Read lubukusu Tito 2 Bible Online

Tito 2 - lubukusu bible

Tito 2

¹Ne kakhali ewe okhoya wekisie kamakhuwa kafukiilisiana ne kamekisio kamalayi.

²Kambila basaakhulu khuba be limanya lilayi, be bukesi, lundi ba beliinda; khuba be lisuubila lilayi, busiime, ne liliekhaliilikha.

³Mu ngila ng'eneyo kaambila baloosi khuba ne kimiima kimilayi nga bakhasi bamenyile limenya litakatifu ne bakhoyela babe. Bakhaba be kamakuto namwe banasioobi be kamalwa tawe. Bakhoya bekisie kaali kamalayi,

⁴nio beyikie bakhasi baele khusiima baseecha ne babaana babwe,

⁵babe babeliinda lundi bakwalaafu, ne khuba bakhasi balayi munju, ba beana babeene khu baseecha babwe, nio omundu yesi yesi akhalomakho kamabi khuloondekhana ne elomo eya Wele tawe.

⁶Mu ngila ng'eneyo; ndanyilila basoleeli babe babeliinda.

⁷Ewe wamwene okhoya obe sisiekesio sie kimiima kimilayi mu buli siindu. Ba omuluungifu lundi owe sinani sikali mu khwikisia khwowo.

⁸Rumikhira kamakhuwa kamalayi kakhanyala kabiyisibwa tawe, nio basiku bowo baambwe chisoni khulwe khutamba sisiindu sibi nisio baloma khuloondekhana khwifwe.

⁹Nasioobi bakhoya berusia khu bakhulu babwe ne khu basiimisia mu biindu bioosi. Bakhabakobosiakho siindu,

¹⁰namwe beebe khukhwama khu nibo tawe. Ne kakhali, bakhoya bekesie bali buli lwoosi bali balayi lundi basuubilwa nio lireere efuma endayi khu mekisio ka Wele Omuonia wefwe mu bioosi nibio bakhola.

¹¹Sikila Wele ekesie kumwalaalo kwewe khulwe buonia bwe babaandu boosi.

¹²Kumwalaalo okwo kukhwekisia efwe khulekhe limenya likhali lie buwele, ne liliekoomba lie mu sibala, mala khumenye limenya lie khukhweyaya, lie buluungi, ne limenya lie khuria Wele mu sibala muno

¹³ne khulindiilila Endaalo eye chikhabi niyo khweyikina, niyo luyali lwa Wele wefwe omukali no Muonia Yesu Kristo lulifunukha.

¹⁴ Omwene eaana sikila efwe, khu khuonia efwe khukhwama mu mabi koosi ne khu khukhola efwe khube bakwalaafu, babaandu baali babewe yeng'ene, lundi bali ne silukuluku sie khukhola kamalayi.

¹⁵Yekisia bibiindu bino, mala orumikhire bunyali bwowo bwoosi ne olikhoraamo kumwoyo ne khurafwira bakhurekeeresia. Okhalekha omundu yesi yesi khu nibo aakhulekelesia ewe tawe.