Read lubukusu 1 Yn. 5 Bible Online

1 Yn. 5 - lubukusu bible

1 Yn. 5

¹Omundu yesi yesi osuubila ali Yesu ali Kristo, aba ali Omwana owa Wele, ne yesi yesi osiima Paapa asiimanga ne Omwana wewe yesi.

²Lino nilio khumanyilakho ne khwasiima babaana ba Wele, khuli khusiima Wele ne khuria kamalaka kewe.

³ Sikila busiime bwefwe khu Wele nibwo buno, efwe khurie kamalaka kewe. Ne kamalaka kewe se kali kamaandalafu khwifwe tawe,

⁴sikila buli Omwana owa Wele anyala khukhila ke sibala. Ne ngila eye khukhila ke sibala eli lisuubila liefwe.

⁵Naanu onyala khukhila ke sibala? Ali omundu osuubila ali Yesu ali Omwana owa Wele.

⁶Yesu Kristo niye yeng'ene owecha ne kameechi ke libatiisia liewe ne kamafuki ke lifwa liewe. Se echa ne kameechi kong'ene tawe, echa nabio bioombi, kameechi ne kamafuki. Ne Roho omwene aboola ali kano kali ng'ali, sikila Roho ali bung'ali.

⁷Baloli baliio bataru:

⁸Roho, kameechi ne kamafuki; mala bioosi bitaru biboola kamafwaanane.

⁹Efwe khusuubilanga buloli bwe babaandu, ne kakhali buloli bwa Wele buli ne kamaani lukali, mala niye aanile buloli buno khu Mwana wewe.

¹⁰ Khwako omundu yesi yesi osuubila mu Mwana owa Wele ali ne buloli buno mu mwoyo kwewe, ne omundu yesi yesi okhasuubila Wele tawe, akhola Wele khuba omubeeyi, sikila se asuubila niko Wele aaloma khu Mwana wewe tawe.

¹¹Buloli nibwo buno: Wele akhuelesia efwe bulamu bwa mindali, mala bulamu buno bwakukha mu Mwana wewe.

¹²Omundu yesi yesi oli no Mwana ali ne bulamu buno, yesi yesi okhali no Mwana owa Wele se ali ne bulamu tawe.

¹³Ese ndikho mbandika kano khwinywe mu mwasuubila mu Mwana owa Wele nio mwole khumanya muli, muli ne bulamu bwa mindali.

¹⁴Khuli ne bunyindaafu ebweeni wa Wele, sikila khuli nang'ali khuli akhuulilanga ne khumusaba sisiindu siosi siosi khuloondekhana ne lilienya liewe.

¹⁵Kaaba bali khumanyile khuli mu koosi niko khumusabanga akhuulilanga, nono aba khumanya khuli koosi niko khumusabile, khulanyoola.

¹⁶Kaaba bali obona wandaayo ne akhola bubwoni bukhamuyila mu lifwa tawe, okhoyela wasaba Wele, olamuelesia bulamu. Lino lili khwaabo nibo bubwoni bwabwe bukhareeranga lifwa tawe. Ne bubwoni buliio bureera lifwa, ne ese se ndikho mboola ndi mukhoyeele musabe Wele khulwe bubwenobwo tawe.

¹⁷Buli sikholwa sibi siosi siosi buli bubwoni, ne bubwoni buliio bukhayila omundu mu lifwa tawe.

¹⁸Efwe khumanyile khuli se aliio omwana owa Wele obelelelanga khukhola bubwoni tawe, sikila Yesu Omwana owa Wele amuliindanga, nio Omumayaanu alekhe khumutiilakho tawe.

¹⁹Khumanyile khuli efwe khuli ba Wele akhaba sibala sioosi ne sili aasi we bubwami bwo Mumayaanu.

²⁰Khumanyile khuli Omwana owa Wele echa mala akhuelesia efwe limanya, nio khumanye Wele wa ng'ali. Khumenyile mu buambaani ne Wele wa ng'ali ne mu buambaani no Mwana wewe Yesu Kristo. Yuno ali Wele wa ng'ali, ne buno buli bulamu bwa mindali.

²¹Baana base, yeliinda mwabene khukhwama khu wele be bubeeyi!