Read lubukusu Baeb. 6 Bible Online

Baeb. 6 - lubukusu bible

Baeb. 6

¹Nono, lekha khuche ebweeni, mu mekisio kamaandalafu mala khwibilile kamekisio ke khunyoa ke burume bwe sikristo. Se khukhoyeele khwombakhe lundi kumusiingi kwe khumwekisia liliekanila ne khulekha bikholwa bireera lifwa, lisuubila mu Wele,

²khu ke khubatiisia ne khurakho kamakhono, ke khulamukha khwe bafu ne likhalakilwa lia mindali tawe.

³Lekha khuche ebweeni! Wele ne afukiilila, khukhakhole kano.

⁴Sikila abo babanjukha lisuubila liabwe banyala bakholwa bariena nio bekanila lundi? Babakho khale mu buwaanga bwa Wele, bachanjaama khu siaanwa sie mwikulu mala banyoola kumukabwa kwabwe kwa Roho Omutakatifu;

⁵bamanya khukhwama mu khunala bali elomo eya Wele eli endayi, mala baba bamanya bunyali bwe sisiiko sisiicha.

⁶Mala nono banjukha lisuubila liabwe! Se kanyalikhana khubakobosia mu khwikanila lundi tawe, sikila balikho babamba Omwana owa Wele lundi khu musalaba, ne khumuambia chisoni mu baandu.

⁷Wele abiitanga chikhabi liloba linywechanga kameechi ke efula elikwichangakho kamakhabi kamakali mala lichoyia bimelwa bili bie bukhala khwaabo babibiaalanga.

⁸ Ne kakhali liaba ne lichoyia kamawa ne nyonyi, aba se lilimo bukhala bwosi bwosi tawe; lili mu butinyu bwe khulaamwa ne Wele mala kumulilo kuliosie.

⁹Basaale basiime, khwakhaba ne khulomaloma khuri, khuli na suubi khwinywe. Khumanyile khuli muli ne chikhabi chindayi che buonia bwenywe.

¹⁰Wele ali omuluungi. Sakhebilile kimilimo nikio mwakhola namwe busiime nibwo mwekesia khu niye mu buyeeti nibwo mwaana, mala lundi musiaananga busa buyeeti chana obwo khu bakristo basienywe tawe.

¹¹Liliekoomba liefwe likali lili mbo buli mulala khwinywe achiililile khuba ne sinani nio bibiindu nibio mweyikina biole khuba ng'ali.

¹²Se khwenya enywe mube bakara tawe, ne kakhali khwenya mube nga abo basuubila lundi babefwiilisia, mala banyoola nisio Wele asuubisia.

¹³Nga Wele asuubisia Aburahamu, echuba khukhola niko asuubisia sikila se abao omukali okundi khumukhila niye tawe, echuba mwisina liewe liliene.

¹⁴ Aaloma ali, “Khusuubisia ndi khakhubiite chikhabi mala khuelesie lisaaye likali.”

¹⁵Aburahamu efwiilisia, khwako aanyoola, nisio Wele asuubisia.

¹⁶Omundu ne echuba, echuba mwisina lio mundu omukali khumukhila niye, ne khukhwechuba okhwo khumalanga kamayiingamo koosi.

¹⁷Khwaabo ba baaba ne bacha khunyoola nisio asuubisia, Wele enya khukhwekesia abuwaanga ali, salikaluukhasia sifuno siewe tawe; nio atasa khukhwechuba khu lisuubisia liewe.

¹⁸Nono, bibiindu bibili bino biliio, bikhanyala biakaluukhana tawe, ne khu nibio, Wele se anyala aabea tawe. Khwako efwe khukhwanyoolile bubwilukhilo mu niye khwarerwemo kumwoyo lukali khutiila elala lilieyikina lili ebweeni wefwe.

¹⁹ Khuli ne lilieyikina lino nga sichaangi khulwe bulamu bwefwe. Sili sie bubwilukhilo lundi sia ng'ali, lundi sibiriranga mu pasia eye Lukaangu lwe mwikulu ne sicha mu bwikhalo bwe mukari.

²⁰ Yesu arangira aacha mu bwene omwo mu bweyaangu bwefwe mala aabeele Omusaayi Omukhulu Lukali mindali na mindali, bulayi bwene nga Melikisedeki.