Read lubukusu Baeb. 10 Bible Online

Baeb. 10 - lubukusu bible

Baeb. 10

¹Khwako sikila Lilaka lie Bayaudi lili busa sisiiniini sie bibiindu bilayi bibiaba ne bilikho biicha, ne se lili bibieene tawe, chimbosio chiaanwanga buli lwosi buli mwiiko, se chinyala chakhola babaandu babecha khu Wele mu ngila eyo baba babechufu tawe.

²Abanga babaandu basaayanga Wele mu ngila eyo ng'ali bakwalasibwa khukhwama mu bwoni bwabwe, andi se beulila ne bali ne bubwoni lundi tawe, lundi andi chimbosio choosi chakama.

³Ne kakhali chimbosio chiaanwanga buli mwiiko khukhebusia babaandu bubwoni bwabwe.

⁴Sikila kamalasile ke chiuunwa ne chimbusi se kanyala karusiao bubwoni tawe.

⁵ Khulwe sifuno sino, nga Kristo aba siimbi khukhwicha mu sibala, aboolela Wele ali: “Ewe se wenya chimbosio ne biaanwa tawe, ne kakhali wandekekheere ese kumubili.

⁶Ewe se osiimisibwa ne bibiaayo bibiosiibwe khu alutare tawe, namwe chimbosio khulwe khurusiao bubwoni tawe.

⁷Nio naloma ndi, ‘Ee Wele, ese ndi ano khukhola lilienya liowo nga kaandikwa khwise mu sitabu sie Lilaka.’ ”

⁸Khunyoa aloma ali, “Se wenya namwe se osiimisibwanga ne chimbosio nende bie khuaana namwe ne bibiaayo bie khukhwoselia khu Alutare ne chimbosio che khurusiao bubwoni tawe.” Aloma kano akhaba chimbosio chino ne chirusibwa khuloondekhana ne Lilaka.

⁹Nio aloma ali, “Ee Wele, ese ndi ano, khukhola lilienya liowo.” Khwako Wele arusiangao chimbosio chikhale choosi ne khu khwisiao embosio eya Kristo.

¹⁰Efwe fweesi khwakwalaasibwa khukhwama mu bwoni ne mbosio eye kumubili kwa Yesu Kristo omwene niyo aakhola lulala mala aakama ario sikila aakhola niko Wele eenya akhole.

¹¹ Buli musaayi akholanga kimilimo kiewe buli ndaalo ne khuaana chimbosio ching'ene kamakhabi kamakali, ne kakhali chimbosio chino se chinyala charusiao bubwoni tawe.

¹² Ne kakhali Kristo, aana embosio ndala khulwe khurusiao bubwoni, embosio eya buli lwosi mala nga ne amala ario eekhala kumukhono kumuseecha kwa Wele.

¹³Eyo nono, aaliindile Wele are basiku bewe aasi nga endebe eye khuswalakho bikele biewe.

¹⁴Khwako, khubirira mu mbosio ndala aakhole bakwalaasibwe khukhwama mu bwoni babe babechufu buli lwosi.

¹⁵Ne Roho Omutakatifu yesi akhuelesianga efwe buloli bwewe. Khunyoa aloma ali,

¹⁶ “Omwami alomanga ali, yino eli endakaano niyo khakhole nabo mu ndaalo chichiicha: Khare kamalaka kase mu miooyo kiabwe mala ngaandike mu mebaasio kabwe.”

¹⁷ Lundi alomanga ali, “Se khakhebulilekho bubwoni bwabwe ne bikholwa biabwe biibi lundi tawe.”

¹⁸Khwako nga bino ne bimalile khubeelwa, siaanwa sie khurusiao bubwoni se sienyekha lundi tawe.

¹⁹Nono, bawandaayase, efwe khuli ne bulekhuule bubwichufu khucha Abuundu Atakatifu Lukali khulwe khubirira mu lifwa lia Yesu.

