Read lubukusu 1 Tim. 6 Bible Online

1 Tim. 6 - lubukusu bible

1 Tim. 6

¹Abo baali nasioobi khukhwola babe ne liria likali khu bakhulu babwe, nio yesi yesi akhaloma kamabi khu lisina lia Wele ne khu liekisia liefwe tawe.

²Nasioobi nibo bakhulu babwe bali bakristo khukhwola bakhabalekelesia tawe, sikila bali bawandaayabwe. Ne kakhali, bakhoyeele babakholele bulayi khukhilakho, sikila abo banyoola bukhala khukhwamanana ne kimilimo kiabwe bali basuubili nibo basiima. Khukhwola wekisie ne khukhwilwacha bibiindu bino.

³Yesi yesi owikisia kamekisio kali lukano ne safukiilisiana ne kamakhuwa kang'ali ko Mwami wefwe Yesu Kristo, ne kamekisio ke dini yefwe tawe,

⁴aba ali ne lilielola likali ne se amanyile siindu tawe. Ali ne liliekoomba libi lie khuyingana ne khulomana khuloondekhana ne kamakhuwa lundi areera likhendekha, bulomani, bukhomo, khukhwibaasilia babaandi kamabi,

⁵ne kamayiingamo kamakali khukhwama khu baandu bakhalimo bung'ali tawe lundi be kamebaasio kakhakhola siindu tawe. Bebaasia bali buwele buli engila eye khunyoola buiinda.

⁶Ng'ali khuli ne bukhala bukali mu khuba ne buwele ne khunyalikha nende nibio khuli nabio.

⁷Siina nisio efwe khwareera mu sibala? Siindu tawe! Siina nisio khunyala khurusia mu sibala? Siindu tawe!

⁸Khwako kaaba bali khuli ne biakhulia ne chingubo, ebio bili bibiolaana khwifwe.

⁹Ne kakhali abo babeenya khuba baiinda bakwichanga mu makhako ne khuaambwa mu mureko kwe liliekoomba lie busilu ne lilionaka, libara mu lionaka ne libunia.

¹⁰Sikila khusiima chirupia khuli sisina sie buubi bwoosi. Balala babeele ne liliekoomba likali khuchinyoola mala bauukhe khukhwama khu lisuubila, mala kimiooyo kiabwe kianyoolile buchuuni bukali.

¹¹Ne kakhali ewe, mundu owa Wele, okhabakho mu biindu bino tawe. Khaka lukali khuloondelela buluungi, khuloondelela khuria Wele, lisuubila, busiime, liliekhaliilikha, ne buolu.

¹²Khupana liie lie lisuubila, mala onyoole bulamu bwa mindali, sikila Wele akhulaanga ewe wiche mu bulamu buno nga ne waboola lisuubila liowo ne kumwoyo kwowo kwoosi ebweeni we baloli bakali.

¹³ Ebweeni wa Wele, oanaanga bulamu khu biindu bioosi, ne ebweeni wa Yesu Kristo, owaandalasia lisuubila liewe ebweeni wa Pondio Pilato, ese khutanyilila

¹⁴orie kamalaka kano ne khukaloonda mu busuubilifu khukhwola khu Ndaalo niyo Omwami wefwe Yesu Kristo akheeche.

¹⁵Liliicha liewe lilireerwa ne Wele mu siise sisiolaana, Wele oli Omuruki yeng'ene ooli ne luyali ne bunyali, Omwami owe babaami lundi Omuruki owe baruki.

¹⁶Niye yeng'ene ali okhalifwa tawe; amenya mu buwaanga nibwo omundu yesi yesi akhanyala embiyao tawe. Se aliio owamubonakho tawe; lundi se aliio onyala amubona tawe. Lukoosi ne bunyali bwa mindali bube khu niye! Amina.

¹⁷Laka abo bali baiinda mu biindu bie bulamu bwe khu sibala khukhwola bakhebonia tawe, bakhara lilieyikina liabwe mu biindu biikhali ne ngaanga nga buiinda tawe. Ne kakhali bare lilieyikina mu Wele okhuelesianga buli siindu mu buaani bwewe bukali khulwe khoyo yefwe.

¹⁸Batanyilile bakhole kamalayi, babe baiinda mu bikholwa bilayi, babe baani lundi babe baberekekha khuyeeta babaandu.

¹⁹Mu ngila yino bakhebungile buiinda buliba kumusiingi kumulayi khulwe chindaalo chichiicha. Lundi nio bolaane khunyoola bulamu buuli bwa ng'ali.

²⁰Timoteo, liinda bulayi nisio waebwa khuliinda. Okhaba mu lomo che sifwaabi lundi che kamayiingamo ke busilu niko babaandu balala mu khutiima balaanga bali, “Bukesi” tawe.

²¹Sikila balala balomanga bali, bali nabwo barurire khu ngila eye lisuubila. Kumwalaalo kwa Wele kube nanywe mweesi.