Read lubukusu Baeb. 8 Bible Online

Baeb. 8 - lubukusu bible

Baeb. 8

¹ Liboofu khu niko khuloma lili bali khuli no Omusaayi Omukhulu Lukali nga yuno ari, owikhalanga lubeka luseecha lwe ndebe eye bubwami eye luyali lukali mwikulu.

²Akhalabananga nga Omusaayi Omukhulu Lukali abuundu atakatifu lukali, niio, liiema lia ng'ali lili, likhombakhwa no mundu tawe ne kakhali liombakhwa no Mwami.

³Buli Omusaayi Omukhulu Lukali aroborwa khuaana biaanwa ne chimbosio khu Wele, khwako Omusaayi wefwe Omukhulu khukhwola yesi abe nende sie khuaana.

⁴Abanga bali aba khu sibala, andi se aaba omusaayi tawe, sikila basaayi balikho baana biaanwa bibienyekha ne Lilaka lie Bayaudi baliio.

⁵ Kimilimo nikio bakhola nga basaayi ng'ali kili busa nga sifwaanani ne sisiiniini sie bibiindu bie mwikulu. Kali busa nga ne kaba khu Musa. Nga aaba siimbi khukhwombakha liiema, Wele amuboolela ali, “Khola buli siindu khuloondekhana nga ne wekesebwa ne oli khu sikulu.”

⁶Ne kakhali luno, Yesu aeleseebwe kumulimo kwe busaayi kumuboofu khukhila kikiabwe, nga endakaano niyo aarao akari wa Wele ne babaandu bewe eli endayi lukali, sikila eli ne lisuubisia lie bibiindu bilayi lukali.

⁷Abanga sisiindu siibi se siabao mu ndakaano eye khunyoa tawe, andi eye khabili se yenyekha tawe.

⁸ Ne kakhali Wele abonanga kamabi mu baandu bewe ne aaloma ali, “Omwami aloma ali, chindaalo chilikho chiicha, nicho ese khakholelemo endakaano embia ne babaandu ba Isiraeli ne babaandu ba Yuda.

⁹Se ekhabe nga endakaano niyo nakhola ne bakuuka babwe, khu ndaalo niyo nabatiila kumukhono ne mbarusia e Misiri tawe. Se baba basuubilwa khu ndakaano niyo nakhola nabo tawe, khwako se nabarekeeresia tawe.

¹⁰Luno, Omwami aloma ali, yino niyo endakaano niyo khakhole ne babaandu ba Isiraeli mu ndaalo chichiicha. Khare kamalaka kase mu mebaasio kabwe mala nga aandike khu miooyo kiabwe. Ese khabe Wele wabwe, nabo bakhabe babaandu base.

¹¹Se aliio khu nibo okhekisie owasie owe mu sibala siewe namwe aboolele wandaaye ali, ‘Manya Omwami’ tawe. Boosi bakhamanye ese, khukhwama khu mukeekhe khukhwola khu mukali.

¹²Khababeele bubwoni bwabwe ne se khakhebulile kamabi kabwe tawe.”

¹³Nga Wele alomaloma khu ke ndakaano embia, aaba aakholile eye khunyoa khuuba ekhale. Ne buli siindu ne siba sikhale ne khukofula, aba sienya khuwao.