Read lubukusu Baeb. 11 Bible Online

Baeb. 11 - lubukusu bible

Baeb. 11

¹Khuba ne lisuubila khuli khuba na ng'ali khu biindu nibio khweyikina, khuba nasuubi khu biindu nibio khukhanyala khwabona tawe.

²Wele aafukiilila babaandu be khaale khulwe lisuubila liabwe.

³ Khubirira mwisuubila liefwe khumanya khuli elomo eya Wele yabaang'ana sibala, khwako bibiindu biibonekha biabuumbwa khukhwama mu biindu bikhanyala biabonekha tawe.

⁴ Lisuubila nilio liliakhola Apili aana embosio endayi khu Wele khukhila eya Kaini. Wele aafukiilila Apili khuba omundu omuluungi sikila lisuubila liewe, sikila Wele omwene afukiilila biaanwa biewe. Apili akhaba ne afwa, asilomaloma khubirira mwisuubila liewe.

⁵ Lisuubila nilio liliakhola Enoka khufwa tawe. Ne kakhali, aayilwa owa Wele, ne omundu yesi yesi se aabao onyala amunyoola tawe, sikila Wele aaba aamuyilile mu ngaaki. Kamaandiko kalomanga kali Enoka asiimisia Wele nakhayilwa mu ngaaki tawe.

⁶Se aliio yesi yesi onyala asiimisia Wele nakhali ne lisuubila tawe, sikila oyo yesi yesi owiicha khu Wele khukhwola abe ne lisuubila ali Wele aliio, lundi aelesianga kumuruuru bamuyimanga niye.

⁷ Lisuubila nilio liliakhola Noa aaulila likaambila lia Wele khuloondekhana ne bibiindu bie chindaalo chichiicha nibio abeele akhanyala abona tawe. Aulila Wele mala ombakha emeli niyo niye nende be enju yewe baonelamo. Khwako, sibala siakhalakilwa, mala Noa anyoola buluungi bureerwangwa khukhwama khu Wele sikila lisuubila.

⁸ Lisuubila nilio liliakhola Aburahamu aulila ka Wele nga Wele amulaanga ache mu sibala nisio Wele omwene aaba ne amusuubisie niye ali akhamuelesie. Arura mu sibala siewe nakhamanyile niio aba ne alikho acha tawe.

⁹ Khulwe lisuubila amenya nga omukeni mu sibala nisio Wele aaba ne amusuubisie. Amenyanga mu maeema, bulayi bwene nga Isaaka ne Yakobo ne bamenyanga, ba baaba ne lisuubisia lilala ne Aburahamu.

¹⁰Sikila Aburahamu alindiililanga lukoba luuli ne kimisiingi nikio Wele omwene aang'oona ne khu khwombakha

¹¹ Lisuubila nilio liliakhola Sara anyoola bunyali bwe khuba ne nda, akhaba kimiiko kiewe ne kiaba ne kibirire, sikila amanya ali Wele omusuubisie ali omusuubilwa.

¹² Akhaba Aburahamu ne aaba nga wafwa khale, khukhwama khu mundu mulala yuno babaandu basaalwa bakali nga ching'enieesi che mwikulu, bakali nga kumuyekhe kwe khu sikiingi sie nyanja, kukhabalikha tawe.

¹³ Babaandu bano boosi bafwila mwisuubila. Se banyoola bibiindu nibio Wele asuubisia tawe, ne kakhali babibonela ataayi mala babiakaanila, mala bafukiilila abuwaanga bali baba bakeni lundi baakwa mu sibala.

¹⁴Babaandu balomanga kamakhuwa nga ako, babechanga khwasie busa bali balikho bayiima sibala siabwe babeene.

¹⁵Abanga bali bachiililila khukhwibaasia sibala nisio baba ne baruriremo, andi bakhola bario, baba ne bubweyaangu bwe khukobolayo.

¹⁶Ne kakhali, nisio benyanga sili sibala silayi, sibala sie mwikulu. Khwako Wele se aba ne chisoni khulwa nibo khumulaangwa Wele wabwe tawe, sikila aabarekekheere nibo lukoba luboofu.

¹⁷ Lisuubila nilio liliakhola Aburahamu arusia omwana wewe Isaaka nga embosio Wele nga ne ara Aburahamu khwikela. Wele aaba asuubisie Aburahamu, ne kakhali Aburahamu aaba erekeekhe khurusia omwana wewe omuteelwa nga embosio.

¹⁸ Omwana niye abeele Wele aamuboleele ali, “Khubirira khu Isaaka, ewe okhanyoole lisaaye nilio nakhusuubisia.”

