Read lubukusu 1 Yn. 2 Bible Online

1 Yn. 2 - lubukusu bible

1 Yn. 2

¹Baana base, ndikho muandikila enywe, nio mukhakhola murio mwakhola bubwoni tawe; ne omundu yesi yesi aaba nakhola bubwoni, khuli no mundu okhusabila khu Paapa mu bweyaangu bwefwe, niye Yesu Kristo, oli omuluungi.

²Ne Kristo omwene niye engila niyo bubwoni bwefwe bubeelwangwakho, ne se buli bubwoni bwefwe bwong'ene tawe, akhaba bubwoni bwa buli mundu yesi yesi.

³Nono khwaaba ne khuria kamalaka ka Wele, aba khuli ne lisuubila khuli khumumanyile.

⁴Babaandu balomanga bali bamumanyile mala se baria kamalaka kewe tawe bali babeeyi, lundi bung'ali se bubalimo tawe.

⁵Abo boosi babaria elomo yewe, nibo ng'ali busiime bwabwe khu Wele bwechusiibwe. Yino niyo engila niyo khunyala khwaba ne lisuubila khuli, khuli mu buambaani ne Wele:

⁶Yesi yesi oloma ali amenyile mu buambaani ne Wele akhoyela amenye bulayi bwene nga Kristo ne amenyanga.

⁷Basaale base bakoosi, lilaka nilio ndikho muandikila lino se lili liya tawe, lili likhale, nilio mwaba nalio khukhwama mu khurakikha. Lilaka lino lili elomo niyo mwaulila khale.

⁸Ne kakhaba kario, ndikho nono muandikila enywe lilaka liya, sikila bung'ali bwalio bubonekhela mu Kristo lundi akhaba mwinywe mwesi. Sikila sisiilima silikho sibira, ne buwaanga bwa ng'ali bwakhosiisie khale.

⁹Yesi yesi oloma ali amenyanga mu buwaanga, ne khane aabiila wandaaye, asili busa mu siilima khukhwola esaa yino.

¹⁰Yesi yesi owasiima wandaaye aba amenyile mu buwaanga, mala sisiindu se siliio mu niye sinyala siakila omundu okundi akhola bubwoni tawe.

¹¹Ne yesi yesi obiila wandaaye ali mu siilima, asikeendamo; mala se amanyile niio alikho acha tawe, sikila sisiilima siamubofuusie.

¹²Baana base, ndikho muandikila enywe, sikila bubwoni bwenywe bwabeelwa khulwa Kristo.

¹³Ba paapa, ndikho muandikila enywe, sikila mu mumanyile oyo obechangao khukhwama mu lirakikha. Baele, ndikho muandikila enywe sikila mwaula Omumayaanu chana.

¹⁴Baana base, ndikho muandikila sikila enywe mumanyile Paapa. Ba paapa, ndikho muandikila enywe sikila mumanyile oyo owabao khukhwama mu lirakikha. Baele, ndikho muandikila enywe, sikila muli ne kamaani, elomo eya Wele emenyanga mwinywe mala mwaula Omumayaanu chana oyo.

¹⁵Mukhasiima sibala namwe bibiindu bie sibala tawe, omundu yesi yesi osiima sibala aba se aasiima Paapa tawe.

¹⁶Sikila bioosi bili mu sibala, liliekoomba lie kumubili, liliekoomba lie chimoni, ne sileka sie khukhwiboneselia khu biindu bie mu bulamu buno, bioosi bino se biaama khu Paapa tawe, bili bie sibala.

¹⁷Ne sibala ne bibiindu bioosi bilimo nibio babaandu bekoomba bino bilikho bibira, ne oyo okholanga lilienya lia Wele amenya mindali.

¹⁸Baana base, yino eli esaa emaliilisi! Enywe mwaboolelwa muli Omusiku owa Kristo alikho echa, ne luno basiku ba Kristo bakali bechile khale, khwako khwamanyile khuli esaa yino eli emaliilisi.

¹⁹Babaandu bano baama mwifwe, ne se baba babefwe tawe, sikila baba babefwe, andi bachiililila nafwe. Ne kakhali bakhururamo nio limanyikhe abuwaanga lili boosi se bali babefwe tawe.

²⁰Ne kakhali enywe mwaakhwa lubakho ne Omutakatifu Omwene khwako enywe mwesi mumanyile bung'ali.

²¹Nono ese ndikho muandikila enywe, ne se kali bali sikila se mumanyile bung'ali tawe, ne kakhali sikila mu bumanyile, mala mumanyile lundi muli bubeeyi se bwamanga mu bung'ali tawe.

²²Nono, naanu oli omubeeyi? Ali omundu yesi yesi olomanga ali, Yesu se ali Kristo tawe. Omundu nga oyo ali Omusiku owa Kristo, owikaana Paapa no Mwana.

²³Sikila yesi yesi owikaana Omwana aba ekaana ne Paapa yesi, ne yesi yesi ofukiilila Omwana ali ne Paapa yesi.

²⁴Nono, khu niko mwaulila khukhwama mu lirakikha karame mwinywe. Burume nibwo mwaulila khukhwama mu lirakikha ne burama mwinywe, aba nono mwesi mularama mu Mwana ne mu Paapa.

²⁵Ne lino nilio Kristo omwene akhusuubisia khu khuelesia efwe; bulamu bwa mindali.

²⁶Ndikho mbandika kano khwinywe khuloondekhana ne nabo balakhakanga khumubea enywe.

²⁷Ne kakhali enywe, Kristo amuelesia luubakho lwa Roho wewe, nga Roho yuno ne asiili mwinywe se mwenyekha omundu okundi khumwekisia tawe. Sikila Roho wewe amwekisianga buli siindu, mala niko ekisianga kali kang'ali, se buli bubeeyi tawe. Fukiilila niko Roho ekisia, nio murame mu bulala ne Kristo.

²⁸Nono, baana base, khemurame mu niye, nio nga ne aakhabonekhe efwe khwole khuba ne bunyindaafu, nio khukhekisa khu niye mu liicha liewe sikila chisoni tawe.

²⁹Mumanyile muli Kristo ali omuluungi, nono, khukhwola lundi mumanye muli buli mundu okholanga kaali kamaluungi ali Omwana owa Wele.