²⁰Akhwikulila efwe engila embia, engila eye bulamu, khubirira mu pasia eyo, nikhwo khubirira mu mubili kwewe omwene.

²¹Khuli no Musaayi omukali owimeelela enju eya Wele.

²² Khwako lekha khwiche siimbi ne Wele ne kumwoyo kumulekhuule ne lisuubila lia ng'ali, ne kimiooyo kikwalaasiibwe khukhwama mu liba lie mukari libi, lundi ne kimibili kisingiibwe mu meechi kamakwalaafu.

²³Lekha khwiandalasilie elala mu lieyikina nilio khwiyamanga, sikila khwiyikina khuli Wele alakhola niko akhusuubisie efwe.

²⁴Lekha khuechane kimiooyo fwabene khu fwabene, khuyeetane fwabene khu fwabene, khuba ne busiime ne khukhola kamalayi.

²⁵Khukhalekha kumwiima kwe khukhwakaanana alala, nga balala ne balikho bakhola tawe. Ne kakhali, lekha khutase khutinyilisiana, nga ne khubona khuli Endaalo yo Mwami elikho yimbiya.

²⁶Sikila embosio ekiindi yosi yosi erusiao bubwoni se elikhoo kaaba bali mwenyelamo khuchiililila khukhola bubwoni enyuma we khuboolelwa bung'ali tawe.

²⁷ Ne kakhali, siramireo sili khulindiilila mu buri liliicha lie likhalaka ne kumulilo kumurafu kulibunia abo bayingania Wele!

²⁸ Yesi yesi okharia Lilaka lia Musa tawe akhoyeele eerwe ne akhalakilwe khuba omwoni khuloondekhana ne buloli bwe baloli babili namwe bakali, ne akhakholelwakho siisa tawe.

²⁹ Nono, kakhabe kariena, khu mundu olekelesianga Omwana owa Wele? Naanu obukulanga kamafuki ke ndakaano eya Wele kakamukwalaasia khukhwama mu bwoni khuba ka busa? Naanu okhomanga Roho owe kumwalaalo? Yibaasia siiukuumo nisio akhanyoole sikhabe sibi lukali!

³⁰ Sikila efwe khumanyile owaloma ali, “Ese kheyache, ekharuungie;” lundi owaloma ali, “Omwami akhakhalakile babaandu bewe.”

³¹Sili sisiindu sie khuriisia khukwa mu makhono ka Wele omenyile mindali!

³²Khebulila nga ne kaba khaale khwinywe. Mu ndaalo echo, enyuma we buwaanga bwa Wele khukhosia khwinywe, mwaapwa siibi lukali, ne kakhali se mwakhilwa mu khunyaakhana khwenywe tawe.

³³Biise bilala mwakhomwanga ebweeni we babaandu ne mukholelwa kamabi, ne mu biise bibiindi mwaba mwerekekha khuambaana nabo ba baaba ne bakholelwa bario.

³⁴Mwasanga mu khupisibwa khwe baboe, mala nga bibiindu bienywe bioosi biabukulwa mwekhaliilikha butinyu obwo mu busangaafu, sikila mwamanya muli mwaba mu siili ne sisiindu silayi lukali, sisiindu sinyala siamenya buli lwosi.

³⁵Nono, mukhalekha khuba banyindaafu tawe, sikila bunyindaafu bureranga kumuruuru kumuboofu.

³⁶Mukhoyeele mwefwiilisia, nio mukhole lilienya lia Wele mala munyoole nisio asuubisia khumuelesia.

³⁷ Sikila, nga liiandiko ne lilomanga lili, “Siise siasikaale sitiiti, oolikho wiicha akheeche, se akhakhiinde tawe.

³⁸Ne kakhali omundu wase omuluungi akhamenye khulwe lisuubila, ne kakhali ne akobola enyuma, se khamusangaalile tawe.”

³⁹Efwe se khuli babaandu bakobola enyuma ne khutiba tawe. Ne kakhali, khuli abo bali ne lisuubila lie khuonia kimiooyo kiefwe.