Read lubukusu 1 Tim. 4 Bible Online

1 Tim. 4 - lubukusu bible

1 Tim. 4

¹Roho aloma abuwaanga busa ali babaandu balala balilekha lisuubila mu biise bimaliilisi. Balifukiilila roho babeeyi ne khuloonda kamekisio ke bisieeno.

²Kamekisio nga ako kario kasalanisibwanga ne babaandu babeeyi nibo liiba lie mu mebaasio kabwe liafwa, oli liliosibwa ne sichuuma sibilile pie.

³Babaandu nga bano bari bekisia bali, buli bubi khureerana ne khulia biakhulia chingano nabulebe. Wele abuumba biakhulia ebio khuliibwa ne babaandu basuubila, enyuma we lisaba lie khu khuupila Wele orio.

⁴Buli siindu nisio Wele abuumba sili silayi, siakhulia se siliio sinyala sialobwa tawe, ne kakhali buli siindu sikhoya siakaanilwe ne lisaba lie khu khuupila Wele orio,

⁵sikila elomo eya Wele ne lisaba elio bikila siafukiililwa khu Wele.

⁶Waaba no aana kamalaka kano khu bawandaayo, olaba omukholi omulayi owa Yesu Kristo nga ne weliisia mu roho khu makhuwa ke lisuubila nende ke liliekisia lia ng'ali nilio waloondile.

⁷Ne kakhali yiyaula khukhwama khu mbakha chikhali cha Wele, chikholaana khuboolwa tawe, wenasie mu mekisio ke bulamu bwe busuubilifu khu Wele.

⁸Khunasia kumubili khuli ne bukhala, ne kakhali khukhwenasia ka roho khuli ne bukhala mu buli ngila, sikila khusuubisia khubao khwe bulamu bwa luno nende bwe chindaalo chichiicha.

⁹Yino eli elomo eya ng'ali, ekhoyeele khufukiililwa ne khusuubilwa.

¹⁰Khwekumianga ne khukhola kimilimo ne kamaani, sikila khwareere lilieyikina liefwe mu Wele omenyile mindali ooli Omuonia owa boosi ne lukali abo basuubila.

¹¹Baelesie kamalaka ne kamekisio kano.

¹²Okhalekha yesi yesi akhulekelesia ewe bali sikila oli omwana tawe, ne kakhali ba sisiekesio khu basuubili khubirira mu lilomaloma ne liiba liowo, busiime bwowo, lisuubila ne bukwalaafu bwowo.

¹³Nabwila nga ne ndiicha, aana siise siowo ne kamaani khusoma kamaandiko mu baandu, khukhwilwacha ne khukhwekisia.

¹⁴Okhalekha khurumikhira siianwa nisio wanyoola khubirira mu niko bang'oosi baloma, lundi nga basaakhulu bakhurakho kamakhono kabwe tawe.

¹⁵Yeana khukhola kano ne kumwoyo kwowo kwoosi nio babaandu boosi babone lichiililila liowo.

¹⁶Weyaye wamwene ne khuliinda kamekisio kowo. Chiililila khukhola kano, sikila nokakhola, oleonia wamwene ne naabo bakhurekeeresianga ewe.