Read lubukusu Yak. 2 Bible Online

Yak. 2 - lubukusu bible

Yak. 2

¹Wandaayase enywe, nga basuubili mu Mwami wefwe Yesu Kristo, Omwami we luyali, mukhatomboola babaandu balala khuloondekhana nga babonekha busa enje tawe.

²Kaaba bali omuiinda owefwarire embete eye sahabu ne chingubo chindayi echa mu siikhasio sienywe, ne omubanani owefwarire bitabutabu yesi echa.

³Ne mwekesia buriaani khu omundu ofwarire bulayi ne khumuboolela muli, “Yikhala ano khu ndebe endayi yino,” mala muboolele omubanani muli, “Khewime ao namwe khewikhale aasi mu bikele biase,”

⁴aba enywe muli ne bubi bwe khutomboolana ne khukhalakila babaandi khuloondekhana ne bifuno biikhali bilayi tawe.

⁵Enywe wandaayase bakoosi rekeeresia! Wele aarobora babanani be sibala sino khuba baiinda mwisuubila ne khunyoola bubwami nibwo aasuubisia abo babamusiima niye.

⁶Ne kakhali enywe ne mupia siibi babanani! Naanu bamupianga enywe siibi ne khumukhuruura ne bamuyila mu koti? Se bali baiinda?

⁷Se bali nibo balomanga kamabi khu lisina lilayi elio nilio enywe mwaelesibwa?

⁸ Enywe mwaba ne muloonda lilaka lie Bubwami liili mu maandiko liboola lili, “Siima owasio nga ne wesiima wamwene” aba mulikho mukhola buluungi.

⁹Ne kakhali ne mubukula babaandu balala khuba balayi khukhila babaandi khuloondekhana nga ne babonekha aba mwakholile bubi, ne kamaandiko kekisia kali aba mwakholile bubwoni.

¹⁰Yesi yesi ofuna lilaka lilala aba ali nga ofunile koosi.

¹¹ Sikila mulala oyo owaloma ali: “Okhakhola bueeyi tawe,” niye lundi owaloma ali; “Okheera tawe.” Wakhaba nokhakholanga bueeyi tawe, mala waaba omwiiri aba wabeele omufunaki owe lilaka.

¹²Khwako lomaloma ne khukhola bikholwa bienywe nga babaandu mulikhalakilwa ne lilaka likhuelesianga efwe bulekhuule.

¹³Khola murio, sikila khu ndaalo eye likhalaka, siisa se sikhabeo khwaabo bakhakholelakho babaandu siisa tawe. Ne kakhali akhaba mu khukhalaka, Wele ali ne siisa!

¹⁴Basaale base, lili ne bulayi siina omundu khuloma ali ali ne lisuubila ne bikholwa biewe se biekesia lisuubila chana tawe? Lisuubila elio linyala liamuonia ku?

¹⁵Kaaba bali wandaayefwe aliio otaamba chingubo ne siakhulia,

¹⁶mala mulala khywinywe amuboleele ali “Wele akhuliinde! Cha wore kumulilo mala olie bulayi!” Kaaba bali se wamueleesie bibienyekha mu limenya tawe? Aba nono wakholile ndai siina?

¹⁷Kali busa kario ne lisuubila, ne likhali ne bikholwa tawe, aba liafwa.

¹⁸Ne kakhali omundu alaloma ali, “Ewe oli ne lisuubila, ne ese ndi ne bikholwa.” Ese ngobosia ndi, “Njekesie, omundu yesi yesi onyala aaba ne lisuubila ne se ali ne bikholwa tawe. Nase ndakhwekesia lisuubila liase khubirira mu bikholwa biase.”

¹⁹Ewe osuubila oli Wele aliio mulala yeng'ene? Bulayi! Akhaba bisieeno bisuubila ne khuterema khulwe buuri.

²⁰Musilu ewe! Ewe wenya wekesibwe oli lisuubila likhalimo bikholwa se lili ne bukhala tawe?

²¹ Kuuka wefwe Aburahamu aaba ariena omuluungi ebweeni wa Wele? Bikholwa biewe nibio bibiakila, nga ne arusia omwana wewe Isaaka khu alutare.

²²Se onyala wabona tawe? Lisuubila ne bikholwa biewe biaba alala. Lisuubila liewe liakholwa khuba lilichufu khubirira mu bikholwa biewe.

²³ Ne kakhali liiandiko liloma lili, “Aburahamu asuubila Wele, ne sikila lisuubila liewe Wele amufukiilila niye khuuba omuluungi,” liecha liaba ng'ali. Khwako Aburahamu aalaangwa omusaale owa Wele.

²⁴Nono mwabone muli bikholwa biefwe nibio bikhukhola efwe khwaba baluungi ebweeni wa Wele, ne se lili lisuubila liong'ene busa tawe.

²⁵ Kaba busa kario khu Rahabu omueeyi. Abalwa khuuba omuluungi ebweeni wa Wele khubirira mu bikholwa biewe, nga aakaanila bayooti Baisiraeli ne khubayeeta belukhile khu ngila ekiindi.

²⁶Khwako, nga kumubili kukhalimo kumwoyo ne kuli kumufu, lisuubila likhalimo bikholwa liosi lili liifu.