Read lubukusu 2 Tim. 1 Bible Online

2 Tim. 1 - lubukusu bible

2 Tim. 1

¹Khukhwama khu Paulo, omurumwa owa Yesu Kristo khulwe lilienya lia Wele, owarumwa khulangilila bulamu bubwalakwa nibwo khuli nabwo mu buambaani ne Yesu Kristo.

² Khu Timoteo, omwana wase omukoosi: Wele Paapa ne Yesu Kristo Omwami wefwe akhoya akhuelesie kumwalaalo, akhukholele siisa lundi akhuelesie kumuleembe.

³Khupila Wele orio, Wele niye kholelanga ne ndi ne liiba lie mukari likhebiiyakho khu liosi liosi tawe, nga sikuuka siase siakhola. Mupilanga niye orio nga ne khukhebulilanga ewe buli lwoosi mu masaba kase siilo ne kumuusi.

⁴Ese khebulilanga kamasika kowo mala nenya khukhubona ewe lukali po, nio nikhoye lukali.

⁵ Khebulila lisuubila lia ng'ali nilio oli nalio, lisuubila nilio kukhuo Loisi ne Maao Yunisi bosi baba nalio. Ndi ne bung'ali ndi ewe wesi oli nalio.

⁶Khulwe sifuno sino khukhebusia ewe ndi khola siianwa sia Wele sibe sie kamaani mwiwe, siianwa nisio wanyoola khukhwama nga ne nakhurakho kamakhono kase.

⁷Sikila Roho niye Wele akhuelesia efwe se akhukhola efwe khwaba ne buuri tawe; ne kakhali, Roho wewe akhwichusianga mwifwe kamaani, busiime, ne lilieliinda.

⁸Khwako okhaba ne chisoni, khuboola ko Mwami wefwe tawe, namwe okhaba ne chisoni sikila ese nga nendi omuboe khulwa Kristo tawe. Ne kakhali, saanga mu khupisibwa siibi khulwe Elomo Endayi, sikila Wele akhuelesianga ewe kamaani khukhola orio.

⁹Aakhuonia efwe mala akhulaanga khube babaandu bewe omwene, se kali sikila niko khwakhola tawe, ne khali khulwe sifuno siewe omwene ne kumwalaalo kwewe. Aakhuelesia efwe kumwalaalo kuno khubirira mu Yesu Kristo siise ne sikharakikha khubao tawe.

¹⁰Ne kakhali luno kwareerwe abuwaanga khwifwe khubirira mu liicha lio muonia wefwe, Yesu Kristo. Owakamia bunyali bwe lifwa ne khubirira mu Lomo Endayi aareere abuwaanga bulamu bukhawao tawe.

¹¹ Wele aandobora ese nga omwilwachi, omurumwa lundi omwekisia, khulangilila Elomo Endayi,

¹²lundi lino nilio likila ese ne khupwa siibi sikila bibiindu bino. Ne kakhali ndi ne lilieyikina likali sikila manyile niye subiile lundi ndi na ng'ali ndi ali ne bunyali bwe khuliinda nisio ambeleesie khukhwola Endaalo eyo.

¹³Yiandalasia khu makhuwa ka ng'ali niko nakhwikisia, nga siilolelo khwiwe khuloonda, lundi ba mu lisuubila ne mu busiime buli bubwefwe mu buambaani ne Yesu Kristo.

¹⁴Khubirira mu bunyali bwa Roho Omutakatifu, omenyile mwifwe, liinda bibiindu bilayi nibio oelesiibwe.

¹⁵Omanyile oli buli mundu mu lukoongo lwa Esia aanjanjukhe, akhaba Fikelo ne Herimokene.

¹⁶Omwami akhoya akholela siisa enju eya Onesifora, sikila andaamo kumwoyo biise bikali. Se aambwa chisoni ali ese ndi mu siboe tawe,

¹⁷ne kakhali nga oola busa ari mu lukoba lwa Rumi, arakikha khu khumbiima ese lukali nabwila nga aanyoola.

¹⁸Omwami akhoyeele aamukholela siisa khu Ndaalo eyo! Ne ewe omanyile bulayi bwene nga ne anjeeta mu Efeso.