Read lubukusu 2 Pet. 2 Bible Online

2 Pet. 2 - lubukusu bible

2 Pet. 2

¹Nga bang'oosi be bubeeyi ne baaukha mu baandu anyumao, mu ngila ne ng'ene babekisia be bubeeyi balibonekha mwinywe, balireera mu bwikisi kamekisio kakonaka ke bubeeyi, lundi baliekaana Omwami owabasikula, nio baliereerera lilionaka lia khangu.

²Kakhaba kario, bakali baliloonda chingila chabwe che sifwaabi; sikila babekisia be bubeeyi bano, babaandi baliloma kamamayaanu khu Ngila eye bung'ali.

³Mu bulianga bwabwe babekisia be bubeeyi bano balinyoola bukhala khukhwama khwinywe mu khumuboolela enywe kamakhuwa ke bubeeyi. Sikhalako siabwe siamala khubisibwa khale ne se sili sia busa tawe, ne libuna liabwe se lilakhiinda tawe.

⁴Kaaba bali Wele se alekha malaika babakhola bubwoni tawe, ne kakhali aabamwaata emakoombe, niio babowa ne kiminyololo mu siilima, baliindililanga bukhalaki.

⁵ Wele se aalekha busa sibala sie khaale tawe, ne kakhali aareera kameechi khu sibala sie babaandu bakhamanya Wele tawe, ne kakhali aaonia Noa omwilwachi we buluungi ne babaandi saba bong'ene,

⁶ lundi Wele aakhalakila chingoba cha Sodomu ne Komora aachibunia ne kumulilo, mala aachikhola sisiekesio khu kaliekholekha khu baandu bakhali ba Wele tawe.

⁷ Wele aareesia Luti, omundu omulayi, owaba ne amiinwa ne liiba lie sifwaabi lie babaandu baakhaba ne lilaka tawe.

⁸Omundu omulayi oyo aabamenyamo, ne buli endaalo achuunisibwanga burafu nga abonanga ne khuulila bikholwa biabwe bimayaanu.

⁹Nono, Omwami amanyile nga ne areesia babaandu bamanyile Wele khukhwama mu makhako kabwe, ne khuli nga ne abiikha bakhali baluungi tawe mu sinyaasio, khukhwola khu ndaalo eye bukhalaki,

¹⁰lukali abo babaloonda liiba liabwe lie sifwaabi, lie liliekoomba lie kumubili, baleka bunyali bwa Wele. Babekisia be bubeeyi bano bali banyindaafu lundi be khukhwebonia ne se bekesiana buriaani khu be luyali be mu ngaaki tawe; ne kakhali, balekelesia.

¹¹Akhaba malaika, bali be kamaani lukali khukhila babekisia be bubeeyi bano, se babasitaka ne khu bakhomela ebweeni wo Mwami tawe.

¹²Ne babaandu bano nga chisaang'i chikhali ne bukesi tawe, chichasalwa khuambwa ne khukhwirwa bakhola bibiindu busa ne bakhakanakaane tawe, bebwaakala ne khukhoma buli siindu siosi siosi nisio bakhamanyile tawe. Balibunisibwa nga chisaang'i che mundaa,

¹³ne baliruungwa ne khuchuunisibwa ne buchuuni nibwo basasia. Busangaafu khu nibo buli khukhola siosi siosi kumuusi, sisikusia kameelu kabwe ke kumubili; bali ne chisoni ne buuri nga ne baambana nanywe khu sialwa, mu siise sikeekhe, basangalila chingila chabwe che bubeeyi!

¹⁴Se beenya khubonakho siosi siosi tawe, ne bakhali bakhasi be sifwaabi; kameelu kabwe ke bubwoni se kawechanga tawe. Bayilaanga babaandu batekhele mu mureko. Kimiooyo kiabwe kiekisibwa khuba kie bulianga. Bali aasi we silaamo sia Wele!

¹⁵ Baukha khu ngila enuungi mala batibisie engila yabwe, baloondile engila eya bukulwa ne Balamu okhwa Beori, owasiima chirupia che khunyoola khulwe khukhola kamabi,

¹⁶ne kakhali aayibilwa khulwe bubwoni bwewe. Epunda yewe yaloma ne kumumilo kwo mundu yemekha sikholwa sio mung'oosi sie siyingwa.

¹⁷Babaandu bano bali nga chimoni che chisebele chichateenya, nga kamafuumbi kauchwa ne ekhuungu engali; Wele aabiikha bubwangu khu nibo mu siilima sikali.

¹⁸Balomanga bibiindu bie khukhwesiima ne bie khukhwesilwasia, ne barumikhira liliekoomba lie sifwaabi lie kimibili khureka abo barakikhe khukhwilukha khukhwama khu baandu bamenya mu mabi.

¹⁹Babasuubisia bulekhuule ne babeene bali nasioobi be kimiima kikionaka, sikila omundu ali nasioobi owa buli siindu sisiamwibina.

²⁰Ne baba bali babaandu belukhe khukhwama mu maani ke bubwonaki ke sibala, khubirira mu bukesi bwabwe bwo Mwami wefwe lundi Omuonia Yesu Kristo, ne lundi baambwa ne baulwa nabo, babaandu nga abo bari bali mu liiba libi esiakamo khukhila nga ne baba ekhurakikha.

²¹Bwakhabeele bulayi lukali khu nibo khulekha khumanya engila eye buluungi tawe, khukhila khukimanya mala baukhe khukhwama khu lilaka litakatifu nilio baelesibwa.

²² Kakekholekha khu nibo kekesia kali chisimo chino chili cha ng'ali: “Embwa elichanga kamarusi kayo” ne “Embiichi niyo basiingile ekobolanga mala yekalangasia mu matosi lundi.”