Read lubukusu Baeb. 7 Bible Online

Baeb. 7 - lubukusu bible

Baeb. 7

¹ Melikisedeki yuno aaba omwami owa Salemu lundi omusaayi owa Wele owe Angaaki Lukali. Nga Aburahamu aba ne akobole khukhwama mwiie nimwo aula babaami bane, Melikisedeki amwakaanila ne khumubiita niye chikhabi,

²mala Aburahamu amuelesia silala khwi khumi khu bioosi nibio aba ne abukule. (Sifuno sie khunyoa sie lisina Melikisedeki sili, “Omwami owe buluungi” ne sikila aaba omwami owa Salemu, lisina liewe lundi liboola lili “Omwami owe kumuleembe.”)

³Se ali ne raraawe namwe maawe namwe sikuuka tawe. Liiandiko lie khusaalwa khwewe namwe lie lifwa liewe se lilikhoo tawe. Ali nga Omwana owa Wele, aliba omusaayi mindali na mindali.

⁴Mwaboone nono nga ne aaba Omukali. Aburahamu, kuuka wefwe omanyikhaane, amuelesia silala khwi khumi khu bioosi nibio anyoola mwiie.

⁵ Ne be lisaaye lia Lawi bali basaayi ba balakwa ne Lilaka khubukula silala khwi khumi khukhwama khu baandu ba Isiraeli bali be mu sibala siabwe sisiene, akhaba babaandu be mu sibala siabwe sisiene abo ne bali basaalwa khu Aburahamu.

⁶Melikisedeki se asaalwa khu Lawi tawe, ne kakhali abukula silala khwi khumi khukhwama khu Aburahamu mala abiita Aburahamu chikhabi, owaba ne lisuubisia lia Wele.

⁷Khuli na ng'ali khuli oyo obiita chikhabi ali omukali khukhila obiitwa tawe.

⁸Ne khuloondekhana ne basaayi, silala khwi khumi sibuusibwanga ne babaandu bafwa; ne khulwa Melikisedeki silala khwi khumi siabuusibwa ne noyo omenya, nga liiandiko lilomanga.

⁹Khwako, nga Aburahamu ne aruunga silala khwi khumi, Lawi, (niye lisaaye liewe liabuusianga silala khwi khumi,) yesi aruunga.

¹⁰Sikila abeele Lawi akhasaalwa tawe, ne kakhali aaba mu kukaawe Aburahamu nga Melikisedeki ne amwakaanana.

¹¹Lilaka liaebwa khu baandu ba Isiraeli khuloondekhana ne bubwisaayi bwe Balawi. Nono abanga bali bubwichufu bwanyoolekhana khubirira mu milimo kie basaayi be silawi, andi lilienya lio musaayi lukano luluundi se liabao tawe, oyo owilao khuloondekhana nga Melikisedeki ne aaba, okhali owa Aruni tawe.

¹²Sikila busaayi ne bukaluukhasibwa, likaluukhania likhoyeele khubao akhaba mwilaka.

¹³Ne Omwami wefwe, niye bibiindu bino biboolwakho, aaba owe kholo ekiindi busa, mala se aliio na mulala khu be kholo yewe owakhalabakho nga omusaayi tawe.

¹⁴Limanyikhaane bulayi bwene mbo Omwami wefwe asaalwa mu kholo eya Yuda, mala Musa se ararakho khu kholo eyo kamakhuwa ke busaayi tawe.

¹⁵Likhuwa lino libonekha bulayi nga omusaayi lukano luluundi ne abonekha, omusaayi oli nga Melikisedeki.

¹⁶Se aakholwa omusaayi, khulwe kamalaka ne lilienya lio mundu tawe, ne kakhali khubirira mu bunyali bwe bulamu bukhali ne sisiakamo tawe.

¹⁷ Sikila liiandiko liloma lili, “Oliba Omusaayi buli lwosi, bulayi bwene nga Melikisedeki.”

¹⁸Nono, lilaka likhale liarwa alubeka, sikila liaba litekhele lundi liaba likhalimo bukhala tawe.

¹⁹Sikila Lilaka lia Musa liaba selinyala khukhola sisiindu siosi siosi khuba sisichufu tawe. Ne luno lilieyikina lilayi khukhilakho liareerweo, nilio khubiriramo nio khuche siimbi ne Wele.

²⁰Lundi, khukhwichuba khwa Wele khuliio. Khukhwechuba khurio se khwabao nga babaandi ne bakholwa basaayi tawe.

²¹ Ne kakhali Yesu ekela omusaayi khubirira mu khwechuba khwa Wele ali, “Omwami echubile, ne se alakaluukhasia kamebaasio kewe tawe! ‘Ewe oli omusaayi buli lwosi.’ ”

²²Bubwabukhani buno nono, bwosi bukhola Yesu abe lisuubisia lie Ndakaano endayi khukhilakho.

²³Bubwabukhani bubuundi buliio. Basaayi babaandi abo baba bakali, sikila lifwa liabakhiingililanga khuchiililila ne kimilimo kiabwe kie busaayi.

²⁴Ne kakhali Yesu achiilililanga khumenya buli lwosi, ne kimilimo kiewe nga omusaayi se kiila khu mundu okundi tawe.

²⁵Khwako anyala khuonia abo babecha khu Wele khubirira mu niye luno nende biise bioosi, sikila amenyile buli lwosi khukhwekoonjelela Wele mu masaba sikila nibo.

²⁶Nono, Yesu ali Omusaayi Omukhulu Lukali okhuyeetanga efwe. Ali omutakatifu, se ali ne kamabi namwe bubwoni bwosi bwosi tawe. Aukhasiibwe khukhwama mu be bubwoni ne khuniinisibwa angaaki we likulu.

²⁷ Se ali nga basaayi bakhulu babaandi abo tawe; se enyekhana khuaana chimbosio buli ndaalo khulwe bubwoni bwewe nio arusie chichiindi khulwe bubwoni bwe babaandu babaandi tawe. Aana embosio ndala lulala lwong'ene, nga eerusia omwene.

²⁸Lilaka lia Musa liroboraanga babaandu busa khuba basaayi bakhulu; ne kakhali lisuubisia lia Wele liakholwa ne liliechuba, liliecha enyuma we Lilaka, lirobora Omwana owakholwa khuba omwichufu buli lwosi.