Read lubukusu Tito 1 Bible Online

Tito 1 - lubukusu bible

Tito 1

¹Khukhwama khu Paulo omukholi owa Wele lundi omurumwa owa Yesu Kristo. Ese naroborwa mala narumwa khutasa lisuubila mu barobore ba Wele ne khubarangirira mu bung'ali nibwo edini yefwe yekisia,

²eyetiila khu lieyikina lie bulamu bwa mindali. Wele, okhabea tawe, aakhusuubisia efwe bulamu buno sibala ne sikhabaao tawe,

³ne mu siise silayi aaliekesia khubirira mu lomo yewe. Elomo yino yaelesibwa khwise, mala ese ngilwacha khuloondekhana ne lilaka lia Wele Omuonia wefwe.

⁴ Ndikho mbandika ebarwa yino khu Tito omwana wase ng'ali mu lisuubila nilio khulimo naye. Wele Paapa ne Yesu Kristo Omuonia wefwe bakhoya bakhuelesie kumwalaalo ne kumuleembe.

⁵Nakhulekha mu Kurete, nio ong'oone bibiindu bibienyekha khung'oonwa, ne khurobora babemeelesi be kanisa mu buli lukoba. Khebulila niko nakhuboolela.

⁶ Omwimeelesi akhaba omundu obiiywakho khu liosi liosi tawe, akhoya abe no mukhasi mulala yeng'ene ne babaana babasuubila mu Wele ne bakhaba ne fuma eye siyubuyubu namwe babe be sileka tawe.

⁷Sikila omwimeelesi owe kanisa ali omuliindi owe kimilimo kia Wele, se akhoyela aabiiywakho khu siindu siosi siosi tawe, akhaba omiinyakilisia babaandi namwe oambwa lirima bwangu, namwe omumeesi, namwe owe sisiayuumba, namwe owe kumuluungo kwe chirupia tawe.

⁸Khukhwola abe owakaanila bakeni lundi osiima lili lilayi. Akhoya abe omundu owifwiilisia, omuluungi, omutakatifu, lundi owe kimiima kimilayi.

⁹Akhoya atiile lukali elomo enyala khusuubilwa lundi efukiilisiana ne kamekisio. Mu ngila yino akhanyale khura kumwoyo mu baandu babaandi khubirira mu mekisio ka ng'ali ne khukhwekesia kamakhiikha kaabo bakhakafukiilila tawe.

¹⁰Sikila baliio bakali, ne lukali abo babaamile mu dini eye Bayaudi, balalobanga kamekisio ne babea babaandi mu makhuwa kabwe ka busa.

¹¹Khwenyekha khwimikhe chilomo chabwe, sikila balikho bonaka chingoba khubirira mu khwekisia niko bakhakhoyela bekisie tawe, mala kano koosi khulwe sifuno sie chisoni sie khukhwenya khunyoola chirupia.

¹²Aabao Omukurete omwene, mulala khu bang'oosi babwe, owaloma ka ng'ali ali, “Bakurete buli lwoosi bali babeeyi, bali chisolo chimayaanu, lundi bali bakara lundi be kumuliuliu.”

¹³Sikila sifuno sino ewe okhoya obarafwire lukali, nio babe ne lisuubila lia nabalamu.

¹⁴Ne bakhachiililila khuloonda chingano che Siyuda ne kamalaka ke babaandu kakaama khu baandu ba baloba bung'ali tawe.

¹⁵Buli siindu sili sikwalaafu khwaabo baali bakwalaafu; ne kakhali sikwalaafu se siliio khwaabo bali banyaalu lundi bakhasuubila tawe. Sikila kamebaasio ne liiba liabwe bianyaalutiikhe.

¹⁶Baloma bali bamanyile Wele, ne kakhali bikholwa biabwe bikaania. Bali be sikhoonde lundi be sileka, se bolaana khukhola sisiindu siosi siosi silayi tawe.