Read lubukusu Yak. 5 Bible Online

Yak. 5 - lubukusu bible

Yak. 5

¹Ne luno, enywe baiinda rekeeresia niko ndoma! Yiiunamila ne khulila sikila engunyi elikho yiicha khwinywe!

² Buyiinda bwenywe bwabolile, bwaweele ne chiseseu chalile chingubo chenywe.

³Esahabu ne fwesa yenywe biapile engekheni, ne engekheni yino elaba buloli bubi khwinywe mala elamulia nga kumulilo. Mwabuungile kimiaandu mu ndaalo chimaliilisi chino.

⁴ Se mwaruungirekho siosi siosi khu baandu ba bakholile kimilimo mu mikuunda kienywe tawe. Ulila khukhwiloocha khwabwe! Wele Omwami Omunyali Owa Bioosi aauliile bililo bie babaandu bamukeselanga biakhulia abo.

⁵Limenya lienywe khu sibala khuno liama khuba lie kumusasio ne khukhwesangaasia. Ne kakhali luno muli nga chikhaafu chinefu chiicha khusinjwa.

⁶Mwakhalakila ne khukhwira babaandu bakhalikho ne bubi tawe, mala se bamukhiingililakho enywe tawe.

⁷Bawandaayase nono mwefwiilisie, khukhwola nga Omwami ne echa. Bona nga omulimi efwilisianga ne aliindile bie mukuunda bilabe. Alindiililanga mu khwefwiilisia nabwila efula eye kumunaane nende eye siruumbi ekwa.

⁸Enywe mwesi mukhoya mube be khukhwifwiilisia. Ba ne lilieyikina likali, sikila endaalo eye khukhwicha khwo Mwami eli siimbi.

⁹Bawandaayase, mukhekichana tawe, nio Wele naye yesi akhamukhalakila enywe tawe. Omukhalaki ali embi, enya khwicha.

¹⁰Wandaayase mwesi khebulila bang'oosi babalomaloma mu lisina lio Mwami. Babukule nga sisiekesio sie khukhweyikilakho liliefwiilisia ne liliekhaliilikha mu khupisibwa siibi.

¹¹ Babaandu ba baaba ne liliekhaliilikha, khubabala khuli bali ne busangaafu. Mwaulila khukhwifwiilisia khwa Ayubu lundi mu manyile niko Omwami aamukholela niye ekhumaliilikha, sikila Omwami ali owe siisa sikali.

¹² Basaale base, khukhila koosi, mukhechuba tawe. Mukhechuba khuloondekhana ne likulu namwe sibala namwe sisiindu siosi siosi tawe. Loma busa muli “Yee” ne mwenya khuloma muli yee, namwe muli “Tawe” ne mwenya khuloma muli tawe.

¹³Aliio yesi yesi mwinywe oli mu butinyu? Akhoya asabe Wele. Aliio yesi yesi oli omusangaafu? Akhoya afumie Wele.

¹⁴ Aliio yesi yesi oli omulwale? Akhoya arumanie babemeelesi be kanisa, balamusabila mala bamuakhe kamafura ke kumuseituni mu lisina lio Mwami.

¹⁵Lisaba lino ne bakholela mu lisuubila lilaonia omulwale. Omwami alamuonia lundi omulwale oyo ne ali ne bubwoni alabeelwa.

¹⁶Khwako, khe mwiyamanile bubwoni bwenywe mala musabanile nio muone. Lisaba lio muluungi lili lie kamaani lundi likholanga ke khuukia.

¹⁷ Elicha aba busa omundu nga efwe ne khuli khuri. Asaba ne lisuubila ali efula ekhabao tawe, mala kimiiko kitaru ne kimieesi sita efula khukwakho khu sibala tawe.

¹⁸ Lundi elakho aasaba likulu lialekhuula efula yakwa, mala sibala siamelakho bibiaamo biasio.

¹⁹Bawandaayase, mulala khwinywe aaba ne atiima khu ngila eye bung'ali mala okundi amukobosie,

²⁰ khebulila lino, yesi yesi, oyusia omwoni khukhwama khu ngila embi, alaonia kumwoyo kwo mwoni oyo khukhwama mu lifwa lundi akile khubeelwa khwe bubwoni bukali khubeo.