Read lubukusu Baeb. 2 Bible Online

Baeb. 2 - lubukusu bible

Baeb. 2

¹Khwako khukhwola khuloonde lukali bung'ali nibwo khwaulila, nio khukhatiima khwabururakho tawe.

²Bamalaika baelesia bakuuka befwe burume bubwekesibwa khuuba bwa ng'ali, yesi yesi okhabuloonda namwe aaburia tawe, aanyoola siiukuumo nisio akhoyelwa anyoole.

³Nono aba efwe khukhebache khuriena khwaba ne khulekeelesia buonia bukali nga buno buri? Omwami omwene mu khurakikha aaboola buonia buno, mala abo babamuulila niye bakhwekesia efwe bali buli bwa ng'ali.

⁴Siise sienesio Wele aatasa buloli bwewe khu buonia obwo khubirira mu khukhola bimanyisio, kamakhuwa ke khuukia, kamayia ne khuaana biaanwa bia Roho Omutakatifu khuloondekhana ne lilienya liewe.

⁵Wele se aaraao bamalaika khuuba babaami be sibala siiya silibao nisio khulalomalomangakho tawe,

⁶ ne kakhali, nga ne kaboolwanga abuundu aandi mu maandiko kali: “Omundu ali siina, khwiwe, nio ewe omwibaasie, omundu busa nga ali ario nio ewe omuliinde?

⁷Ewe wamukhola niye aba omutiitikho khu bamalaika, “Ewe wamuelesia bunyali bukali ne luyali ne lukoosi khukhwama khwiwe.

⁸“Wareere bibiindu bioosi aasi we bikele biewe.” Mu khura bibiindu bioosi aasi we bikele biewe, se aalekhakho siindu siosi siosi anje we bubwimeelesi bwewe tawe. Ne nga ne kali, se khubona bibiindu bioosi ne bili aasi wewe luno tawe

⁹Ne kakhali khubona Yesu, niye khu siise sikeekhe akholwa aaba aasi khukhila bamalaika nio khubiriirira mu mwalaalo kwa Wele olaane khufwila buli sia mulala. Khumubona niye luno aafwarirwe ekuutwa eye luyali ne lukoosi khulwe lifwa nilio aafwa.

¹⁰Mu khureera babaana bakali basaange mu luyali, liaba busa bulayi mbo Wele obuumbanga ne khuliinda biindu bioosi, akhoya akhole omurangirisi we buonia bwabwe abe omwichufu khubirira mu sinyaasio.

¹¹Akwalaasianga babaandu khukhwama mu bwoni bwabwe, mala niye alala nende abo boosi babakholwa bakwalaafu bali ne Paapa mulala oyo. Ako niko kakila Yesu nakhaambwa chisoni khubalanga ali bawandaaye tawe.

¹² Aboolelanga Wele ali, “Ndaboolela bawandaayase niko wakholile; “Khakhufumie ewe mu siikhasio siabwe.”

¹³ Lundi alomanga ali, “Ese khare lilieyikina liase mu Wele.” Ne lundi alomanga ali, “Ese ndi ano ne babaana nibo Wele ambelesie.”

¹⁴Sikila babaana, nga abalaanganga bali babaandu be kumubili ne kamafuki, Yesu omwene ekela nga nibo mala asaanga mu liba liabwe lio mundu. Akhola ario nio khubirira mu lifwa liewe abunie Sietani, oli ne bunyali khu lifwa,

¹⁵khwako mu ngila yino alekhuule abo ba baaba nasioobi mu bulamu bwabwe bwoosi khulwe khuria lifwa.

¹⁶Sikila kali abuwaanga bali se bali malaika nibo ayeetanga tawe. Ne kakhali, nga liiandiko liboola lili, “Ayeetanga be lisaaye lia Aburahamu.”

¹⁷Lino liekesia lili abe nga bawandaaye mu ngila choosi, nio abe Omusaayi wabwe Omukhulu Lukali Omukhulu Omusuubilwa lundi owe siisa mukhukhalabanila Wele, nio bubwoni bwe babaandu bwoole khubeelwa.

¹⁸Nono anyala aayeeta abo baali mu makhako, sikila niye omwene apisibwa siibi mu khukhakwa.