Read lubukusu Tito 3 Bible Online

Tito 3 - lubukusu bible

Tito 3

¹Khebusia babaandu bowo barie baruki ne kamalaka kaliio, babe barekeerefu khu nibo ne khukhwerekekha khukhola kamalayi mu ngila choosi.

²Baboolele bakhalomaloma kamabi khu mundu yesi yesi tawe, ne kakhali babe be kumuleembe ne busaale, lundi bekesie liiba lie lukoosi khu buli mundu buli lwoosi.

³Sikila efwe fwabene khale khwaba basilu, be sileka, lundi be kitiimo. Khwaba banasioobi be liliekoomba ne busangaafu bwe chingano choosi. Khwamenya mu sikhoonde ne sikhalikhali, babaandi bakhubiila mala fwesi khwababiila.

⁴Ne kakhali nga siisa ne busiime bwa Wele Omuonia wefwe bwabonekha,

⁵aakhuonia efwe. Se kaba khulwe bikholwa bilayi bioosi bioosi nibio khwakhola fwabene tawe, ne kakhali sikila siisa siewe omwene, khubirira mu Roho Omutakatifu, okhuelesianga efwe lisaalwa liya ne bulamu buyia khulwe khu khusiinga efwe.

⁶Wele areera Roho Omutakatifu mu bukali lukali khubirira mu Yesu Kristo Omuonia wefwe,

⁷nio khubirira mu mwalaalo kwewe efwe khube baluungi ebweeni wa Wele, mala khunyoole bulamu bwa mindali, nibwo khweyikinanga khuli khukhanyoole.

⁸Elomo yino eli eya ng'ali. Nenya ewe okhatatasie kamakhuwa kano lukali, nio abo basuubila mu Wele babe ne sinani sie khura siise siabwe mu khukhola bikholwa bilayi, bie buyeeti khu buli mundu.

⁹Ne kakhali okhaba mu mayiingano ke busilu, kamasina kamakali ke bakuuka, bulomani ne khu khupana sikila lilaka tawe. Ako se kali ke buyeeti ne bukhala tawe.

¹⁰Kambila khukhwola khabili omundu oreera liliabukhana, ne nakhaulila tawe, okhaba ne likhuwa liosi liosi lundi khu niye tawe.

¹¹Ewe omanyile oli omundu nga oyo onekha, ne bubwoni bwewe bwekesia buli ali otiimile.

¹²Nga ne ndaruma Aritema namwe Tichikasi khwiwe, khaka kamaani nga nonyala khukhwicha niio ndi mu Nikopoli, sikila nenya khumenyamo mu ndaalo che kumunaane.

¹³Khola nga nonyala khuyeeta Senasi oweyika kamakhuwa ke lilaka ne Apolo barakikhe chingeendo chabwe, mala olole oli bali nende buli siindu nisio benya.

¹⁴Babaandu befwe bakhoya beyike khurumikhira siise siabwe mu khukhola kamalayi, nio bayeete abo babenyekhana buyeeti bwa khangu, bakhamenya limenya likhali lie buyeeti tawe.

¹⁵Boosi bali ano nase bamurumira enywe kimileembe. Elesia kimileembe kiefwe basaale befwe mu lisuubila. Kumwalaalo kwa Wele kube nanywe mweesi.