Read lubukusu 1 Yn. 4 Bible Online

1 Yn. 4 - lubukusu bible

1 Yn. 4

¹Basaale base bakoosi, mukhasuubila boosi baloma bali, bali ne Roho tawe, ne kakhali bakhake nio mumanye roho niye bali naye ne aama khu Wele. Sikila bang'oosi be bubeeyi bakali bachile buli abuundu.

²Ne Roho ne ali owa Wele, munyala mwamanya mu ngila yino: Omundu yesi yesi ofukiilila ali Yesu Kristo echa nga omundu, ali ne Roho owaama khu Wele.

³Ne buli roho okhafukiilila Kristo tawe, se ali roho khukhwama khu Wele tawe. Ali roho ooyingania Kristo niye mwaulila bali alikho eecha, mala luno ali khale mu sibala.

⁴Ne enywe baana base, muli ba Wele, mala mwaula bang'oosi be bubeeyi abo sikila ooli mwinywe ali omukali khukhila oyo ooli mu sibala.

⁵Bang'oosi be bubeeyi abo balomaloma kamakhuwa ke sibala, mala sibala sibarekeeresia nibo sikila bali be sibala.

⁶Ne efwe khuli ba Wele. Omundu yesi yesi omanyile Wele akhurekeeresia efwe; yesi yesi okhali owa Wele tawe, se akhurekeeresia efwe tawe. Nono lino nilio likhola khwabukhasia Roho owe bung'ali ne roho owe bubeeyi.

⁷Basaale bakoosi, kha khusiimane sikila busiime bwaama khu Wele. Yesi yesi osiima ali Omwana owa Wele lundi amanyile Wele.

⁸Yesi yesi okhasiima tawe, se amanyile Wele tawe, sikila Wele ali busiime.

⁹Ne Wele eekesia busiime bwewe khwifwe, khulwe khuruma Omwana wewe omuteelwa mu sibala nio efwe khwole khuba ne bulamu khubirira mu niye.

¹⁰Busiime nibwo buno: se kali bali efwe khwasiima Wele tawe, ne kakhali niye akhusiima efwe mala aaruma Omwana wewe khuba engila niyo efwe khwekanilamo bubwoni bwefwe.

¹¹Bakoosi, kaaba bali Wele akhusiima efwe ari, nono fwesi khukhoya khusiimane.

¹² Se aliio omundu owabona Wele tawe, ne khwaaba ne khusiimana, aba Wele amenyile mwifwe, ne lundi busiime bwewe buli bubwichufu mwifwe.

¹³Sikila kano khuli nasuubi khuli khumenyile mu niye, ne naye amenyile mwifwe, sikila akhuelesia Roho wewe.

¹⁴Efwe khwabona mala khuboolela babaandi khuli Paapa aruma Omwana wewe khuba Omuonia we sibala.

¹⁵Omundu yesi yesi aaba nalomanga ali Yesu ali Omwana owa Wele, Wele amenyile mu niye ne naye amenyile mu Wele.

¹⁶Khwako efwe khumanyile lundi khusuubila busiime nibwo Wele ali nabwo khwifwe. Wele ali busiime, ne omundu yesi yesi omenya mu busiime amenyanga mu Wele ne Wele amenyanga mu niye.

¹⁷Busiime bukholwa khuba bubwichufu mwifwe nio khwole khuba ne bunyindaafu khu Ndaalo eye Likhalakilwa; mala khuliba ne bunyindaafu sikila limenya liefwe mu sibala sino lili bulayi bweene nga lia Kristo.

¹⁸Mu busiime, buuri mbamo; ne busiime bubwichufu burusiangao buuri bwoosi. Khwako, busiime bukhechusibwa mu mundu oli omuri tawe, sikila buuri buli khulwe siiukuumo.

¹⁹Khusiima sikila Wele anyoa akhusiima efwe.

²⁰Omundu yesi yesi aaba nalomanga ali asiima Wele, mala abiila wandaaye, ali omubeeyi. Sikila nakhasiima wandaaye niye abonanga tawe, se anyala asiima Wele niye akhabonakho tawe.

²¹Lilaka nilio Kristo akhuelesia efwe lili lino: Omundu yesi yesi owasiima Wele khukhwola asiime wandaaye yesi.