Read lubukusu Bakh. 1 Bible Online

Bakh. 1 - lubukusu bible

Bakh. 1

¹Enyuma we lifwa lia Yoshua, Baisiraeli bareeba Wele Omunyali Owa Bioosi bali, “Kholo siina khu kholo chefwe elaba eye khunyoa khucha khukhwibwaakala Bakanaani?”

²Wele Omunyali Owa Bioosi akobosia ali, “Ekholo eya Yuda niyo elanyoa eche. Ndikho mbaa sibaba esio sibe mu bunyali bwabwe.”

³Babaandu ba Yuda baboolela babaandu ba Simioni bali, “Yiicha khuche ne nanywe mu maloba niko bakhueele efwe, mala mukhuyeete khupane ne Bakanaani. Ne fwesi khukhache khumuyeete khukhupanila kamaloba keenywe.” Nio chikholo cha Simioni

⁴ne Yuda chacha mwiie alala. Wele Omunyali Owa Bioosi abaa bukhili khu Bakanaani ne Baperisi mala baula babaandu chielefu likhumi a Beseki.

⁵Ebeseki banyoolayo Atonibeseki omwami we lukoba mala bapana ne naye. Ne abwenao baulila elala Bakanaani ne Baperisi.

⁶Atonibeseki elukha, ne bamutimania, bamuaamba, mala bamukhala chinjala chikhuumwa che khu makhono ne khu bikele.

⁷Atonibeseki aloma ali, “Babaami kamakhumi saba babakhalwa chinjala chikhuumwa che khu makhono ne chinjala chikhuumwa che khu bikele bangalaanga bitonyi bie biakhulia bibiakwichanga asi asialwa siase. Luno, Wele akholeele ese niko nabakholela.” Abukulwa ayilwa e Yerusalemu mala afwilayo.

⁸Babaandu ba Yuda bebwaakala lukoba lwa Yerusalemu mala balubukula. Beera babaandu balwo ne khulwosia.

⁹Enyuma we khukhwosia lukoba luno, bacha khu khuupana ne Bakanaani babamenyanga mu sibala sie bikulu, mu maayo mwe bikulu ebunafubo owa Kanaani.

¹⁰Bacha bengilila Bakanaani babamenyanga mu lukoba lwa Heburoni lulwalaangwa luli, Kiriati-Ariba. Ebweeneyo baula chikholo cha Sheshai, Ahimani, ne Talimai.

¹¹Khukhwama ao babaandu ba Yuda bacha khukhwibwaakala lukoba lwa Tebiri. Mu khunyoa lukoba luno lwalaangwanga luli, Kiriati-Seferi.

¹²Ne mulala khu nibo owalaangwanga bali Kalebu aloma ali, “Omundu yesi yesi olebwaakala Kiriati-Seferi mala alubukule, ndamuelesia omukhaana wase Akisa abe omukhasi wewe.”

¹³Otinieli okhwa Kenasi, (Kenasi aba wandaaye owa Kalebu) abukula lukoba olwo. Nio Kalebu aamuelesia omukhaana wewe Akisa aaba omukhasi wewe.

¹⁴Khu nyanga eye siselelo Otinieli aboolela[1] omukhasi wewe Akisa areebe raraawe amue kumukuunda. Akisa ekha khukhwama khu punda, mala raraawe Kalebu amureeba nisio enya.

¹⁵Akisa amukobosia ali, “Nenya chisebele che kameechi sikila wamba kamaloba kali khusiangalaamwe sie ebunafubo owa Kanaani.” Nio Kalebu aaelesia Akisa chisebele che ngaaki nende che mwaalo.

¹⁶Be lisaaye lia Hobabu Omukenayi, paapa owo mukhasi owa Musa, bachiililila ne lukeendo ne babaandu ba Yuda khukhwama e Yeriko, lukoba lwe kamakheendu, boola mu sichiimi embi ne Arati mu Yuda. Ebweeneyo bamenya mu Baamaleki[2]

¹⁷Bayuda bacha alala ne babaandu ba Simioni mala alala baula Bakanaani babamenyanga mu lukoba lwa sefati. Balwonakila elala, nio balutiuukha bali Horima[3]

¹⁸Yuda aamba[4] akhaba Kasa alala ne kamaloba kalwo, Ashikeloni ne kamaloba kalwo ne Ekironi ne kamaloba kalwo.

