Read lubukusu 1 Pet. 1 Bible Online

1 Pet. 1 - lubukusu bible

1 Pet. 1

¹Khukhwama khu Petero, omurumwa owa Yesu Kristo, khu baandu ba Wele barobore ba basalaanila ne khumenya nga baakwa mu sibala sia Pondiasi, Kalatia, Kapatosia, Esia, ne Bisinia.

²Mwaroborwa khuloondekhana ne sifuno sia Paapa Wele mala mwakholwa batakatifu ne Roho wewe, khulwe khuria Yesu Kristo ne khukwalaasibwa ne kamafuki kewe. Kumwalaalo ne kumuleembe bikhoya bibeele elala bibienywe mu bwichufu.

³Lekha khupe orio khu Wele lundi ooli Paapa owo Mwami wefwe Yesu Kristo! Sikila mu siisa siewe sikali, akhuelesia efwe bulamu buyia khulwe khulamusia Yesu Kristo khukhwama mu lifwa. Kano kakhuelesia efwe lilieyikina lie bulamu likali,

⁴mala khweyikinanga khunyoola chikhabi che buiinda nicho Wele abikhilanga babaandu bewe. Amubikhila enywe chikhabi echo mwikulu, nimwo chikhanyala chabola namwe chonekha namwe chafulaafulana tawe.

⁵Chili chichenywe, khubirira mu lisuubila ne bunyali bwa Wele khu buonia bubwerekekha khubuulikha esiakamo sie siise.

⁶Ba basangaafu khu kano, akhaba ne munyala khuba ne bubeeleli khulwe siise sikeekhe, sikila kamakhako kamakali niko mulikho mubiriramo.

⁷Sifuno siako sili khukhwekesia mbo lisuubila lienywe lili lia ng'ali, bulayi bwene nga ne barechanga Esahabu mu mulilo khumanya neli endayi. Khwako lisuubila lienywe lili lie bukusi bukali khukhila esahabu, khukhwola liosi lipimwe, nio liole khukhwikhaliilikha. Nio mukhanyoole efuma ne luyali ne lukoosi khu Ndaalo niyo Yesu Kristo alibonekhela.

⁸Mwamusiima, akhaba ne mukhamubonakho tawe, ne mwasuubila mu niye, akhaba ne mukhamubona luno tawe. Khwako mwikhoye ne khoyo eye luyali lukali lukhaboolekha tawe,

⁹sikila mulikho munyoola buonia bwe kimiooyo kienywe, sili sifuno sie lisuubila liefwe mu niye.

¹⁰Liaba khuloondekhana ne buonia buno liakila bang'oosi bayimilisia ne khukhwemenieelesia, mala bang'oola ke siianwa sino nisio andi Wele akhamuelesie.

¹¹Bakhaka khumanya siise siliba liina ne silicha sirie. Sino siaba siise nisio Roho owa Kristo mu nibo ekesia, mu khung'oola buchuuni nibwo Kristo aaba ne alikho acha khwikhaliilikha ne luyali lulwaba ne lucha khuloondakho.

¹²Wele abuulila bang'oosi bano ali kimilimo kiabwe sekiaba khulwe bukhala bwabwe babeene tawe, ne kakhali bubwenywe, nga ne baloma khu biindu ebio nibio mwama khuulila luno khukhwama khu barume babelwacha Elomo Endayi khulwe bunyali bwa Roho Omutakatifu owarumwa khukhwama mwikulu. Bino bili bibiindu nibio akhaba malaika benyanga khumanya.

¹³Khwako rekekha kamebaasio kenywe khulwe bikholwa. Yerekekha mala mureere elala lilieyikina lienywe khu khabi nicho mukhaebwe nga Yesu Kristo aliicha.

¹⁴Khe mube baria Wele, mukhaloonda liliekoomba nilio mwaba nalio nga mwaba ne musiili mu busilu bwenywe tawe.

¹⁵Ne kakhali, ba batakatifu mu bioosi nibio mukhola, nga Wele owamulaanga enywe nali omutakatifu.

¹⁶ Liiandiko liboolanga lili, “Ba batakatifu sikila ese ndi omutakatifu.”

¹⁷Kaaba bali mulaanganga Wele muli Paapa, Wele okhalakilanga babaandu boosi mu bung'ali, kholoondekhana ne bikholwa bia buli mundu, menya limenya lie buuri khu niye siise sioosi sie limenya lienywe nga baakwa.

¹⁸Sikila mu manyile sisiaruungwa khumulekhuula enywe khurura mu miima kie limenya likhalimo bukhala tawe, nikio mwaelesebwa ne bakuuka benywe, se siaba sisiindu sinyala sionakwa nga efwesa namwe esahabu tawe.

¹⁹Kaaba kamafuki ka Kristo ke bukhala bukali khukhila buli siindu, owaba nga limeeme likhalikho ne bubi bwosi bwosi tawe.

²⁰Yaba aroborwa ne Wele sibala ne sikhabaang'anwa tawe, nio abonekhe mu ndaalo chimaliilisi chino sikila enywe.

²¹Khubirira mu niye mwasuubila mu Wele, owamulamusia khukhwama mu lifwa ne khumua luyali; nio lisuubila lienywe ne lilieyikina bibe khu Wele.

²²Luno sikila mwekwalaasiisie mwabeene khulwe khuria bung'ali, nio mube ne busiime bwa ng'ali khu basuubili basienywe, mukhoyeele mwasiimana mwabeene ne mwabeene lukali ne kumwoyo kwenywe kwoosi.

²³Sikila mwasaaliilwe lukhola khabili, ne se mwasaaliilwe khu lumiicho lunyala lwabola tawe, ne kakhali mwasaaliilwe khu lumiicho lukhabola tawe lwe elomo eya Wele eye bulamu lundi eya mindali.

²⁴ Nga liiandiko ne lilomanga lili: “Babaandu boosi bali nga bunyaasi, ne luyali lwabwe luli nga bimuli bie mundaa. Bunyaasi bunialanga ne bimuli bikhukhumukhanga,

²⁵ne kakhali elomo eyo Mwami eliio mindali na mindali.” Elomo yino eli Elomo Endayi eyelwachibwa khwinywe.