Read lubukusu Baeb. 9 Bible Online

Baeb. 9 - lubukusu bible

Baeb. 9

¹Endakaano eye khunyoa yaba ne kamalaka khulwe khusaaya lundi yaba ne abuundu niio babaandu bang'oona khulwe khusaayilao.

² Liiema liombakhwa, ne lusiro lwalio lwe bweeni lwalaangwa Abuundu Atakatifu we Butakatifu. Siteetwe sie khurakho etaa ne mesa eyabakho kumukaati kukwaanwa khu Wele biabamo.

³ Liiema lilialaangwa Abuundu Atakatifu Lukali liaba enyuma we pasia eya khabili.

⁴ Alutare eye sahabu eye khukhwoseliakho bupaani, alala ne Lisanduku lie Ndakaano nilio basaa esahabu, ne kumwendo kwe sahabu kukwabamo mana, ne siimbo eya Aruni eyaba ne sisiinekho kamasaafu, ne bipande bibili bie kamabaale bibiaandikwakho kamalaka biabaamo.

⁵ Bibuumbe bie chindaa bibiekesia khubao khwa Wele, biaba angaaki we Lisanduku lundi biabambula chindaa chabwe choola abuundu niio babeelangao baandu bubwoni. Ne kakhali luno se sili siise sie khukhwinoosia buli siindu mu bwichufu tawe.

⁶ Bibiindu ebio ne bimalile khurekekhwa birio, Basaayi bachichanga mwiiema lie nje buli ndaalo khukhola kimilimo kiabwe,

⁷ ne kakhali Omusaayi Omukhulu Lukali achichanga mwiiema lie mukari, ne akholanga ario lulala lwong'ene khu mwiiko. Aasutanga kamalasile niko aananga khu Wele khulwo mwene ne khulwe bubwoni nibwo babaandu bakhola ne bakhamanyile bali balikho bakhola bubwoni tawe.

⁸Roho Omutakatifu ekesianga abuwaanga khukhwama mu lirekekha lino lioosi ali, engila eye khucha Abuundu Atakatifu Lukali ekhekulwa tawe, khu siise sioosi liiema lie nje ne liliio.

⁹Sino sili simanyisio sisiekesia siise sia luno. Siekesia sili biaanwa ne chimbosio chaanwa khu Wele se chinyala chakhola kimiooyo kiaabo bamusaaya niye kiaba kimichufu tawe,

¹⁰sikila biianwa ebio bialoondekhananga ne khulia, khunywa ne kimisaango kie khukwalaasia kiong'ene. Kano koosi kali kamalaka ke nje busa, kaliio khukhwola siise nisio Wele aliraao lilaka liiya.

¹¹Ne kakhali Kristo eechile khale nga Omusaayi Omukhulu Lukali owe bibiindu bilayi bili ano khale. Liiema nilio akhalabanamo lili liboofu lundi lilichufu lukali; se lili liiema liliang'oonwa ne kamakhono ko mundu tawe, ne se lilikho ne sitonye sie sibala sisiabaang'anwa sino tawe.

¹²Nga Kristo abirira mu Liiema mala engila lulala lwong'ene Abuundu Atakatifu Lukali, se abukula kamalasile ke chimbusi ne chiuunwa khuaana nga embosio tawe; ne kakhali, abukula kamafuki kewe omwene mala akhunyoolela efwe buonia bwa mindali.

¹³Kamalasile ke chimbusi ne chiuunwa ne likokhe lie moosi yosiibwe biaanwangwa khulwe baandu ba baaba ne bakholile kimisilo, ne bino biabakwalaasianga khulwe khubarusiakho bubi obwo.

¹⁴Khubeela kano kali kang'ali, aba kamafuki ka Kristo kakhola bikali lukali! Khubirira mu Roho owa mindali, Kristo erusia omwene khu Wele nga embosio eye bubwichufu. Kamafuki kewe kakhukwalaasia efwe kamebaasio kefwe khukhwama mu miima kikhalimo bukhala tawe, nio khukhalabanile Wele omenyile mindali.

¹⁵Khulwe sifuno sino Kristo ali niye oreeranga endakaano embia, nio abo nibo Wele alaangile boole khunyoola chikhabi cha mindali nicho abasuubisia. Kano kanyala kekholekha sikila lifwa liielesianga babaandu bulekhuule khukhwama mu mabi niko bakhola khuloondekhana ne endakaano eye khunyoa.

¹⁶Omundu owalekha lilienya liewe ali baliloonde ne afwiile, afwichanga nio baliloonda.

¹⁷Lilienya elio se lili ne sifuno siosi siosi omundu owasuubisia omwene ne asiili mulamu tawe, likholanga kimilimo nafwiile.

¹⁸Esio nisio sikila endakaano eye khunyoa ne yechao khulwe khurumikhira kamalasile.

¹⁹ Ekhunyoa, Musa aaboolela babaandu kamalaka koosi nga ne karebwao mu Lilaka lia Musa. Nio abukula kamalasile ke chiuunwa ne chimbusi, akatubasia ne kameechi, mala aarumikhira sisiaangu ne bufuumbo bubesemu khukaanyaka khu sitabu sie Lilaka lia Musa ne khu baandu boosi.

²⁰Aloma ali, “Kano niko kamalasile ke endakaano niyo Wele amulakile enywe muloonde.”

²¹ Mu ngila ng'eneyo Musa aanyaka kamalasile khwiema lie Ndakaano ne khu biindu bioosi bibiarumikhirwanga mu lisaaya.

²² Ng'ali, khuloondekhana ne Lilaka, kamalasile kakwalaasianga embi buli siindu, ne kamalasile ne kakhachichukhe, khubeelwa khwe bubwoni se khuliio tawe.

²³Bibiindu nibio Musa aakhola ebio, bifwaanana nende bie mwikulu bibieene bikwalaasibwa birio. Ne kakhali bibiindu bie mwikulu bienyekha biielesibwe chimbosio chindayi lukali khukhila chino.

²⁴Sikila Kristo se acha Abuundu Atakatifu niio omundu aang'oona ali sifwaanane sie Abuundu ang'ali tawe. Acha mwikulu mu bweene, nimwo luno abonekhela ebweeni wa Wele mu bweyaangu bwefwe.

²⁵Omusaayi Omukhulu Lukali achichanga Abuundu Atakatifu Lukali buli mwiiko ne kamalasile ke sisiaayo. Ne kakhali Kristo se achao khukhwirusia omwene kamakhabi kamakali tawe,

²⁶busa aandi apisibwa siibi kamakhabi kamakali khukhwama nga sibala siabaang'anwa. Ne kakhali, luno nga biise bie chindaalo bioosi ne bimbiya sisiakamo, aabonekha lulala lwong'ene mala akama, khurusiao bubwoni khubirira mu khweana omwene nga embosio.

²⁷Buli mulala khukhwola afwe lulala, mala ne afwiile, Wele amukhalakile.

²⁸ Mu ngila ne ng'ene Kristo yesi aanwa nga embosio lulala lwong'ene khurusiao bubwoni bwe bakali. Se akhabonekhe lukhola khabili khu rusiao bubwoni tawe, ne kakhali akhabonekhe khuonia abo bamulindiliile niye.