Read lubukusu Yak. 4 Bible Online

Yak. 4 - lubukusu bible

Yak. 4

¹Bulomani ne bukhupani buno mwinywe bilaamilanga waena? Se bilamilanga mu liekoomba lienywe lie kumubili limunaanianga enywe?

²Mwekoomba ne se munyoola tawe, khwako mwirekekha akhaba khukhwira nio mu binyoole, mwekoomba bibiindu, ne kakhali se mu binyoola tawe, khwako mulomana ne khu khupana. Se munyoolanga nibio mwenya tawe sikila se musabanga Wele tawe.

³Ne nga musaba, se munyoolanga tawe, sikila bifuno bienywe bie khusaba se bili bilayi tawe. Musabanga nio mubirumikhire khukhwisangaasia mwabeene.

⁴Babaandu mukhali basuubilifu tawe enywe! Se mumanyile muli khuba omusaale we sibala aba oli omusiku owa Wele tawe? Yesi yesi owenya khuba omusaale we sibala aba abeele omusiku owa Wele.

⁵Mukhebaasia muli liiandiko liloma lili, “Roho niye Wele aara mwifwe ali ne libuba likali,” se lilimo bung'ali tawe.

⁶ Ne kakhali kumwalaalo nikwo Wele aananga kuli ne kamaani khukhilakhoo. Nga liiandiko ne liloma lili, “Wele akhiingililanga babeniinia ne khuelesia kumwalaalo abo babeboombia.”

⁷Khwako, khe mwiaane khu Wele, mukhiingilile Sietani ne naye alamwilukha.

⁸Yisenda siimbi khu Wele, naye alesenda siimbi nanywe. Enywe babooni! Saaba kamakhono kenywe, ne enywe babacha, kwalaasia kimiooyo kienywe.

⁹Khe mube ne bubeeleli, lila, ne khukhwiunamila; kaluukhasia chinjekho chenywe chibe bililo, ekhoyo yenywe ebe khusulunya!

¹⁰Yiboombia ebweeni wo Mwami, mala naye alamuniinia.

¹¹Wandaayase enywe mukhaloma kamabi khu basienywe tawe, Yesi yesi oloma kamabi khu wasie namwe okhalakila omukristo wasie aba alikho aloma kamabi khu lilaka ne khulikhalakila. Ne yesi yesi okhalakila lilaka aba se ali omuloondi we lilaka elio tawe ne kakhali ali omukhalaki walio.

¹²Ali Wele yeng'ene oanaanga lilaka lundi ali niye yeng'ene oli omukhalaki. Ali yeng'ene onyala aaonia lundi aabunia. Ne ewe okhalakila owasio nga naanu?

¹³Rekeeresia enywe mulomanga muli, “Endaalo yino namwe muchuli khukhache lukeendo mu lukoba nabulebe, niio khumenyeyo kumwiiko mala khurakikhe khukhwofula khunyoole chirupia chingali,” luno ulila kakaase.

¹⁴Se mu manyile muchuli bulamu bwenywe bukhabe buriena tawe! Muli nga liliisi lifwela, libao khu siise sitiiti busa ne liwaao.

¹⁵Nilio mukhoyeele mulome nilio lino, “Omwami nafukiilila khubeo, khukhakhole lino namwe elio.”

¹⁶Ne kakhali luno muli ne sileka lundi mwebonia. Khukhwebonia khurio khwoosi se khuli khulayi tawe.

¹⁷Khwako, yesi yesi omanyile bung'ali ne se akhola bung'ali obwo tawe, aba aakholile bubwoni.