Read lubukusu 1 Pet. 3 Bible Online

1 Pet. 3 - lubukusu bible

1 Pet. 3

¹ Mu ngila ng'eneyo enywe bakhasi khukhwola murie baseecha benywe, nio balala khu nibo bakhasuubila elomo eya Wele tawe, bikholwa bienywe bibakhwese basuubile. Se mukhenaane khuloma likhuwa tawe,

²sikila bakhabone bikholwa bienywe ne bili bilayi lundi bie buriaani.

³ Se mukhoyeele mwesaa nio bali mung'oone lukoondo, ne bibiindu nga khu suuka lichuune, namwe bipalakasa bie khu maru nibio mwarakho, namwe chingubo nicho mufwara tawe.

⁴Ne kakhali, bulayi bwenywe bukhoyeele bwaba bwe liiba lienywe lie mukari lia ng'ali, bulayi bukhawao tawe, bwe kumwoyo kukweoleelesia lundi kwe kumuleembe, kuuli kwe bukhala bukali ebweeni wa Wele.

⁵Sikila bakhasi baberusia be khaale ba bara lilieyikina liabwe mu Wele baba balayi khulwe khuria baseecha babwe.

⁶ Sara aaba ario; aria Aburahamu ne khumulaanga ali omwami. Luno muli babaana bewe be sikhaana mwaba ne mukhola bulayi, ne mukharia siindu siosi siosi tawe.

⁷ Mu ngila ng'eneyo enywe baseecha khukhwola mumenye ne bakhasi benywe ne limanyilisia lilayi muli, se bali ne kamaani nga kakenywe tawe. Bakholele ne buriaani, sikila nibo alala ne nanywe musaanga mu siianwa sia Wele sie bulamu. Khola kano nio kamasaba kenywe kalekhe khukhiingililwa tawe.

⁸Mukhumaliilisia, khukhwola mweesi mube ne kumwoyo mulala, lundi mube ne siisa, khe musiimane mwabeene ne mwabeene nga bawandaaye ne wandaaye, lundi mube balayi lundi baolu khu mwabeene ne mwabeene.

⁹Mukharuungisia bubi ne bubi tawe, namwe mukhalaama tawe, ne kakhali, biita chikhabi, sikila chikhabi chili nicho Wele alakiilisia khumuelesia enywe nga aamulaanga.

¹⁰ Nga liiandiko liboolanga lili, “Yesi yesi owenya khukhwikhoyela bulamu ne ekoomba khubona biise bilayi, khukhwola alekhe khulomaloma bumayaanu lundi alekhe khuloma bubeeyi.

¹¹Khukhwola, alekhe khukhola bumayaanu mala akhole kamalayi; khukhwola ayiime kumuleembe ne kumwoyo kwewe kwoosi.

¹²Sikila chimoni cho Mwami chiloleelelanga baluungi ne khurekeeresia kamasaba kabwe; ne kakhali Omwami abiyilanga abo bakhola bumayaanu.”

¹³Nono naanu okhamunyaale mwaba ne muli ne silukuluku sie khukhola kamalayi?

¹⁴ Ne mwakhaba bali mukhoyeele khunyaasibwa khulwe khukhola kang'ali, sangaala! Mukhaba ne buuri khu mundu yesi yesi tawe, lundi mukheembeelela tawe.

¹⁵Ne kakhali ba ne buuri khu Kristo mu miooyo kienywe, lundi mu musiime nga Omwami. Yerekekha mu biise bioosi khukobosia yesi yesi omureeba enywe khumwinooselia lilieyikina nilio muli nalio, ne khola murio ne lilieboombia ne buuri.

¹⁶Lekha limanya lienywe lie mu mebaasio libe lie abuwaanga, nio ne mukhomwa, abo bamuloma kamamayaanu khu liiba lienywe nga babeeka ba Kristo baambwe chisoni khu nibio baloma.

¹⁷Sikila buli bulayi khunyaasibwa khulwe khukhola bulayi, liaba ne lili lilienya lia Wele, khukhila khunyaasibwa khulwe khukhola kamamayaanu.

¹⁸Sikila Kristo yesi aafwa khulwe bubwoni lulala lwong'ene mala akama, aaba omuluungi mala afwila bakhali baluungi tawe nio akhureere efwe khu Wele. Erwa kumubili, ne kakhali aakholwa omulamu mu roho,

¹⁹ne mu roho omwo aacha elwachila roho chichaba mu siboe.

²⁰ Chino chaba chiroho chikharia Wele tawe, nga alindiililanga ne liliefwiilisia mu ndaalo nicho Noa ombakhilamo emeeli yewe. Babaandu munaane bong'ene ba baaba mu meeli eyo nibo babaona khubirira mu meechi,

²¹sino siaba simanyisio sisiekesia libatiisia lilamuonianga enywe luno, ne se khuli khulwe khukhwisiinga ne khukhwirusiakho liikho tawe, ne kakhali lili lisaba khu Wele lie khuuba ne liiba lie mu mebaasio lili lilayi, Limuonianga enywe khubirira mu lilamukha lia Yesu Kristo,

²²owacha mwikulu ne luno ali kumukhono kumuseecha kwa Wele. Amiianga bamalaika boosi, lundi bubwami bwe mwikulu ne bunyali bwoosi bili aasi wewe.