Read lubukusu Bakh. 11 Bible Online

Bakh. 11 - lubukusu bible

Bakh. 11

¹Nio Yefuta aba omunamae omunyindaafu khukhwama e Kileati, ne kakhali aba omwana owo mukhasi omueeyani. Raraawe aba bali Kileati.

²Omukhasi niye Kileati akhwa aba ne babaana babaandi basoleeli. Nga babaana abo ne bakhula, baoona Yefuta arura mungo. Baloma bali, “Ewe se olinyoolakho sisiindu siosi siosi khukhwama khu paapa wefwe tawe, sikila oli omwana owo mukhasi okundi.”

³Yefuta elukha bawandaaye mala acha amenya mu sibala sia Tobu. Ebweeneyo anyoola babaandu be sipoli mala arakikha khukeenda ne nabo ne bakhola bunuuli.

⁴Enyuma we siise Baamoni bacha bapana liie ne Baisiraeli.

⁵Nga liie ne liabao basaakhulu ba Kileati bacha bakobosia Yefuta khukhwama mu maloba ka Tobu.

⁶Bamulomela bali, “Yiicha obe komanda wefwe, nio khupane ne Baamoni.”

⁷Ne kakhali Yefuta abakobosia ali, “Enywe mwambiila ese lukali, mwamboona narura munju eya paapa. Siina sikila ne mwicha luno khwise ne muli mu butinyu?”

⁸Baboolela Yefuta bali, “Khwicha khwiwe luno sikila khwenya ewe oambaane ne nafwe, khuche mala khupane ne Baamoni mala wimeelele babaandu ba Kileati boosi.”

⁹Yefuta aboolela basaakhulu ali, “Mwaaba ne mulikho mungobosia engo khu khuupana ne Baamoni mala Wele Omunyali Owa Bioosi akhola khwaula ndaba omwami khwinywe”

¹⁰Bakobosia bali, “Khwafukiilile ne Wele Omunyali Owa Bioosi niye omuloli wefwe.”

¹¹Nio Yefuta acha ne babemeelesi ba Kileati mala babaandu bamukhola aba omwami lundi komanda. Yefuta elamo kamakhuwa ke endakaano koosi ebweeni wa Wele Omunyali Owa Bioosi, e Misipa.

¹²Nio Yefuta aruma barumwa khu mwami owa Amoni ne aloma ali, “Ese nakhukholela siina, sikila ne wibwaakala sibala siefwe?”

¹³Omwami owa Amoni aakobosia barumwa ba Yefuta ali, “Khulikho khupana sikila Baisiraeli nga ne bama e Misiri baamba kamaloba kase khukhwama khu Luuchi lwa Arinoni khukhwola khu Luuchi lwa Yaboki ne Luluuchi lwa Yoritani. Nono khukoboselie kamaloba kefwe mu muleembe.”

¹⁴Yefuta aruma lundi barumwa khu mwami owa Amoni

¹⁵ne aloma ali, “Isiraeli se yabukula kamaloba ka Moabu namwe ka Amoni tawe.

¹⁶Ne kakhali nga Baisiraeli ne barura Misiri babirira mu sichiimi boola khu Nyanja eya Shamu mala boola Kadeshi.

¹⁷ Nono Isiraeli baruma barumwa khu mwami owa Edomu khumusaba kumunwa babire mu sibala siewe. Ne omwami owa Edomu se abafukiilila tawe. Lundi bareeba Omwami owa Moabu ne yesi se abafukiilila babire mu maloba kewe tawe. Nio Baisiraeli bamenya Kadeshi.

¹⁸ Nio bacha babirira mu sichiimi ne baloonda khu lwakha lwe sibala sia Edomu ne sie Moabu. Baisiraeli bacha bola ebukwe we sibala sia Moabu mala baapa ekambi lubeka lwe Luluuchi lwa Arinoni. Ne kakhali se bengila mu sibala sia Moabu tawe, sikila luluuchi lwa Arinoni nilwo lulwaba lulwakha lwe sibala sia Moabu.

¹⁹ Nio Baisiraeli baruma barumwa khu Sihoni, omwami we Baamori owe lukoba lwa Heshiboni, mala bamusaba babirire mu sibala siewe bache mu siabwe.

²⁰Ne kakhali Sihoni se afukiilila Baisiraeli khubirira mu sibala siewe tawe. Nio Sihoni areera banamae bewe boosi alala, mala bebuusiana e Yahasi, mala bapana ne Isiraeli.