¹⁹Wele Omunyali Owa Bioosi ayeeta babaandu Bayuda mala baamba kamaloba ke mu sikulu. Ne se banyala khuonamo bamenywa be mu maayo tawe, sikila baba ne kamakaari ke liie ke bichuuma.

²⁰ Heburoni lwaebwa khu kholo eya Kalebu nga Musa ne aloma. Nio Kalebu aoona chikholo chitaru che Baanaki.

²¹ Ne kakhali babaandu be kholo eya Benjamini se baoona Bayebusi ba baamenya mu Yerusalemu baruramo tawe. Mala Bayebusi bachiililila khumenyamo ne Babenjamini khukhwama endaalo eyo khukhwola luno.

²²Enju eya Yosefu (Chikholo cha Efuraimu ne Manase) yosi yacha khu khuupana ne Beteli mala Wele Omunyali Owa Bioosi abayeeta.

²³Nio enju eya Yosefu yaruma bayooti khupelelesia Beteli (Lisina lie lukoba luno mu khunyoa liaba bali Lusi.)

²⁴Bayooti abo babona omundu alikho arura mu lukoba omwo ne acha, mala bamuboolela bali, “Khwekesie nga ne khunyala khwengila mu lukoba muno, mala efwe khulakhukholela kamalayi.”

²⁵Nio abekesia, mala be owa Efuraimu ne Manase beera buli mundu mu lukoba omwo, ne kakhali balekha omundu yuno nende be enju yewe.

²⁶Enyuma wa kano omundu niye bayooti balekha acha mu sibala sie Bahiti mala ombakhayo lukoba nilwo atiuukha ali Lusi, nilio lisiili busa lisina lialwo khukhwola luno.

²⁷ Ekholo eya Manase se yaoona babaandu babamenyanga mu ngoba cha Beti-sheani, Taanachi, Tori, Ibuleamu, Mekido, nende be chingoba chili siimbi baruramo tawe. Bakanaani bachiililila khumenyamo.

²⁸Nga Baisiraeli ne banyoola kamaani bayingiilila Bakanaani babakholeleenge kimilimo, ne kakhaba kario se babaoona boosi baruramo tawe.

²⁹ Ekholo eya Efuraimu se yaoona Bakanaani babamenyanga mu lukoba lwa Keseri baruramo tawe, nio Bakanaani bachiililila khumenyayo ne nabo.

³⁰Ekholo eya Sebuluni se yaoona babaandu babamenyanga mungoba cha Kitironi ne Nahaloli baruramo tawe. Nio Bakanaani bachiililila khumenyayo ne nabo, mala ekholo eya Sebuluni babayiingiilila khu bakholela kimilimo.

³¹Ekholo eya Asieri se yaoona babaandu ba bamenyanga mu ngoba cha Ako, Sidoni, Ahilabu, Akisibu, Heliba, Afeki ne Rehobu, baruramo tawe.

³²Babaandu ba Asheri bamenya ne Bakanaani ba baaba siimbi ne nabo sikila se babaoona baruramo tawe.

³³Ekholo eya Nafutali se yaoona bamenywa be mu ngoba cha Beti-shemesi ne Betanati khururamo tawe. Babaandu ba Nafutali bamenya ne Bakanaani ba baaba siimbi ne nabo, ne kakhali babayiingiilila babakholele kimilimo.

³⁴Baamori baminakilisia babaandu be ekholo eya Dani bakobole mu maloba ke bikulu sikila se babafukiilila bekha mu maayo tawe.

³⁵Ne Baamori bachiililila khumenya e Aiyaloni, Siaalibimu ne a sikulu Heresi. Ne chikholo cha Efuraimu ne Manase babamiia mala babayiingiilila babakholele kimilimo.

³⁶Lulwakha lwe Baamori[5] lwarakikhira khu siniina sia Akirabimu khukhwamila engaaki owa Sela.