Read lubukusu 1 Tim. 5 Bible Online

1 Tim. 5 - lubukusu bible

1 Tim. 5

¹Okharafuira omundu omukhulu khwiwe tawe, ne kakhali mulomalomekho nga olomaloma khu raraao. Bukula baele nga bawandaayo,

²baloosi nga bamaao ne bakhasi baele nga bakooko bowo, mu bukwalaafu bwoosi.

³Ba ne buriaani khu banamulekhwa bali bong'ene.

⁴Ne kakhali namulekhwa aaba ne ali ne babaana namwe babechukhulu, bakhoyeele banyoa beyika khukhola kimilimo kiabwe kie dini khu be nju yabwe eng'ene, ne mu ngila yino baruunge basaasi ne bakuuka babwe, sikila ako niko kasiimisia Wele.

⁵Namulekhwa oli yeng'ene busa, okhali nende omuliinda tawe, arechanga lilieyikina liewe mu Wele lundi achiililila khusaba buyeeti bwa Wele siilo ne kumuusi.

⁶Ne kakhali namulekhwa omenya limenya lie khukhwelekhuula aba afwa khaale, akhaba nasiili omulamu.

⁷Baelesie kamalaka kano nio bakhabiiywakho khu siindu siosi siosi tawe.

⁸Ne kakhali yesi yesi nakhaliinda balebe bewe tawe, lukali be nju yewe, aba ekaanile lisuubila mala aba ali omubi lukali khukhila okhasuubila tawe.

⁹Okhatasa namulekhwa yesi yesi khu masina ke banamulekhwa, nakhali ne ali angaaki we kimiiko kamakhumi sita tawe. Lundi khukhwola, abe owacha mwilia lulala lwong'ene,

¹⁰mala aamanyikhana khuba ne bikholwa bilayi. Abe omukhasi owakhusia babaana bewe bulayi, owakaanila bakeni mungo mwewe, akhola kimilimo kie khukhwioleelesia khu bakristo basie, ayeeta babaandu mu butinyu, mala eaana omwene khukhola kamalayi.

¹¹Ne kakhali okhatasa namulekhwa baele khu masina ako tawe, sikila nga liliekoomba liabwe ne libakhola ne beenya khucha mwilia, baukha khukhwama khu Kristo,

¹²khwako bamanyikhana khuba bafunake lisuubisia lie khunyoa nilio baakhola khu niye.

¹³Lundi beyika khumalila biise biabwe mu khuyiiya khukhwama munju ndala khukhwola mu kiindi; ne khutumao, beyika khuba be kamakuto lundi babeyingisia mu kabeene, ne khukachula bibiindu nibio bakhakhoyeele tawe.

¹⁴Nono ese nenya banamulekhwa baele bache liilia, babe ne babaana, mala baliinde chinju chabwe, nio bakhaelesia basiku befwe bubweyaangu bwe khuloma kamabi khwifwe tawe.

¹⁵Sikila banamulekhwa balala bakaluukhane khale ne khuloonda Sietani.

¹⁶Ne kakhali omukhasi omukristo yesi yesi aaba ne ali ne banamulekhwa munju mwewe, akhoya abaliinde mala alekhe khutiuukha busiro khu kanisa, nio ekanisa nayo eliinde banamulekhwa bamenyile bong'ene.

¹⁷Basaakhulu bakhola kimilimo kimilayi nga babemeelesi bakhoya babukulwe khuba babolaana khunyoola kumuruungo kumuboofu, lukali abo bakhola kamaani mu khwilwacha ne khukhwekisia.

¹⁸ Sikila liiandiko liloma lili, “Mukhaboa eeyi emunwa ne mulikho mu kirumikhira khuula engaanu tawe” ne “Omukholi akhoyeele khuebwa kumuruungo kwewe.”

¹⁹ Okharekeeresia lisitako khu musaakhulu ne likhareerirwe ne baloli babili namwe bakali tawe.

²⁰Rafwira mu baandu abo boosi bakhola bubwoni, nio babaandi barie.

²¹Ebweeni wa Wele ne Yesu Kristo ne malaika batakatifu khusaba orie kamalaka kano ne okhabiila omundu yesi yesi mala osiime okundi mu buli siindu nisio okhola tawe.

²²Okhakhola khangu khura kamakhono khu mundu yesi yesi khumwaula khu milimo kio Mwami tawe. Okhasaanga mu bwoni bwe babaandi tawe, yeliinda mu bukwalaafu.

²³Okhanywa kameechi kong'ene tawe, ne kakhali nywakho endali ngekhe khuyeeta enda yowo, sikila obechanga omulwale buli khase.

²⁴Bubwoni bwe babaandu balala bubonekhana busa abuwaanga, mala bubwoni bwabwe bubarangirira mu khukhalakilwa, ne kakhali bubwoni bwe babaandi bukelao nio bwabonekha ekhumaliilikha.

²⁵Mu ngila ng'ene eyo bikholwa bilayi bibonekhanga abuwaanga, akhaba ebio biikhali abuwaanga tawe, se binyala biakisibwa tawe.