Read lubukusu Baeb. 5 Bible Online

Baeb. 5 - lubukusu bible

Baeb. 5

¹Buli Omusaayi Omukhulu Lukali aroborwanga khukhwama mu baandu basie mala akhalabanila Wele mu bwangu bwabwe, khuaana embosio ne biaanwa khulwe bubwoni.

²Sikila niye omwene ali omutekhele mu ngila chingali, anyala khuba omuolu khwaabo bakhamanyile siindu tawe lundi bakhola kamakhiikha.

³ Ne sikila niye omwene ali omutekhele, khukhwola aane embosio ne se khuli khulwe bubwoni bwe babaandu busa tawe ne kakhali akhaba khulwe bubwoni bwewe omwene.

⁴ Se aliio owiroboreranga omwene lukoosi lwe khuba Omusaayi Omukhulu Lukali tawe. Lili busa khubirira mu mulaango kwa Wele, nio omundu abe Omusaayi Omukhulu Lukali, bulayi bwene nga Aruni ne aaba.

⁵ Mu ngila ne ng'ene, Kristo se ebukulila lukoosi lwe khuba Omusaayi Omukhulu Lukali tawe. Ne kakhali, Wele amuboolela ali, “Ewe oli Omwana wase, luno nabeele Paapa wowo.”

⁶ Lundi aloma abuundu aandi ali, “Oliba Omusaayi buli lwosi, bulayi bwene nga Melikisedeki.”

⁷ Mu bulamu bwewe khu sibala Yesu asabanga Wele mu khulila khukali ne kamasika, Wele owaba nanyala khumuonia niye khukhwama mu lifwa. Sikila khukhwiboombia ne khukhwirusia khwewe, Wele aamuulila.

⁸Ne kakhali akhaba ne aba Omwana owa Wele, eeyika khuba omuriani khubirira mu khupisibwa siibi.

⁹Nga akholwa omwichufu, ekela lirakikha lie buonia bwe mwikulu khwaabo boosi bamuria niye,

¹⁰mala Wele amura niye khuba Omusaayi Omukhulu Lukali bulayi bwene nga Melikisedeki.

¹¹Kaliio kamakali niko khukhoyeele khuloma khuloondekhana ne likhuwa lino, ne kakhali lili litinyu khuliinoosia khwinywe, sikila muli kalaa lukali khumanya.

¹² Luno luri andi enywe muli babekisia, ne kakhali mu sienya omundu amwekisie enywe kamekisio ke khunyoa ke burume bwa Wele. Mwalekhile khulia biakhulia biaandalafu, mu siili busa khu mabeele.

¹³Yesi yesi osiinywa kamabeele asiili omwana, se amanyile sisiindu siosi siosi mumakhuwa ke buluungi namwe bubi tawe.

¹⁴Mu ngila ekiindi biakhulia biaandalafu bili bie babaandu bakhulu, khubirira mu khwenasia banyala khukhwabukhasia kamalayi ne kamabi.