Read lubukusu Baeb. 13 Bible Online

Baeb. 13 - lubukusu bible

Baeb. 13

¹Chiililila khusiimana nga wandaaye ne wandaaye.

² Mukhalekha khukhwakaanila bakeni mu chingo chenywe tawe. Balala baliio babakhola bario mala bakaanila bamalaika ne bakhamanyile tawe.

³Khebulila abo bali mu siboe, oli muli mu siboe ne abo. Khebulila balikho baapwa siibi oli enywe ne mulikho mupwa siibi nabo.

⁴Limenya lie khureerana likhoyeele linyoole lukoosi khukhwama khu baandu boosi, ne khukhwola busuubilifu bube akari wo museecha no mukhasi. Wele akhakhalakile be sifwaabi nende abo bakhola bueeyani.

⁵ Limenya lienywe likhaba lie khusiima chirupia tawe, khemunyalikhe nende nibio muli nabio, sikila Wele aloma ali, “Se ndimulekha namwe mwanjukhe enywe tawe.”

⁶ Khwako nono efwe khunyala khuloma ne bunyindaafu khuli, “Omwami ali omuyeeti wase, se ndaria tawe. Omundu onyala akhola siina khwise?”

⁷Khebulila ba baaba babemeelesi benywe, babamuboolela enywe burume bwa Wele. Yibaasia nga bamenyanga limenya liabwe, mala muloonde lisuubila liabwe.

⁸Yesu Kristo ali busa omwene no mwene likolooba, luno nende buli lwosi.

⁹Mukhalekha kamekisio kamakeni kosi kamurusia enywe khu ngila enuungi tawe. Buli bulayi khunyoola kamaani ke mukari khukhwama khu mwalaalo kwa Wele, ne se khuli khulwe khuria kamalaka kaloondekhana ne biakhulia tawe; abo babaria kamalaka kano se bayeetwakho nako tawe.

¹⁰Basaayi bakhalabananga abuundu niio Bayaudi basaayilanga Wele se bali ne bunyali bwosi bwosi khuliakho sie mbosio siosi siosi khu alutare yefwe endakatifu tawe.

¹¹ Omusaayi Omukhulu Lukali, areranga kamalasile ke bibiaayo Abuundu Atakatifu Lukali khukaana nga embosio khulwe bubwoni; ne kakhali bibiaayo bibieene biosebwanga enje we lukoba.

¹²Khulwe sifuno sino Yesu yesi aafwiila enje we lukoba, nio akwalaasie babaandu khukhwama mu bwoni khu mafuki kewe omwene.

¹³Lekha nono, khuche niio ali enje we lukoba, mala khusaange mu soni chewe.

¹⁴Sikila lukoba lwa mindali khwifwe se luli khu sibala khuno tawe, khulikho khuyiima lukoba lulikho ne lwicha.

¹⁵Nono, lekha efwe biise bioosi, khuanenge efuma khu Wele, nga embosio yefwe khubirira mu Yesu, siaanwa sie kiminwa kimwiyamanga niye nga Omwami.

¹⁶Mukhebilila khukhola kamalayi ne khuyeetana tawe, sikila biaanwa nga bino bisiimisia Wele.

¹⁷Ria babemeelesi benywe mala muloonde kamalaka kabwe. Baliindanga kimiooyo kienywe nandakhaola, sikila khukhwola benoosiele Wele ke bukhalabani bwabwe. Mwaba ne mu baria balakhola kimilimo kiabwe mu busangaafu, ne kalekha khuba kario tawe, balakikhola ne basulunye, mala ako se kaba ne buyeeti khwinywe tawe.

¹⁸Chiililila khu khusabila efwe. Khuli na ng'ali khuli, khuli ne liba lie mumebaasio lilayi, sikila khwenya khukhole kamaluungi biise bioosi.

¹⁹Lundi mwikoonjelela enywe mu busuubilifu ndi musabe muli Wele angobosie mwinywe khangu.

²⁰Nono lekha Wele owe kumuleembe owalamusia Omwami wefwe Yesu khukhwama mu lifwa, ooli Omwaayi omukali owe kamakheese. Khuloondekhana ne lifwa liewe nga embosio eye ndakaano eya mindali,

²¹amuelesie enywe buli siindu silayi nisio mwenya nio mukhole lilienya liewe, khubirira mu Yesu Kristo. Luyali lube khu Yesu khu niye mindali na mindali! Amina.

²²Bawandaayase, ese mwikoonjelela enywe, murekeeresie mu khwifwiilisia burume bwe khumuraamo kimiooyo buno; sikila ebarwa niyo ese muandikile yino seli endeeyi lukali tawe.

²³Nenya mumanye muli wandaayefwe Timoteo alekhuulibwe khukhwama mu siboe. Aaba ne aleecha khangu, aba khabe naye nga khamukeniie enywe.

²⁴Elesia kimileembe kiefwe babemeelesi benywe boosi ne babaandu ba Wele boosi. Bawandaayefwe khukhwama Italia bamurumiire enywe kimileembe kiabwe.

²⁵Kumwalaalo kwa Wele kukhoya kube nanywe mweesi.