Read lubukusu 2 Pet. 1 Bible Online

2 Pet. 1 - lubukusu bible

2 Pet. 1

¹Khukhwama khu Simoni Petero, omukholi no murumwa owa Yesu Kristo, khwaabo khubirira mu buluungi bwa Wele wefwe no muonia Yesu Kristo, baelesibwe lisuubila lilayi nga liliefwe:

²Kumwalaalo ne kumuleembe bikhoyela khubela elala bibienywe mu bwichufu ne mu bukesi bwenywe bwa Wele ne Yesu Omwami wefwe.

³Bunyali bwe buwele bwakhuele efwe buli siindu nisio khwenya nio khumenye limenya lie khuria Wele khulwe khumanya oyo owakhulaanga khusaange mu luyali ne bulayi bwewe omwene.

⁴Mu ngila ne ng'ene akhuelesia biianwa bie bukhala bukali lundi bilayi nibio asuubisia, nio mu khubirira mu biianwa bino mwole khukhwibacha khukhwama mu liba lie liliekoomba libi mu sibala.

⁵Sikila kano khaka nga ne munyala khutasa bulayi khu lisuubila lienywe, khu bulayi bwenywe tasakho bukesi;

⁶khu bukesi bwenywe tasakho liliefwiilisia; khu liefwiilisia lienywe, tasakho liliekhaliilikha; khu liekhaliilikha lienywe, tasakho butakatifu,

⁷ne khu butakatifu bwenywe, tasakho busiime bwe bukristo, ne khu busiime bwe bukristo tasakho busiime.

⁸Bino bili bibiindu bibienyekhana, ne mwaba ne muli nabio mu bukali, bilamukhola mube bakholi balayi mu khumanya Omwami wefwe Yesu Kristo.

⁹Ne oyo yesi okhali ne bibiindu bino tawe, aba abona aembi busa lundi ali omubofu, lundi ebiliile ali aakwalaasibwa khukhwama khu bwoni bwewe bwe chindaalo chichabira.

¹⁰Nio, bawandaayase, khakakho lukali khukhola khu mulaango kwa Wele ne burobosi bwewe khwinywe khuba limanya likhawao tawe. Mwaba ne mukhola murio, se mulilekha lisuubila lienywe tawe.

¹¹Mu ngila ne ng'ene, muliiebwa kumunwa khu khwingila mu bwami bwa mindali bwo Mwami lundi Omuonia wefwe Yesu Kristo.

¹²Ne khamukhebusienge buli lwoosi bibiindu bino, akhaba ne mwabimanya khale, lundi mwabiiandalasia mu bung'ali nibwo muli nabwo luno.

¹³Nibaasia busa ndi, buli buluungi khwise khumukhebusia enywe bibiindu bino ne siili omulamu.

¹⁴Manyile ndi embi kherusiekho kumubili kwe khufwa kuno nga Omwami wefwe Yesu Kristo ne amboleele abuwaanga.

¹⁵Ndakhaka kamaani khubona mbo mukhebulila kamakhuwa kano buli lwosi enyuma we lifwa liase.

¹⁶Se khwaloonda chingano che khukhwekhochoocha khulwe khukhola mumanye khukhwicha khwe kamaani khwo Mwami wefwe Yesu Kristo tawe. Ne chimoni chefwe ching'ene, khwabona bunyali bwewe.

¹⁷ Sikila anyoola khu Wele Paapa lukoosi ne luyali, nga kumumilo ne kwamwichakho khukhwama mu luyali lwe angaaki, ne kuboola kuli, “Yuno ali Omwana wase omukoosi, ousiimisia ese!”

¹⁸Efwe fwabene khwaulila kumumilo kuno ne kwicha khukhwama mwikulu, nga ne khwaba naye khu sikulu sitakatifu.

¹⁹Nio efwe khuli ne lilieyikina likali lie burume bubwelwachwa ne bang'oosi. Mulakhola bulayi mwaba ne muburekeeresia, sikila buli nga etaa ekhosia mu siilima khukhwola nga enje ne bayuukha ne buwaanga bwe eng'enieesi eya sulwe ekhosia mu miooyo kienywe.

²⁰Khutuuma bioosi, khebulila muli se alikhoo omundu yesi yesi omwene onyala aboola ke bung'oosi mu maandiko nga omwene enya tawe.

²¹Sikila se bulikhoo burume bwe bang'oosi bubwechao busa khulwe lilienya lio mundu tawe, ne kakhali babaandu barangirirwa ne Roho Omutakatifu nga ne baloma burume bubwama khu Wele.