²¹Ne kakhali Wele Omunyali Owa Bioosi, Wele owa Isiraeli akhola Baisiraeli bakhila Sihoni ne banamae bewe. Nio kamaloba koosi kakabechanga ke Baamori kaba ke Baisiraeli.

²²Nio Baisiraeli baamba kamaloba ke Baamori khukhwama khu luuchi lwa Arinoni ebunafubo khukhwola Yaboki ebunaswa ne khukhwama e bukwe we sichiimi khukhwola khu Yoritani mumbo.

²³Nono Wele Omunyali Owa Bioosi, Wele owa Isiraeli niye owatimania Baamori sikila babaandu bewe, Baisiraeli.

²⁴Nono enywe mulola muli munyala mwatimania Baisiraeli barura mu maloba kano? Enywe bukula nisio wele wenywe Chemoshi abaelesia. Efwe khulabukula nisio Wele Omunyali Owa Bioosi, Wele wefwe akhuelesie efwe.

²⁵ Wibaasia oli ewe oli omulayi khukhila Balaki okhwa Sipori, omwami owa Moabu? Aalomanakho namwe aapanakho ne babaandu ba Isiraeli ku?

²⁶Khulwe kimiiko chimia chitaru Baisiraeli bamenya Heshiboni ne Aroeri ne chingoba chichabotookhelela luluuchi lwa Arinoni choosi. Siina sikila ne mukhachibukula mwakobosia chingoba echo biise ebio bioosi?

²⁷Ese nono se nakhukholeelekho ewe kamamayaanu kosi kosi tawe. Ewe ne unjibwaakala aba olikho ukholela kamamayaanu. Wele akhoya aba omukhalaki luno akari we Baisiraeli ne Baamori.”

²⁸Ne kakhali omwami owa Amoni alekelesia burume khukhwama khu Yefuta.

²⁹Nio Roho owa Wele Omunyali Owa Bioosi echa khu Yefuta acha abira mu Kileati ne Manase mala akobola e Misipa eya Kileati ola Amoni.

³⁰Yefuta echuba khu Wele Omunyali Owa Bioosi ali, “Waaba ne ukhola naula Baamoni,

³¹khakhwoselie omundu yesi yesi nga siianwa, okhabe owe khunyoa khukhwama munju yase khukhwicha anjakanile, nga ne khabe ne ngobola ne khilile liie. Khaane omundu khwiwe nga embosio.”

³²Nio Yefuta ambukha akhupane ne Baamoni, mala Wele Omunyali Owa Bioosi amua bukhili.

³³Abapa khukhwamila Aroeri khukhwola khu lukoongo luli siimbi Miniti, chingoba kamakhumi kabili choosi khukhwola khu lukoba lwa Abeli-keramimu. Beera bakali. Nono Baamoni bakhilwa ne Baisiraeli.

³⁴Nga Yefuta akobola engo e Misipa, omukhaana wewe aba owe khunyoa khukhwicha khumwakaanila, aba alikho akhina ne khusakasia bichenje. Aba omwana wewe omuteelwa.

³⁵ Nga Yefuta ne amubona atabula chingubo chewe mu bubeeleli mala aloma ali, “Ee, mwana wase! Wakholile ese nabeele ne bubeeleli bukali sikila nechubile khu Wele Omunyali Owa Bioosi, ne se enyala nalekha khukhola ndio tawe!”

³⁶Omukhaana aamuboolela ali, “Waaba ne wechuubile khu Wele Omunyali Owa Bioosi khola nisio walomile oli okhakhole khwise, sikila Wele Omunyali Owa Bioosi akhukholile waruungisia bubi basiku bowo, Baamoni.”

³⁷Ne areeba raraawe ali, “Kholele sisiindu silala sino. Ndekhe mbe khulwe kimieesi kibili, nio enje ne basaale base ngenda keende mu bikulu mala ndile ne khubeelela khulwe nga ne ndi omukhaana we yabwana.”

³⁸Yefuta amulekha ache, khulwe kimieesi kibili. Niye ne basaale bewe baniina mu sikulu mala alila ne khubeelela sikila alikho acha khufwa ne asiili ne yabwana.

³⁹Enyuma we kimieesi kibili akobola khu raraawe akhola nisio aba ne echubile khu Wele Omunyali Owa Bioosi, mala afwa ne asiili ne yabwana. Khukhwamila ao kumwiima kwarakikha mu Isiraeli

⁴⁰bali bakhaana Baisiraeli bachichaanga buli mwiiko khulwe chindaalo chine khuliila sikila omukhaana owa Yefuta Omukileati.