Read lubukusu Baeb. 4 Bible Online

Baeb. 4 - lubukusu bible

Baeb. 4

¹Nono, Wele aakhusuubisie efwe ali nio khwole khunyoola siuluukho nisio aalomalomakho. Lekha khulole bulayi nono, yesi yesi khwinywe akhakhilwa khukhwingila mu siuluukho sisialakwa esio tawe.

²Sikila efwe khwaulila Elomo Endayi nga nibo. Baulila burume ne se bwabayeeta tawe, sikila nga baulila, se batubania burume obwo ne lisuubila tawe.

³ Khwako, efwe khusuubila, khunyoola siuluukho nisio Wele asuubisia esio. Kali busa nga ne aaboola ali, “Naba ne lirima mala nechuba ndi: ‘Se balingila mu sibala nimwo andi khabaelesie khuolelamo tawe!’ ” Aloma ario akhaba abeele ne amala kimilimo khukhwama siise nisio abaang'anilamo sibala.

⁴ Sikila abuundu aliio mu maandiko niio kano kaboolwa khuloondekhana ne ndaalo eya saba: “Wele aauluukha khu ndaalo eya saba khukhwama khu milimo kiewe kioosi”.

⁵ Likhuwa lino liliene lundi lilomwa lili: “Se balingila mu sibala nisio nenya khubaelesia baolelemo tawe.”

⁶Abo babanyoa baulila Elomo Endayi se banyoola siuluukho esio tawe, sikila se basuubila tawe. Nono, babaandi baliio babafukiililwa khunyoola siiuluukho esio.

⁷ Lino liekesiebwanga abuwaanga mbo Wele araao endaalo ekiindi, elaangwa “Luno.” Enyuma we kimiiko kimikali Wele alomaloma khu ndaalo eyo khubirira mu Daudi mwiandiko liliararwakho khale lili: “Ne mwaba ne muulila kumumilo kwa Wele luno, mukhaba bamiinyi tawe.”

⁸ Abanga Yoshua niye owaana siuluukho nisio Wele asuubisia babaandu andi Wele se akelao aalomaloma khuloondekhana ne ndaalo ekiindi tawe.

⁹Kakhaba kario siuluukho sisiliio khu baandu ba Wele nga siuluukho sia Wele khu ndaalo eya saba.

¹⁰ Sikila yesi yesi onyoola siuluukho nisio Wele aasuubisia esio, auluukha khukhwama khu milimo kiewe omwene, bulayi bwene busa nga Wele ne aaola khukhwama khu kiewe.

¹¹Nono, lekha khukhake nga ne khunyala khunyoole siuluukho esio, nio yesi yesi khwifwe akhakhilwa nga nibo ne bakhilwa sikila khutaamba lisuubila khwabwe tawe.

¹²Elomo eya Wele eli enamu lundi eli ne kamaani, eli enjoki khukhila embalu yosi yosi eye bubwoki chimbeka chombi. Ekhalakanga khukhwola niio kumwoyo ne roho biakaananila. Niio bubwongelo ne kamafura ke mu bikuumba biakaananilanga. Ekhalakilanga liliekoomba ne kamebaasio ke kumwoyo kwo mundu.

¹³Se siliio sinyala siakisibwa khukhwama khu Wele tawe; buli sisiindu mu bibuumbe bioosi sibonekha lundi sieyanikhila busa ebweeni wewe. Ne khukhwola, efwe fweesi khumuboolele niye ke bikholwa biefwe bioosi.

¹⁴Nono, lekha efwe, khutiilile elala lisuubila nilio khwiyamanga. Sikila khuli no Omusaayi Omukhulu Lukali owingiile mu luyali lwa Wele, Yesu Kristo, Omwana owa Wele.

¹⁵Omusaayi wefwe Omukhulu se ali onyala aloba khukhukholela efwe siisa khulwe butekhele bwefwe tawe. Ne kakhali, khuli no Omusaayi Omukhulu Lukali owakhakwa buli mu ngila nga nicho efwe khulikho khukhakilwamo, ne kakhali se akholakho bubwoni tawe.

¹⁶Nono, lekha khube banyindaafu, mala khwisende siimbi ne ndebe eya Wele eye bubwami, niio kumwalaalo kuli. Ebweeneyo khulikholelwayo siisa mala khunyooleyo kumwalaalo mu biise nibio khukwenya.