Read lubukusu 2 Tim. 3 Bible Online

2 Tim. 3 - lubukusu bible

2 Tim. 3

¹Khebulila oli biise bitinyu bikhabeo mu ndaalo chimaliilisi.

²Babaandu bakhabe be chinge, balianga, babelola, lundi be kisuunia; be chilomo chimbi, bakharia basaasi babwe tawe, bakhasiima kamalayi tawe lundi babooni.

³Baliba babi, bakhalimo siisa tawe, bakiikha ba basiaabwe, be sisiayuumba, lundi barafu; balibiila kali kamalayi.

⁴Baliba bakesikesi, be sifwaabi, lundi babechula ekibonio, balisiima khukhwisangaasia babeene khukhila Wele.

⁵Baliloonda ke dini enje busa, ne khuloba bunyali bwayo bubwene. Mukhaba siimbi ne babaandu nga bano bari tawe.

⁶Balala khu nibo bacha munju che babaandi ne khuminya bakhasi bakhali ne kamaani tawe, bakhasi baali ne busiro bwe bubwoni bwabwe ne liliekoomba lia buli lukano,

⁷bakhasi bakhakanga buli lwoosi khukhweyika ne kakhali se bamanya bung'ali tawe.

⁸ Nga Yane ne Yambure bayingania Musa, khwako babaandu bano boosi bayingania ne bung'ali, babaandu nibo chinganakani chabwe chikhakhola kimilimo tawe, lundi ba bakwa mu lisuubila.

⁹Ne kakhali se balicha aleeyi tawe, sikila buli mundu akhabone busilu bwabwe. Ako niko kakekholekha khu Yane ne Yambure.

¹⁰Ne kakhali waloonda liliekisia liase, liba liase, ne sifuno siase mwimenya, ewe waboone lisuubila liase, liliifwiilisia liase, busiime bwase, ne liliekhaliilikha liase.

¹¹ Waboone khu khupisibwa siibi khwase, ne khuchuunisibwa. Omanyile siibi sikali nisio nabiriramo ne koosi kakanjikholekhakho mu Andioka, Ikoni, ne mu Lisitura! Ne kakhali Omwami aasikula mu koosi.

¹²Yesi yesi owenya khumenya limenya lie buwele mu buambaani ne Yesu Kristo akhapisibwe siibi,

¹³lundi babooni nende babeebea busa bakhachiililile khuba babi lukali, ne babea balala ne khukhwibea babeene.

¹⁴Ne kakhali ewe chiililila mu bung'ali nibwo wekisibwa lundi nibwo wasuubila lukali. Omanyile babekisia bowo baba naanu,

¹⁵lundi okhebulila oli khukhwama mu bwana bwowo, wamanya kamaandiko kamatakatifu, kanyala kakhuelesia ewe limanya likhurangirira mu buonia khubirira mu lisuubila mu Yesu Kristo.

¹⁶Kamaandiko koosi kama khu Wele lundi ke bukhala mu khwekisia bung'ali, khukaania kamakhiikha, khuluungisia kakhali ng'ali tawe ne khuaana likaambila khuloondekhana ne limenya lie buluungi,

¹⁷nio omundu okhalabanila Wele abe ne bioosi nibio enya nio akhole buli siindu siili silayi.