Read lubukusu Yak. 3 Bible Online

Yak. 3 - lubukusu bible

Yak. 3

¹Bawandaayase enywe, bakali mwinywe mukhaba babekisia tawe. Nga mumanyile, efwe babekisia khulikhalakilwa mu khumenieelesibwa lukali khukhila babaandi.

²Efwe fweesi khwekhiikhangakho mu biise bikali. Ne kakhali kaaba bali omundu se ekhiikhaangakho mu niko aloma tawe, aba niye ali omwichufu lundi anyala khukhweliinda mu liiba liewe lioosi.

³Khurechanga endekwe mukhanwa mwe farasi nio ekhole niko khwenya ekhole lundi khunyala khwakikhola yacha niio khwenya eche.

⁴Namwe yibaasia emeeli, nabuboofu obwo bwoosi ne khuyilwa ne khuungu esiro enyala yayusibwa ne ngara eye khukitimia eeli ndiiti eri, ne emeeli eyo enyala yacha osi osi niio omundu otimia enya eche.

⁵Lulimi lwosi luli lurio, nabutiiti obwo bwoosi; lunyala lwebonia khu biindu biboofu. Yibaasia busa nga kumusiru kumubalaayi kunyala kwosibwa ne khamuli khe kumulilo khalala.

⁶Ne lulimi luli nga kumulilo. Luli ne kamakhiikha kamakali po mu mibili kiefwe, lundi lureera bubi mu liba liefwe liosi. Lurechanga limenya liefwe lioosi mu mulilo ne nalwo lwosi lwosibwa ne kumulilo kwa mindali na mindali.

⁷Omundu anyala khubaya, lundi aabaya bibuumbe bibiindi bioosi, chisaang'i ne chinyuni, ne chindemu ne ching'eeni.

⁸Ne se aliio akhaba mulala onyala khubaya lulimi tawe. Lulimo kamabi lundi se lunyala lwemeelelwa tawe, luli ne buchiba bubwira bukali.

⁹ Khurumikhiranga lulimi khufumia Omwami ne Paapa, lundi khulurumikhiranga khulaama babaandu babaandi. Babaandu bababuumbwa mu sifwaanani sia Wele.

¹⁰Kamakhuwa ke khufumia ne kamakhuwa ke khulaama kama mukhanwa chana omwo. Basaale base, lino se lienyibwa liekholekhe tawe!

¹¹Kameechi kamanulu ne kamalulu kanyala kama mu moni ndala khulala ku?

¹²Basaale base, kumutuli se kunyala kwama kamatuunda ke khu museituni tawe, kumusabibu se kunyala kwaama chinduli tawe, ne esebele eye kameechi kamalulu se nyala yamamo kameechi kamalayi tawe.

¹³Aliio mwinywe oli ne limanya ne bukesi ku? Yekesia lilienelio mu khumenya bulayi, mu bikholwa biewe bilayi nibio akhola mu khwiboombia ne limanya.

¹⁴Ne kakhali mu miooyo kienywe mwaba ne muli ne likhalikhililwa, bukhalafu ne khukhweyenyela, aba mulikho mukhola bubwoni khu bung'ali mu khwebonia muli muli ne limanya.

¹⁵Limanya nga elio se liamanga mwikulu tawe, lili busa lie mu sibala, se lili lia roho tawe, ne kakhali lia Sietani.

¹⁶Niio likhalikhililwa ne khukhweyenyela khuli, abwenao osi aba sisiayuumba ne bubi chingano choosi biliio.

¹⁷Ne kakhali limanya liliama angaaki lili likwalaafu, lie kumuleembe, lie buolu lundi lie busaale. Lili lie siisa sikali lundi lireera bikholwa bilayi, se lilimo ekitombooli namwe bubacha tawe.

¹⁸Ne likesa lie buluungi libialwanga mu muleembe ne nabo bareeranga kumuleembe.