Read lubukusu 2 Pet. 3 Bible Online

2 Pet. 3 - lubukusu bible

2 Pet. 3

¹Basiime base, ebarwa yino eli eya khabili khu muandikila enywe. Mu barwa chombi nakhakile khusiisimusia kamebaasio kamalayi mwinywe khulwe khumukhebusia bibiindu bino.

²Nenya mukhebulile kamakhuwa kakalomekha khaale ne bang'oosi batakatifu, ne lilaka khukhwama khu Mwami lundi omuonia nilio mwaebwa ne barumwa benywe.

³ Khunyoa, khukhwola mumanye muli mu ndaalo chimaliilisi babaandu balala bakheeche ne liliekoomba liabwe babeene. Balimukholela enywe embelekeu,

⁴ne khumureeba enywe bali; “Se alakiilisia khukhwicha? Ali waena? Ba paapa befwe bafwa, ne buli siindu sisiili busa nga ne siaba khukhwama nga sibala ne sibuumbwa!”

⁵ Balekelesia likhuwa lino, khaale Wele aaloma elomo, mala likulu ne liloba biabuumbwa. Liloba liabuumbwa khukhwama khu meechi khubirira khu meechi,

⁶ ne lundi kaba kameechi kamakali niko kakonaka sibala sie khaale.

⁷Ne likulu ne liloba biliio luno, biabikhiilwe ne lilaka lia Wele ne liliene, nio bionakwe ne kumulilo. Bilikho bibikhwa khulwe endaalo niyo babaandu bakharia Wele tawe, balikhalakilwamo ne khubunisibwa.

⁸ Ne mukhebilila siindu silala basaale base basiime tawe! Khu Wele endaalo ndala eli nga kimiiko eelefu, ne kimiiko eelefu nga endaalo ndala.

⁹Omwami se ali kalaa khukhola nisio alakiilisia nga balala ne bebaasia tawe. Ne kakhali amwekhaliilikha enywe, sikila se eenya yesi yesi khubunisibwa tawe, ne kakhali eenya boosi bekanile.

¹⁰ Ne kakhali endaalo yo Mwami ekheeche nga omwifwi. Endaalo ng'eneyo, likulu likhakhole luyoka lukali ne khururao, bie mwikulu bikhayenguusibwe ne kumulilo, ne sibala nende biili mu sibala bikhosibwe.

¹¹Kaaba bali bibiindu bino bioosi bilionakwa mu ngila yino, nono aba, mukhoyele khuuba babaandu lukano siina? Bulamu bwenywe bukhoyeele khuuba butakatifu lundi bubwaanwa khu Wele,

¹²nga ne mulindiilila endaalo eya Wele ne mukhaka kamaani khukikhola khukhwicha khangu, endaalo niyo likulu liliosebwa ne khu khwonakwa, ne bie mwikulu biliyengusibwa ne kumulilo.

¹³ Ne khulindiilila khu nibio Wele alakiilisia: likulu liiya ne liloba liiya, niyo buluungi bumenyile.

¹⁴Nono, basaale base, nga ne mulindiilila endaalo eyo, khaka nga munyala khuba ne kumuleembe ne naye, lundi bakwalaafu bakhali ne chisoni tawe.

¹⁵Bala liliefwiilisia lio Mwami wefwe nga bubwangu nibwo alamuelesianga enywe khuonisibwamo, khuli nga wandaayefwe omusiime Paulo ne aandika khwinywe, narumikhira limanya nilio Wele amuelesia.

¹⁶Kano kali niko aaloma mu barwa chewe choosi nga ne aandika. Biliio bibiindu bilala biiandalafu mu barwa chewe nibio babaandu bakhamanyile lundi bakhali baluungi se banyala khubinoosia mu bubeeyi tawe, khuli nga ne bakholanga ne kamaandiko kakaandi, khulwe khukhwereerera libuna khu beene.

¹⁷Ne enywe, basaale ne munyoile khumanya kano, yeliinda mwabeene mukhecha mwekisibwa ne babaandu bakhaloonda lilaka tawe mala mukwe khukhwama mu buonelo bwenywe tawe.

¹⁸Ne chiililila khukhula mu mwalaalo ne limanya lio Mwami wefwe lundi Omuonia Yesu Kristo. Niye abe ne luyali, luno nende buli lwoosi! Amina.