Read lubukusu Baeb. 3 Bible Online

Baeb. 3 - lubukusu bible

Baeb. 3

¹Bawandaayase bakristo, lundi nibo Wele alaanga! Yibaasia khu Yesu, niye Wele aruma khuuba Omusaayi Omukhulu Lukali owe lisuubila nilio khwiyama.

² Aaba omusuubilwa khu Wele, owamurobora khukhola kimilimo kino, bulayi bwene nga Musa ne aba omusuubilwa mu milimo kiewe munju eya Wele.

³Omundu owombakha enju anyoolanga lukoosi lukali khukhila enju eng'ene. Mu ngila ng'eneyo Yesu akhoya abe ne lukoosi lukali khukhila Musa.

⁴Buli enju, kakhaba kario, yombakhangwa no mundu, mala Wele niye owombakha bibiindu bioosi.

⁵Musa aba omusuubilwa munju eya Wele nga omukholi, mala alomaloma khuloondekhana ne bibiindu nibio Wele akhalome mu ndaalo chichiicha.

⁶Ne kakhali Kristo ali omusuubilwa nga omwana weseecha mu bwimeelesi bwenju eya Wele. Efwe khuli enju yewe ne khuchiililila khuba ne bunyindaafu ne lisuubila mu nibio khwiyikina.

⁷ Khwako, nga Roho Omutakatifu alomanga ali, “Ne muulila kumumilo kwa Wele luno,

⁸mukhaba ne sileka, nga bakuuka benywe ne baba tawe, nga ne bariina khu Wele, khu ndaalo niyo baba bamukhaka mu siangalaamwe

⁹ebweeneyo bararaawenywe bakhaka ese, akhaba ne babona nibio nakhola khu miko kamakhumi kane.

¹⁰Khwako naba ne lirima khu baandu abo mala naloma ndi, ‘Bakholanga sileka buli lwoosi lundi baloba khuloonda kamalaka kase.’

¹¹Naba ne lirima mala nechuba ndi: ‘Se balingila abuundu niio andi khabaelesie khuolelao tawe!’ ”

¹²Basuubili basiaase, lola bulayi, yesi yesi mwinywe akhaba owe kumwoyo kuli kumubi lukali lundi kukhasuubila tawe, akhola ario alekha khusuubila Wele omenyile mindali.

¹³Ne kakhali, nio yesi yesi khwinywe alekhe khuombelesibwa ne bubwoni mala abe ne sileka tawe, mukhoya muchuubane buli ndaalo, nga likhuwa “Luno” mu maandiko lichiililila khuboola khwifwe.

¹⁴Sikila efwe khuli basaangi ne Kristo, khwaba ne khwiandalasia khukhwola ematabusia mu lieyikina nilio khwaba nalio ekhurakikha.

¹⁵ Kamaandiko kaboola kali, “Ne muulila kumumilo kwa Wele luno, mukhaba ne sileka nga bakuuka benywe ne baba nga nilwo bariina khukhwama khu Wele tawe.”

¹⁶ Baandu siina babaulila kumumilo kwa Wele mala bariina khukhwama khu niye? Abo boosi babarangirirwa ne Musa khurura mu Misiri.

¹⁷Naanu nibo Wele aakhalalila khu miiko kamakhumi kane? Aakhalalila babaandu babakhola bubwoni bafwila mu siangalaamwe.

¹⁸Nga Wele ne echuba ali, “Se balingila mu sibala nimwo andi khabaelesie khuolelamo tawe.” Aba alikho alomaloma khuloondekhana ne naanu? Khuloondekhana nende abo babariina.

¹⁹Nono, khubona, khuli se banyala khukhwingila mu sibala esio tawe, sikila se basuubila tawe.