Read lubukusu 1 Pet. 2 Bible Online

1 Pet. 2 - lubukusu bible

1 Pet. 2

¹Nono, rura mu bumayaanu bwoosi, mukhabea lundi namwe mwekholesie namwe mukhalikhililwe namwe mube ne kamakuto tawe.

²Nga babaana bachwenge, ba ne bulesia bwe kamabeele ka kiroho kamakwalaafu, nio khulwe khukanywa mwole khuchoa mala muonisibwe,

³ mwaba ng'ali ne muchanjaamilekho ne khumanya muli Omwami ali omulayi.

⁴Yiicha khu Mwami, libaale lie bulamu lilialobwa no mundu nga likhalimo bukhala tawe, ne kakhali liaroborwa ne Wele nga lie bukhala.

⁵Yiicha nga kamabaale kamalamu, mala mwilekhuule mu khurumikhirwa mu khwombakha Lukaangu lwa roho, nimwo mukhakhole nga basaayi batakatifu khurusia bie khuosia bia roho, mala bifukiililwa khu Wele khubirira mu Yesu Kristo.

⁶ Sikila liiandiko liboolanga lili, “Narobora libaale lie bukhala, Nilio ndikho ndaao nga libaale lie khu koona mu Sayuni; Mala yesi yesi oosuubila mu niye se aliambwa chisoni tawe.”

⁷ Libaale lino lili lie bukhala bukali khwinywe musuubila; nende khwaabo bakhasuubila tawe: “Libaale nilio babombakhi baloba, liekelile liboofu lie mu koona.”

⁸ Ne liiandiko liliindi liboolanga lili, “Lino nilio libaale likhakhole babaandu betuye, lulwanda lukhabape aasi.” Bakhetuye sikila se basuubila mwikhuwa nga lilienya lia Wele ne lili khu nibo tawe.

⁹ Ne enywe muli ekholo eye babaandu babaroborwa, basaayi bo Mwami, ekholo endakatifu, babaandu ba Wele babeene, babaroborwa khukhwilwacha bikholwa bie khuukia bia Wele, owamulaanga enywe khukhwama mu siilima khukhwicha mu buwaanga bwewe bwe kamakana.

¹⁰ Mu ndaalo echo se mwaba babaandu ba Wele tawe, ne luno muli babaandu bewe, mu ndaalo echo se mwamanya siisa sia Wele tawe, ne luno mwanyoolile siisa siewe.

¹¹Basaale base, mwikoonjelela enywe, nga bakeni lundi baakwa mu sibala sino! Mukhelekhuula khu liekoomba lie kumubili, lili mwiie buli lwoosi ne kumwoyo tawe.

¹²Liiba lienywe mu bakhamanyile Wele tawe, likhoyeele liaba lilayi lukali, nio ne bamusitaka enywe khuba bakhola kamamayaanu, bakhoyeele babona bikholwa bienywe bilayi nio bafumie Wele khu Ndaalo eye liliicha liewe.

¹³Sikila Omwami, khe murie buli bunyali. Lukali bunyali buuli khu muruki ooli khu bwami bwe angaaki,

¹⁴ne babaami babaandi, babaroborwa ne naye, khuukuuma bakhola bumayaanu ne khufumia abo bakhola kamalayi.

¹⁵Sikila Wele enyanga enywe khusisia lilomaloma lie babaandu basilu likhali lie limanya tawe, khulwe bibiindu bilayi nibio mukhola.

¹⁶Menya nga babaandu balekhuule; ne mukharumikhira bulekhuule bwenywe khukisa kamamayaanu kosi kosi tawe, ne kakhali menya nga nasioobi ba Wele.

¹⁷Ria buli mundu, siima basuubili basienywe, ba ne buuri khu Wele, mala murie omwami Kaisari.

¹⁸Enywe banasioobi khukhwola murie bakhulu benywe mala mu bekesiele elala buriaani. Mukhekesia busa khwaabo bali balayi ne baolu bong'ene tawe, ne kakhali akhaba khwaabo baali barafu.

¹⁹Wele akhamubiite chikhabi khu kano, kaaba bali mwekhaliilikha buchuuni bwe sinyaasio nisio mukhakhoyeele khunyoola tawe, sikila mu manyile lilienya liewe.

²⁰Bukhala siina buliio kaaba bali mwekhaliilikha bukhupe nibwo mukhoyeele khunyoola ne mukholile kamabi? Ne kakhali mwaba ne mwikhaliilikha buchuuni sikila mukholile buluungi, Wele akhamubiite chikhabi khu nibwo.

²¹Bino nibio Wele amulangila, sikila Kristo omwene anyaasibwa sikila enywe mala amulekhela enywe sie khulolelakho, nio mwole khuloonda kakewe.

²² Se akholakho bubwoni bwosi bwosi tawe, ne se aliio owaulila bubeeyi ne bwama mukhanwa mwewe tawe.

²³ Nga ne akhomwa, se akobosiamo ne khukhoma tawe; nga anyaasibwa se ariikhirisiakho tawe, ne kakhali aara lilieyikina liewe mu Wele, Omukhalaki owa ng'ali.

²⁴ Kristo omwene asuta bubwoni bwefwe khu mubili kwewe acha nabwo khu musalaba, nio khwolaane khulekha bubwoni mala khumenye khulwe buluungi. Ne khulwe kamakoonjo kewe, enywe mwaonile.

²⁵ Mwaba nga kamakheese kakatiima engila, ne luno mwayusiibwe khuloonda Omwaayi lundi omuliindi owe kimiooyo kienywe.