Read lubukusu Baeb. 12 Bible Online

Baeb. 12 - lubukusu bible

Baeb. 12

¹Khwako sikila khuli ne baloli bakali bari, khe khulekhe buli siindu sikhukhiingililanga, ne bubwoni bubwakhutiila tatatatata, mala khutime chimbilo chili ebweeni wefwe ne liliekhaliilikha.

²Lekha khure chimoni chefwe khu Yesu, orakikhanga ne khutabusia lisuubila liefwe. Kumusalaba se kwakila aafwa kumwoyo tawe! Ne kakhali, sikila ekhoyo niyo aaba ne alikho acha khunyoola, se abonakho sisiindu simuambia chisoni mu khufwila khu musalaba tawe, ne luno ekhaale alubeka luseecha lwe ndebe eye bubwami eya Wele.

³Yibaasia khu niko abiriramo, nga efwiilisia mu khubiilwa ne babooni! Khwako mukhafukiilila khufwa kimiooyo tawe.

⁴Sikila mukhukhaka khwenywe khuloba bubwoni, se mwapaane ne bubwoni khukhwola khukhwiirwa tawe.

⁵ Mwebiliile kamakhuwa ke khumutinyilisia enywe niko Wele aamuboolela nga babaana bewe? “Mwana wase, rekeeresia Omwami, ne akhukololosia, ne okhafwa kumwoyo, nga ne akhurafwira tawe.

⁶Sikila Omwami akololosianga buli mundu niye asiima, lundi aukuumanga buli mundu niye abukula khuba omwana wewe.”

⁷Yekhaliilikhila buchuuni nibwo mubiriramo nga siiukuumo khukhwama khu paapa wenywe; khuchuunisibwa khwenywe khwekesia khuli Wele alikho amukholela enywe nga babaana bewe. Omwana yesi yesi abakhoo niye raraawe akhaukuumanga tawe ku?

⁸Ne kaaba bali se muukuumwa nga babaana bewe tawe, liekesia lili aba se muli babaana bewe bang'ali tawe; ne kakhali babaana be yasiimba.

⁹Ne bapaapa befwe be mu sibala bakhuukuumanga efwe mala khwabaria. Nono, aba khweaana khuriena khu Paapa owe kimiooyo kiefwe mala khumenye!

¹⁰Bapaapa befwe be mu sibala bakhuukuumanga efwe khu siise sitiiti, khuloondekhana nga balibona khuba lie buluungi, ne kakhali Wele akhukholelanga ario khulwe nganga yefwe fwabeene, nio wakana khusaange mu butakatifu bwewe.

¹¹Ne khuukuumwa, khubonekhananga siise esio khuba sisiindu sie khu khukhuchuunia efwe kimiooyo, se sili sie khu khusangaasia tawe. Ne kakhali enyuma wako, abo baluungisibwa ne siiukuumo nga esio sirio banyoola kumuruuru kwe bulamu bwe buluungi.

¹² Nono, suta mu ngaaki kamakhono kenywe kaluiliile, mala muandalasie kamasikamo kenywe kalikho ne kanikina!

¹³ Chiililila khukeenda khu ngila chingololofu, nio mbo sikhandakilo sisialemala sikhaba sileme tawe, ne kakhali sione.

¹⁴Khaka khuba mu muleembe na buli mundu, mala mukhake khumenya limenya litakatifu, sikila se aliio na mulala okhabone Omwami ne akhali omutakatifu tawe.

¹⁵ Mwelinde mukhakhola murio mwaukha khukhwama khu mwalaalo kwa Wele tawe. Mukhalekha omundu yesi yesi aaba nga simelwa silulu sichoanga mala sireera butinyu bukali ne buchiba bwasio khu biindi tawe.

¹⁶ Mukhalekha yesi yesi aaba ne sifwaabi namwe aaba okhali owa roho nga Esau, owakusia kumukabwa kwewe nga omwana omubele khulwe siakhulia silala siong'ene tawe.

¹⁷ Ekhumaliilikha, mu manyile muli enya anyoole chikhabi cha raraawe; mala khunyoola tawe, sikila raraawe se aaba ne ngila yosi yosi eye khukaluukhasia nisio aaba ne akholile tawe, akhaba ne achiyiima ne alila.

¹⁸ Enywe se mwechile khu sikulu sia Sinai siili ne kumulilo, sisiilima, khukhwinamila, embembeesi, khukhupa khwe khoombi ne khuuliilikha khwe kumumilo nisio munyala mwatiilakho nga babaandu ba Isiraeli tawe. Nga babaandu baulila kumumilo, bekoonjelela bali bakhaulilakho likhuwa liliindi tawe,

²⁰ sikila abeele se banyala benyala mwilaka lilialoma lili, “Akhaba esaang'i ne yetiila khu sikulu, khukhwola yipwe kamabaale efwe.”

²¹ Kakabonekha kaba kariisia lukali nio Musa aloma ali, “Nariire ne khuterema!”

²²Ne kakhali, mwechile khu Sikulu sia Sayuni lundi mu lukoba lwa Wele omenyile mindali, Yerusalemu lwe mwikulu, ne ba Malaika balwo chielefu bali ne khoyo.

²³Mwechile mu libuusiana lie babaana babele ba Wele, nibo kamasina kabwe kaandikwa mwikulu. Mwechile khu Wele, oli omukhalaki owe babaandu boosi; ne khu roho che babaandu balayi babakholwa khuba babechufu.

²⁴ Mwechile khu Yesu ooli owe akari we babaandu ne Wele mu ndakaano embia, lundi mwechile khu mafuki kakachichukha kasuubisia bibiindu bilayi lukali khukhila kamafuki ka Apili

²⁵ Nono, lola bulayi mukhakhola murio mwaloba khuulila oyo olomaloma tawe. Abo babaloba khuulila oyo owalomanga burume bwa Wele khu sibala se beebacha tawe. Nono, efwe khukhebache khuriena, kaaba bali se khuulila oyo olomalomanga khukhwama mwikulu tawe!

²⁶ Kumumilo kwewe kwasisiikha sibala siise esio, ne kakhali luno asuubisie ali, “Khasisiikhe lundi sibala ne likulu liosi.”

²⁷Likhuwa “Lundi” liekesia abuwaanga lili bibiindu bibiabuumbwa bioosi bikhasisiikhwe birusibweo nio bikhanyala biasisiikhwa birameo.

²⁸Nono, lekha khuupe orio, sikila khwanyoola bubwami bukhanyala bwasisiikhwa tawe. Lekha khuupe orio mala khusaaye Wele mu ngila emusiimisia niye, mu khweboombia ne mu buri bukali,

²⁹ sikila Wele wefwe ng'ali ali kumulilo kubunia.