¹⁹Aburahamu amanya ali Wele anyala khulamusia Isaaka khukhwama mu lifwa, ne Aburahamu ng'ali akoboselwa Isaaka khukhwama mu lifwa.

²⁰ Lisuubila nilio liliakhola Isaaka asuubisia Yakobo ne Esau ali akhababiite chikhabi khulwe chindaalo chichiicha.

²¹ Lisuubila nilio liliakhola Yakobo ne ali siimbi khufwa abiita chikhabi buli mulala khu baana ba Yosefu ne etiilile khu siimbo yewe mu khusaaya Wele.

²² Lisuubila nilio liliakhola Yosefu, ne ali siimbi khufwa, alomaloma khuloondekhana ne khurura khwe Baisiraeli mu Misiri, ne khutanyilila khu sikhoyeele sikholwe khu bikuumba biewe.

²³ Lisuubila nilio liliakhola basaasi ba Musa bamukisa khu mieesi kitaru nasaaliilwe. Babona bali aaba omwana omulayi, mala khuria khufunaka lilaka lio Mwami tawe.

²⁴ Lisuubila nilio liliakhola Musa, ne akhulile, aloba khulaangwa omwana owo mukhaana owo mwami.

²⁵Arobora khu khuupisibwa siibi alala ne babaandu ba Wele khukhila khusangaala mu bwoni khu siise sitiiti.

²⁶Akhebulila ali khukhomwa sikila Kristo oliicha khwaba khwe bukhala bukali khukhila kamabiikhilo ke buiinda koosi ke mu Misiri, sikila aaba ne lilieyikina lie kumuruuru kuliicha ekhumaliilikha.

²⁷ Lisuubila nilio liliakhola Musa arura mu Misiri nakharia lirima lio mwami tawe. Aaloba khukobola enyuma nga oboone Wele okhabonekha tawe.

²⁸ Lisuubila nilio liliamukhola arao Epasaka mala alaka kamalasile kaanywe khu miliango nio, malaika owe lifwa akheera babaana be siseecha babele be Baisiraeli tawe.

²⁹ Lisuubila nilio liliakhola Baisiraeli banyala khukhwambukha Enyanja eya Shamu oli babirira niio kameechi kakhaba tawe, ne ba Misiri nabo nga bakhaka khukhola bario kameechi kabamila.

³⁰ Lisuubila nilio liliakhola kamasiisi ka Yeriko katechukha Baisiraeli nga bamala khukeenda ne bakabotookhelela khu ndaalo saba.

³¹ Lisuubila nilio lilialiinda omueeyi Rahabu khwirwa alala ne nabo babalekelesia Wele tawe, sikila akaanila bayooti Baisiraeli mu busaale.

³² Khoyeele njililile ku? Se biliio biise bibiolaana khwise nio nyale khulomaloma khu Gidioni, Baraka, Samusoni, Yefusa, Daudi, Samweli ne bang'oosi tawe.

³³ Khubirira mwisuubila bapanianga bibala bioosi mala babiula. Bakholanga kamaluungi mala banyoola nisio Wele asuubisia khubaelesia. Bafuunikha kiminwa kie chitalang'i,

³⁴ basimia kimililo kimirafu, baona khukhwirwa ne mbalu. Baba batekhele, ne kakhali baaba be kamaani; baba barafu mwiie mala baula banamae be basiku.

³⁵ Khubirira mwisuubila bakhasi babona balebe babwe ba baaba ne bafwiile balamusibwa. Babaandi, nga baloba khufukiilila bulekhuule, bafwiila mu khupisibwa siibi, nio bolaane khulamusibwa mu bulamu bulayi khukhilakhoo.

³⁶ Balala bakhomwa ne khu khuupwa biboko, ne babaandi babowa ne kiminyololo mala barebwa mu siboe.

³⁷ Bapwa kamabaale, bakhalwamo abili ne kumusiameno, berwa ne mbalu. Bakeendelanga kamasieelo ke kamakheese ne chimbusi. Baba bataambi, bapisibwa siibi ne khukuulumisibwa.

³⁸Bulayi bwe sibala se bwaba siindu khu nibo tawe! Bayiiyayiiyanga nga baakwa mu biangalaamwe ne mu bikulu, bamenyanga mu mabina ne mu maloo.

³⁹Bano boosi babonekha khuba banyindaafu khulwe lisuubila liabwe! Ne kakhaba kario se banyoola nisio Wele asuubisia khubaelesia,

⁴⁰sikila yaba Wele aakhurekekhera efwe kamalayi lukali. Sifuno siewe siaba bali nibo bolaane khuba babechufu ne bali nafwe.