Read lubukusu 2 Tim. 4 Bible Online

2 Tim. 4 - lubukusu bible

2 Tim. 4

¹Ebweeni wa Wele ne Yesu Kristo, oolikhalakila balamu ne bafu, lundi sikila alikho echa khukhwamiia nga Omwami, ese khuchuuba lukali

²boola burume obwo. Obe ne sinani sie khukiboola (siise siakhaba ne sili silayi namwe tawe), yilwacha khusuubisia, khurafwira ne khuraamo kumwoyo nga ne wekisia ne liliefwiilisia likali.

³Siise silecha nisio babaandu bakhalekhe khuloonda kamekisio kamalayi, mala baloonde lilienya liabwe ne khutasa khukhwerao babekisia bakali balibaboolela niko bebeene bekoomba khuulila.

⁴Bakhalekhe khurekeeresia bung'ali mala barekeeresie chingano busa.

⁵Ne kakhali okhoya weliinda mu buli siindu, yikhaliilikha mu butinyu, khola kimilimo kio mwilwachi owe Elomo Endayi, lundi khola kimilimo kiowo kioosi nga omukholi owa Wele.

⁶Khwise, siise siase sie khurusibwa nga embosio siolile. Siise siase sie khurura mu bulamu buno nisio sino.

⁷Napaane liie bulayi namalile chimbilo chase lundi naliindile lisuubila liase.

⁸Nono kumuruuru kwe bukhili mu khuba omuluungi ebweeni wa Wele kwanindile, kumuruuru nikwo Omwami, omukhalaki omuluungi, akhambelesie khu Ndaalo eyo, ne se ndi ese seng'ene tawe, akhaba khwaabo boosi baliindiilila mu busiime khukhwicha khwewe.

⁹Khaka nga ne onyala wiche niio ndi khangu.

¹⁰ Demasi asiima sibala sino mala aanjanjuukha, aacha Tesalonike. Kuresike aacha Kalatia, ne Tito aacha Dalimatia.

¹¹ Luka yeng'ene niye oli ano nase. Khoenje Mariko wiche naye, sikila anyala aanjeeta mu milimo.

¹² Naruma Tichikasi Efeso.

¹³ Ne wicha ndeerere likooti nilio nalekha mu Turoa mu makhono ka Karipo; reera bitabu ebio bioosi, lukali bie kamasieelo.

¹⁴ Omubasi Alekisanda aanaania lukali; Omwami akhamuruungie khuloondekhana nende niko aakholile.

¹⁵Ba meeso, yeliinda khukhwama khu niye, sikila ali ne sisiayuumba mu khwimelekhana khu lomo yefwe.

¹⁶Se aliio owaba nase siise sie khunyoa nga naba ne mbaana buloli bwase tawe, boosi banjanjukha. Wele akhababalila kamabi tawe!

¹⁷Ne kakhali Omwami aaba nase lundi aamba kamaani nio nanyala khuboola burume mu bwichufu khu Be Chikholo baulile; lundi naona khukhwama mu khukhalakilwa lifwa.

¹⁸Ne Omwami akhambonie khukhwama mu mabi koosi mala ambile mu Bwami bwewe bwe mwikulu mu muleembe. Luyali lube khu niye mindali na mindali! Amina.

¹⁹ Nduma kimileembe kiase khu Pirisila nende Akwila, nende khu be enju eya Onesifora.

²⁰ Rasito aarama mu Korinjo, lundi nalekha Turofimo mu Mileto, sikila aba omulwale.

²¹Khaka kamaani kowo koosi wiche kumunaane ne kukhoola tawe. Eyubulo, Puteni, Lino, ne Kilautia barumire kimileembe kiabwe, akhaba bawandaayefwe babaandi Bakristo boosi.

²²Omwami abe nawe mu mwoyo kwowo. Kumwalaalo kwa Wele kube nanywe mweesi.