Read lubukusu Yak. 1 Bible Online

Yak. 1 - lubukusu bible

Yak. 1

¹ Khukhwama khu Yakobo, omukholi owa Wele lundi owo Mwami wefwe Yesu Kristo. Kimileembe khu kholo ekhumi na chibili chichasalaanila mu bibala.

²Basaale, ne munyoola kamakhako ka buli lukano, kabukule khuba ekhoyo,

³sikila mu manyile muli lisuubila lienywe ne libirira mu makhako nga ako kario, ekhumaliilikha munyoola kamaani ke khukhwikhaliilikha.

⁴Lekha khukhwekhaliilikha khwenywe khumutinyilisie khukhwola ekhumaliilikha, nio mube babolaana lundi babechufu bakhatamba siindu tawe.

⁵Ne kakhali omundu yesi yesi khwinywe aaba nakhali ne limanya tawe, akhoya asabe Wele, oelesianga babaandu boosi mu buaani bukali ne kumwalaalo.

⁶Ne musaaya, mukhoya musuubile, mukhaba ne liaayaaya liosi liosi tawe. Yesi yesi oba ne liaayaaya ali nga siibuli ne siyilwa eyi neyi, ne khuungu khu nyanja.

⁷Omundu nga oyo ario, akhebasiakho ali anyala anyoola sisiindu siosi siosi khukhwama khu Mwami tawe.

⁸Ali ne liaayaaya ne se amanyile nisio akhoyeele akhole mu buli siindu tawe.

⁹Omukristo oli omutaambi akhoya asangaale Wele ne amuniinia,

¹⁰ ne omukristo omuiinda akhoya asangaale Wele ne amukhola khuba omutaambi sikila baiinda baliwao busa nga bimuli bie mundaa.

¹¹Enyanga esoanga ne lumemu mala yosia simelwa, khamuli khasio khakwa aasi, mala bulayi bwakho bwonakwa. Mu ngila ng'eneyo omuiinda akhaweo ne alikho achiililila khukhola kakeewe busa.

¹²Ali ne busangaafu oyo owikhaliilikha mu makhako, sikila ne abirire likela elio, akhanyoole ekutwa eye bulamu nibwo Wele asuubisia ali alielesia abo ba bamusiima niye.

¹³Ne khukelwa mu makhako kario, khukhaloma khuli, “Likhako lino liamile khu Wele tawe.” Sikila Wele sanyala khukhakwa ne kamabi tawe, lundi niye omwene sakhakanga omundu yesi yesi tawe.

¹⁴Ne kakhali buli mundu akhakangwa ne liliekoomba liewe libi limutiimia enyuma we khumuombelesia.

¹⁵Liliekoomba libi lino liiesianga ne khusaala bubwoni, ne bubwoni ne bukhulile, busaala lifwa.

¹⁶Wandaayase bakoosi enywe, siindu sikhamubea tawe!

¹⁷Buli siianwa silayi lundi sisichufu siamanga mwikulu khu Paapa, oli omubuumbi we buwaanga bwe mwikulu, okhakaluukhananga nga sisiiniini tawe.

¹⁸Khulwe lilienya liewe omwene aakhubuumba efwe khubirira mulomo eya ng'ali, nio khube be khunyoa mu bibuumbe biewe bioosi.

¹⁹Wandaayase bakoosi, khebulila lino. Buli mundu akhoya abe khangu khurekeeresia ne kakhali abe kalaa khulomaloma lundi abe kalaa mu khuambwa lirima.

²⁰Lirima lio omundu se lireeranga buluungi bwa Wele tawe.

²¹Khwako lekha buli mwima kwe sifwaabi ne liiba libi lioosi. Yiboombia khu Wele mala mufukiilile elomo niyo abiaala mu miooyo kienywe, elomo enyala yamuonia enywe.

²²Mukhebea mwabeene mu khurekeeresia busa elomo yewe tawe, ne kakhali khola niko eboola.

²³Omundu yesi yesi orekeeresia elomo mala sakikhola tawe, ali nga omundu owilolela busa mu sikioo ebone nga nali.

²⁴Sikila elolelamo bulayi mala arekukha khangu, ebilila nga afwaana.

²⁵Ne kakhali oyo omalilanga bukesi bwewe khu lilaka lilichufu liielesianga babaandu bulekhuule, lundi se arekeeresia busa ne ebilila tawe ne kakhali alikhebulila ne khulira mu bikholwa biewe, Wele akhamubiite chikhabi mu koosi niko akhola.

²⁶Omundu yesi yesi mwinywe owibaasia ali, ali owe dini mala se anyala khuliinda lulimi lwewe tawe, edini yewe eyo aba se eli ne ngaanga tawe lundi aba alikho ebea busa.

²⁷Edini niyo Wele Paapa abala khuba engwalaafu lundi eya ng'ali niyo yino: Khuliinda bafuubi ne banamulekhwa mu sibi siabwe, ne khukhweliinda wamwene, sibala sikhakhutibia tawe.