Read lubukusu 1 Pet. 5 Bible Online

1 Pet. 5 - lubukusu bible

1 Pet. 5

¹Ese, nga omuloli we khunyaasibwa khwa Kristo lundi omusaakhulu, mulalakho khu basaangi be luyali lulifunulibwa. Nikoonjelela basaakhulu be chikanisa mwinywe, ndi

² ba babaayi be kamakheese niko Wele amuelesia enywe ne khukaliinda khulwe khukhwerusia. Ne mukhaba babaayi khulwe khweyingiilila tawe, ne kakhali khola kimilimo ekio khukhwama mu liekoomba lia ng'ali khukhola.

³Mukhakhaka khukhwamiia abo baali aasi we buliindi bwenywe tawe, ne kakhali khe mube silolelo khu makheese ako.

⁴Ne nga Omwaayi Omukhulu ne aliicha, mukhanyoole ekutwa eye luyali ekhatibia buwaanga bwayo tawe.

⁵ Mu ngila ng'eneyo, enywe basoleeli baele, khukhwola murie basaakhulu. Khukhwola enywe mweesi mwefware liliefwiilisia, murichane mwabeene ne mwabeene, sikila liiandiko libolanga lili, “Wele akhiingililanga babebonia ne kakhali aananga kumwalaalo khwaabo babeboombia”

⁶ Khwako yeboombia mwabeene aasi we kumukhono kwa Wele kwe kamaani, nio amusute angaaki mu siise sisiolaana.

⁷Mulekhele niye liliendekhelela lienywe lioosi, sikila niye amwinaanilanga.

⁸Yeliinda lundi ba meso! Omusiku wenywe Sietani enyolanga kalaa nga etalang'i eulukhuma, eyima khulia omundu.

⁹Mukhiingilile lukali mu lisuubila lienywe nio mu mukhaye, sikila mumanyile muli basuubili basenywe mu sibala sioosi balikho babirira mu sinyaasio sifwaanane ne sisienywe sino.

¹⁰Ne enyuma we khunyaasibwa khulwe siise sikeekhe, Wele we kumwalaalo kwoosi, owamulaanga enywe khunyoola luyali lwa mindali mu Kristo, omwene akhamukhole babechufu ne khumuelesia kamaani, ne khuandalasibwa khwa ng'ali.

¹¹Bunyali bube khu niye mindali na mindali! Amina.

¹² Namuandikiile enywe ebarwa enyiimbi yino ne buyeeti bwa Sila, niye mbukula nga wandaayase omukristo omusuubilwa. Nenya mutase enywe kumwoyo mala mbane buloli bwase ndi kuno kuli kumwalaalo kwa Wele kwa ng'ali, khe mweandalasie alala.

¹³ Ekanisa yasenywe eli mu Babiloni, yosi eyaroborwa ne Wele, yamurumiire enywe kimileembe, ne akhaba omwana wase Mariko yesi amukhesiisie.

¹⁴Khesiana buli sia mulala ne khukhwekhoyanila mu busiime bwe bukristo. Kumuleembe kukhoyeele kube ne nanywe muli ba Kristo.