukusu 1 Tim. 2 Bible Online

1 Tim. 2 - lubukusu bible

1 Tim. 2

¹Mu khurakikha, ese mwikoonjelela enywe ndi, kamasaba ne khu khuupa orio khu Wele bikholwe khulwe babaandu boosi,

²khulwe babaami ne babaandi boosi bali ne bunyali, nio khumenye limenya lie kumuleembe mu khuria Wele lukali ne liiba lilayi.

³Kano kali kamalayi lundi kasiimisia Wele Omuonia wefwe,

⁴owenya buli mundu aonisibwe mala amanye bung'ali.

⁵Sikila Wele ali mulala, ne oreeranga Wele ne babaandu alala ali omundu mulala, Yesu Kristo,

⁶oweana khuonia babaandu boosi. Buno buli buloli mu siise silayi, buloma buli Wele enya omundu aonisibwe,

⁷ ne elio nilio liliakila ese narumwa nga omurumwa lundi nga omwekisia khu Be Chikholo, khuboola elomo eye lisuubila ne bung'ali. Se ndikho mbea tawe, ndikho ndoma bung'ali!

⁸Buli mu Libusiana lie kanisa nenya baseecha basabe, baseecha babeana khu Wele basute kamakhono kabwe mu lisaba ne bakhali ne lirima namwe kamayiingamo tawe.

⁹ Lundi nenya bakhasi boosi bafware chingubo chikhoyela, lundi befware bulayi, ne se khuli mu khusuuka lichuune namwe khukhwifwara esahabu namwe chisiimbi namwe chingubo che bukusi bwe angaaki tawe,

¹⁰ne kakhali babe ne bikholwa bilayi, nga bakhasi babelanga khuba be dini ne bakhoya babe.

¹¹Bakhasi bakhoyeele khukhweyika mu khwioleelesia ne lilieboombia likali.

¹²Se mbafukiilila nibo khukhwekisia namwe khuba ne bunyali khu baseecha tawe; bakhoya basile busa.

¹³ Sikila Adamu anyoa abumbwa nio Hawa aloondakho.

¹⁴ Sietani se abea Adamu tawe, abea omukhasi mala afuna lilaka lia Wele.

¹⁵Ne kakhali omukhasi alaonisibwa khubirira mu khusaala babaana, aaba ne achiililila mu lisuubila ne busiime ne butakatifu.