Read lubukusu 1 Pet. 4 Bible Online

1 Pet. 4 - lubukusu bible

1 Pet. 4

¹Khubeela Kristo aapisibwa siibi mu mubili, enywe mwesi khukhwola mube ne kamebaasio menako sikila oyo yesi oupisibwa siibi mu mubili se amenya mu bwoni lundi tawe.

²Khukhwama luno khucha ebweeni, khukhwola mu menye limenya lienywe lie chindaalo chimuramirekho mu sibala muno mu khwimeelelwa ne lilienya lia Wele ne kakhaba khulwe liliekoomba lie kumubili tawe.

³Enywe mwarumikhira chindaalo chiweele chingali khukhola niko bakhamanyile Wele tawe basiima khukhola. Limenya lienywe liaba khukhola bumayaanu, liliekoomba, bumeesi, sifwaabi, bipupu bie bunywi, ne liliesaaya lie bifwaani.

⁴Ne luno bakhamanyile Wele abo tawe, bauka nga ne mukhaambananga nabo, mu limenya lie sifwaabi elio tawe, khwako bamukhomanga enywe.

⁵Ne bakhaboole kakabwe koosi khu Wele, owerekekha khukhalakila balamu ne bafu.

⁶Ako niko kakakila Elomo Endayi yelwachibwa akhaba khu bafu, nio akhaba ne baaba ne bakhalakilwe mu liba liabwe lie kumubili, boole khumenya mu roho nga Wele.

⁷Sisiakamo sie bibiindu bioosi sili embi. Khukhwola mube ne lilieliinda lundi ne bukesi, nio munyale khusaba.

⁸ Khutuuma bibiindu bioosi, siimana mwabeene ne mwabeene ne busiime bukhawa tawe, sikila busiime bufunikhanga bubwoni bukali.

⁹Yekhoyela babasienywe mu chingo chenywe, ne mukhelung'unyakho tawe.

¹⁰Buli sia mulala nga omwimeelesi omulayi owe biianwa bia Wele lukano na lukano, khukhwola abirumikhire khulwe bulayi bwe babasie.

¹¹Yesi yesi owilwacha khukhwola elwache nga burume bwa Wele; yesi yesi okholanga kia Wele khukhwola akhole ne kamaani niko Wele amuelesianga, nio mu biindu bioosi efuma yoole khuaanwa khu Wele khubirira mu Yesu Kristo oli ne luyali ne bunyali mindali na mindali. Amina.

¹²Basaale base basiime, mukhesindukhila kamakhako kamarafu niko mulikho muchuunisibwamo, nga kali sisiindu sikeni silamwikholekhangakho tawe.

¹³Ne kakhali ba ne busangaafu nga mulikho musaanga mu khuchuunisibwa khwa Kristo, nio mwole khuuba ne khoyo engali nga luyali lwewe lulibonekha.

¹⁴Muli ne chikhabi mwaba ne mukhomwa sikila muli babeeka ba Kristo; sikila liekesia lili Roho owa Wele owe luyali, amulimo.

¹⁵Ne kaaba bali yesi yesi khwinywe aukuumwa, likhaba bali sikila ali omwiiri namwe omwifwi namwe omundu omubi namwe owekhupa mu makhuwa ke babaandu babaandi tawe.

¹⁶Ne kaaba bali oukuumwa sikila oli Omukristo, likhakhuambia chisoni tawe, ne kakhali elesia Wele luyali mu lisina elio.

¹⁷Siise siolile sie likhalaka khurakikha, mala babaandu ba Wele bakhabe be khunyoa khukhalakilwa. Ne liaba bali likharakikhire khwifwe, aba kakhabe kariena khwaabo bakhasuubila Elomo Endayi khukhwama khu Wele tawe?

¹⁸ Nga liiandiko liboolanga lili, “Kaaba bali buli butinyu khu baandu balayi khuonisibwa; aba siina nono, sikhekholekhe khu booni bakhasuubila Wele tawe?”

¹⁹Khwako, abo bachuunisibwa sikila lili lilienya lia Wele khu nibo, bakhoyeele khulwe bikholwa biabwe bilayi basuubile elala babeene mu mubuumbi wabwe, oliindanga lisuubisia liewe buli lwoosi.