Read lubukusu 1 Tim. 3 Bible Online

1 Tim. 3 - lubukusu bible

1 Tim. 3

¹Elomo yino eli eya ng'ali, omundu aaba ne ali ne silukuluku khuuba Bishopu owe kanisa, aba ekoombile kimilimo kimilayi.

² Nono Bishopu owe kanisa akhaba obiiywakho khwikhuwa liosi liosi tawe, akhoya abe no mukhasi mulala yeng'ene, abe milengaala, abe owiliinda, lundi owe busicha, akhoya abe owakaanila bakeni mungo mwewe; akhoya abe onyala wekisia,

³akhaba omumeesi namwe owe sisiayuumba tawe, ne kakhali akhoyeele abe omuolu, owe kumuleembe, ne akhasiima chirupia tawe;

⁴akhoya abe onyala khukhwimeelela enju yewe bulayi ne khukhwekisia babaana bewe khu muria niye ne buriaani bwoosi.

⁵Sikila omundu okhanyala khukhwimeelela enju yewe omwene tawe, anyala ariena aaliinda e kanisa eya Wele?

⁶Akhoya abe ne lisuubila likali, nio akhelola mala aanyoola silaamo nga Sietani alaamwa tawe.

⁷Akhoya abe omundu niye babaandu be nje we kanisa baria nio akhabiiywa ne khukwa mu mureko kwa Sietani tawe.

⁸Bayeeti be mu kanisa boosi bakhoya babe ne kimiima kimilayi ne khuba basuubilwa; bakhanywa endali engali namwe baliukhile chirupia tawe;

⁹bakhoyeele beambe khu bung'ali bubwafuunulwa bwe lisuubila ne liiba lie mu mebaasio lilayi.

¹⁰Bakhoyeele banyoa khukelwa, ne babira likela elio babe bakholi.

¹¹Bakhasi babwe bosi bakhoya babe be kimiima kimilayi, lundi bakhaba ne kamakuto tawe, khukhwola babe milengaala lundi basuubilwa mu buli siindu.

¹²Omuyeeti owe kanisa khukhwola abe no mukhasi mulala yeng'ene, abe onyala emeelela babaana bewe nenju yewe bulayi.

¹³Bayeeti bakhola kimilimo kiabwe bulayi banyoola lisiima lilayi lundi banyala khulomaloma mu bunyindaafu khuloondekhana ne lisuubila liabwe mu Yesu Kristo.

¹⁴Nga ndikho mbandika ebarwa yino khwiwe, ndi ne lilieyikina ndi kheeche khu khubona ewe embi ari.

¹⁵Ne kakhali naaba ne kheecha bwangu tawe, ebarwa yino ekhakhumanyisie ewe nga ne khukhoyeele khumenya ne khuli munju eya Wele, eli ekanisa eya Wele omenyile mindali, enjeko ne kumusiingi kwe bung'ali.

¹⁶Se aliio onyala akorwa bukali bwe lusimo lwe dini yefwe tawe, Abonekhana mu mubili nga omundu, Okesebwa ne Roho khuba omuluungi! Lundi bamalaika bamubona niye. Elwachwa khu Be Chikholo, Aasuubilwa mu sibala sioosi, lundi aayilwa mwikulu.