Read lubukusu Bakh. 10 Bible Online

Bakh. 10 - lubukusu bible

Bakh. 10

¹Enyuma we lifwa lia Abimeleki, Dodo, okhwa Pua, omwichukhulu owa Dodo, echa khuonia Isiraeli. Dola ama mu kholo eya Isakari, ne amenyanga e Shamiri mu sibala sie lukulu sia Efuraimu.

²Aba omwimeelesi owa Isiraeli khulwe kimiiko kamakhumi kabili ne kitaru. Nio afwa mala asiikhwa e Shamiri.

³Enyuma we lifwa lia Dola, Yairi khukhwama e Kileati aba omwimeelesi owa Isiraeli khulwe kimiiko kamakhumi kabili na kibili.

⁴Aaba ne basoleeli bewe kamakhumi kataru ba bakeendelanga khu punda kamakhumi kataru. Babaana bano baba ne chingoba kamakhumi kataru mu sibala sia Kileati. Chingoba echo chisilaangwa bali birekere bia Yairi khukhwola luno.

⁵Yairi afwa mala asiikhwa e Kamoni.

⁶Lundi Baisiraeli bakholela Wele Omunyali Owa Bioosi kamamayaanu khulwe khukhwesaaya Babaali ne Baasitoreti, bawele be Basiria, Basidoni, Bamoabu, Baamoni ne Bafilisiti. Balekha Wele Omunyali Owa Bioosi mala khusaaya niye tawe.

⁷Nio Wele Omunyali Owa Bioosi aambwa lirima ne Baisiraeli mala alekha Bafilisiti ne Baamoni babaula.

⁸Khulwe kimiiko ekhumi na munaane chikholo echo chapia Baisiraeli boosi sibi babamenyanga mu sibala sie Baamoni ebukwe we luluuchi lwa Yoritani mu Kileati.

⁹Baamoni bambukha Yoritani khu khuupana ne chikholo cha Yuda, Benjamini ne Efuraimu, mala Baisiraeli baba mu munaanio kumukali.

¹⁰Nio Baisiraeli balilila Wele Omunyali Owa Bioosi ne baloma bali, “Khwakholile bubwoni sikila khwakhulekha ewe Wele wefwe mala khwakholeele Babaali.”

¹¹Ne Wele Omunyali Owa Bioosi akobosia babaandu ba Isiraeli ali, “Nga Bamisiri, Baamoni, Bafilisiti,

¹²Basidoni, Baamaleki ne Bamoani bamunania chindaalo chichabira mala enywe mwandilila, se namuonia khukhwama khu nibo?

¹³Nono luno mwandekhile ne khukholela bawele babaandi. Nono se ndikho nja khumuonia enywe lundi tawe.

¹⁴Cha mulilile bawele nibo mwaroboore. Lekha nibo bamusikule enywe mu biise bie butinyu bwenywe.”

¹⁵Babaandu ba Isiraeli baboolela Wele Omunyali Owa Bioosi bali, “Efwe khwakholile bubwoni. Khola siosi siosi nisio wenya. Ne kakhali, nosiima endaalo yino khuonie.”

¹⁶Nio barusiao bawele be chikholo chichiindi nibo baba nabo mala bakholela Wele Omunyali Owa Bioosi lundi. Nio Wele Omunyali Owa Bioosi akholela Isiraeli siisa nga ne ababona mu butinyu.

¹⁷Nio banamae ba Amoni berekekha khucha mwiie, mala bebuusia mu Kileati. Babaandu ba Isiraeli bebuusia alala mala baapa ekambi e Misipa.

¹⁸Ebweeneyo babemeelesi ba Isiraeli bareebana ne baloma bali, “Naanu olanyoa khu khuupana ne Baamoni? Omundu olanyoa, akhabe omwimeelesi owe babaandu boosi ba baamenya mu Kileati.”