Read lubukusu Film. 1 Bible Online

Film. 1 - lubukusu bible

Film. 1

¹Khukhwama khu Paulo omuboe khulwa Yesu Kristo alala ne Timoteo wandaayefwe — Khu musaale wefwe lundi omukholi wasiefwe Filimona,

² ne khu kanisa eyakaananilaanga munju mwewe, ne khu yaya Afia ne khu musikaari wasiefwe Arikipo:

³Nyoola kumwalaalo ne kimileembe khukhwama khu Paapa wefwe Wele no Mwami Yesu Kristo.

⁴Wandaayase, Filimona, buli nga ne sabanga khukhebulilanga ewe ne khu khupila Wele wase orio.

⁵Sikila nyoolanga efuma eye busiime bwowo khu baandu ba Wele boosi, ne lisuubila nilio oli nalio mu Mwami Yesu.

⁶Lisaba liase lili mbo busangaanilo bwefwe nanywe nga basuubila, bureere limanyilisia likali lia buli ekhabi niyo khuli nayo mu bulamu bwefwe mu buambaani ne Kristo.

⁷Wandaayase omusiime, busiime bwowo bwandereere ekhoyo engali ne khu khundamo kumwoyo lukali! Ewe wasangaasiisie babaandu ba Wele boosi.

⁸Khulwe sifuno sino ese ndaba omunyindaafu lukali nga wandaayo mu Kristo khu khulakila ewe okhole sikhoya sikholekhe.

⁹Ne kakhali ese khusaba busa sikila nakhusiima. Ese khola lino akhaba nendi Paulo, wamwanda owa Yesu Kristo, ne lundi luno luri ndi mu siboe sikila niye.

¹⁰ Khwako ese khusaba ewe mu bweyaangu bwa Onesimo omwana wase omwene mu Kristo, sikila nga naba mu siboe nekela raraawe mu roho.

¹¹Siise siabao nisio akhaaba owe bukhala khwiwe tawe, ne kakhali luno ali owe bukhala khwifwe fwembi.

¹²Nono ndikho muruma niye omwene akobole ewowo ne kumwoyo kwase kulechela mu niye.

¹³Nenyile amenye nase ne siili mu siboe khulwe Elomo Endayi nio anjeete mu bweyaangu bwowo.

¹⁴Kakhaba kario se nenya khuyingiilile khu khunjeeta tawe, ne kakhali nenya okhole lino mu bulekhuule bwe lilienya liowo. Khwako se nyala nakhola sisiindu siosi siosi ewe nokhafukiilile tawe.

¹⁵Kanyala kaba bali Onesimo aakhulekha ewe khu siise sitiiti nio akhukobolele ewe omenye naye elala.

¹⁶Ne luno niye se ali nasioobi busa tawe, ne kakhali akhila nasioobi lukali, ali wandaayefwe omusiime mu Kristo. Khwise ali omusiime lukali po! Ne khwiwe alaba omusiime lukali nga nasioobi lundi nga wandaayo mu Mwami.

¹⁷Khwako kaaba bali wibaasia oli ese ndi owasio, mwakaanile akobole nga abeele ne unjakanila ese.

¹⁸Ne kaaba bali akhukholela kamabi kosi kosi namwe waaba ne omubaanja sisiindu siosi siosi mbaanje ese.

¹⁹Nono ano ndaandika lino ne kumukhono kwase kumwene, ese Paulo, khakhuruunge ewe. (Kakhaba kario, se khoyela khukhebusie ndi, ewe wamwene oli likobi liase tawe.)

²⁰Khwako wandaayase nosiima kholele likhuwa lilayi lino mwisina lio Mwami; nga wandaayo mu Kristo, sangaasie!

²¹Ndi nasuubi, nga ne mbandika kano ndi, olakhola nisio khusabile, ng'ali namanyile ndi olakhola khukhilakhoo.

²²Lundi ndekekhere lusiro sikila ndi ne lilieyikina ndi Wele alaulila lisaba lienywe mweesi, mala andeere lundi mwinywe.

²³ Epafura, oli mu siboe alala nase khulwa Yesu Kristo aamurumiire enywe kimileembe kiewe,

²⁴ ne akhaba bakholi basiaase, Mariko, Arisitariko, Demasi ne Luka boosi bamukhesiisie.

²⁵Kumwalaalo kwo Mwami Yesu Kristo kube nanywe mweesi.