Read lubukusu 1 Yn. 3 Bible Online

1 Yn. 3 - lubukusu bible

1 Yn. 3

¹ Lola nga Paapa ne akhusiima efwe lukali! Busiime bwewe buli bukali po, bwakila efwe khulaangwa babaana ba Wele, mala ng'ali khuli khurio. Sibala se sikhumanyile efwe tawe sikila se simanyile Wele tawe.

²Basaale base bakoosi, luno khuli babaana ba Wele, ne kasiili khumanyikha abuwaanga nga khukhabe. Ne kakhali khumanyile khuli nga Kristo akhabonekhe khukhabe nga niye sikila khukhamubone nga niye ne ali.

³Buli mundu oli ne lilieyikina lino mu Kristo, eliindanga aba omukwalaafu bulayi bwene nga Kristo ne ali omukwalaafu.

⁴Yesi yesi okhola bubwoni, aba afunake lilaka lia Wele, sikila bubwoni buli khufunaka lilaka.

⁵ Mumanyile muli Kristo aabonekha nio arusieo bubwoni, ne bubwoni se bulikho mu niye tawe.

⁶Nono omundu yesi yesi omenyanga mu buambaani ne Kristo se abelelela khukhola bubwoni tawe, ne yesi yesi obelelela khukhola bubwoni aba se amubonakho namwe amumanya tawe.

⁷Baana base, mukhalekha omundu yesi yesi amubea tawe! Yesi yesi okhola kaali kamaluungi ali omuluungi bulayi bwene nga Kristo ne ali omuluungi.

⁸Omundu yesi yesi obelelela khukhola bubwoni ali owa Sietani, sikila Sietani akholile bubwoni khukhwama mu lirakikha liewe. Sino nisio sifuno sisiakila Omwana owa Wele abonekha, nio onakake kimilimo kia Sietani.

⁹Omundu yesi yesi oli Omwana owa Wele, se abelelela khukhola bubwoni tawe, sikila liiba lia Wele liliene limulimo. Ne sikila Wele ali Raraawe, se anyala abelelela khukhola bubwoni tawe.

¹⁰Buno buli bubwabukhani bumanyisia akari we babaana ba Wele, ne babaana ba Sietani: omundu yesi yesi okholanga kakhali kamaluungi tawe, namwe okhasiima wandaaye tawe, aba se ali Omwana owa Wele tawe.

¹¹ Burume nibwo mwaulila khukhwama mu khurakikha nibwo buno; khukhwola khusiimane fwabeene ne fwabeene.

¹² Khukhaba nga Kaini owaba owo Mumayaanu mala eera wandaaye Apili tawe. Siina sisiakila ne amwiira? Sikila bibiindu nibio omwene akholanga biaba bimayaanu, ne bikholwa bia wandaaye biaba biluungi.

¹³Nono bawandaayase, kaaba bali babaandu be sibala ne bamubiila, mukhesiindukha tawe.

¹⁴ Khumanyile khuli khweyama lifwa, khwecha mu bulamu. Khulimanyile khurio sikila khwasiima bawandaayefwe. Yesi yesi okhasiima tawe, asiili aasi we bunyali bwe lifwa.

¹⁵Yesi yesi obiila wandaaye ali omwiiri, ne enywe mumanyile muli se aliio omwiiri yesi yesi ooli ne bulamu bwa mindali mu Kristo tawe.

¹⁶Efwe khumanya nga busiime mu ngila yino; Kristo aana bulamu bwewe sikila efwe. Nono, akhaba efwe khukhoyela khwaana bulamu bwefwe sikila bawandaayefwe!

¹⁷Omundu aaba ne ali omuiinda mala abone wandaaye ataamba, mala alekhe khumuelesiakho siindu tawe, omuiinda oyo anyala aloma ariena ali, asiima Wele?

¹⁸Baana base, busiime bwefwe bukhaba bwe munwa busa tawe; khukhwola bube busiime bwa ng'ali bubweyokesia bubwene mu bikholwa.

¹⁹Ne efwe khwaaba be bung'ali, khulemanyila khu lino, mala likile khube ne bunyindaafu ebweeni wa Wele.

²⁰Kaaba bali kamebaasio kefwe ke mu miooyo kakhukhalakila, khumanyile khuli Wele ali omukali khukhila kamebaasio ke mu miooyo kiefwe mala lundi amanyile buli siindu.

²¹Khwako, basaale base bakoosi, kaaba bali kamebaasio ke mu miooyo kiefwe se kakhukhalakila tawe, aba khuli ne bunyindaafu ebweeni wa Wele.

²²Efwe khunyoola siosi siosi nisio khusaba khukhwama khu niye, sikila khwaria kamalaka kewe, mala khukholanga bibiindu bimusiimisia niye.

²³ Ne lino nilio lilaka liewe; khukhoyeele khusuubile mwisina lio Mwana wewe Yesu Kristo, mala khusiimane fwabeene ne fwabeene bulayi bwene nga ne akhulakiilisia.

²⁴Omundu yesi yesi oria kamalaka ka Wele amenya mu buambaani ne Wele mala Wele yesi amenya mu buambaani ne naye. Ne sikila Roho niye Wele aakhuelesia efwe, khumanyile khuli Wele amenyile mu buambaani ne nafwe.