Read lubukusu Bakh. 12 Bible Online

Bakh. 12 - lubukusu bible

Bakh. 12

¹Baefuraimu berekekha khukhapana liie, bambukha luluuchi lwa Yoritani boola e Safoni mala baboolela Yefuta bali, “Siina sisiakilile ewe ne otuuma lulwakha wiche upane ne Baamoni mala khukhulaanga efwe khwacha ne nawe tawe? Khulakhwosela munju!”

²Ne Yefuta abakobosia ali, “Ese ne babaandu base khwaba ne lilomana likali ne Baamoni. Namulaanga, mala se mweecha khukhunjeeta tawe.

³Nga ne nabona se mulikho mwicha khukhunjeeta tawe, neaana bulamu bwase mala natuuma lulwakha khucha khu khuupana ne nabo. Wele Omunyali Owa Bioosi amba bukhili. Ne sina sikila luno ne mwicha khu khuupana ne nase?”

⁴Nio Yefuta abuusia babaandu ba Kileati alala, bapana ne babaandu ba Efuraimu. Bakileati baula Baefuraimu. (Baefuraimu balaanga Bakileati bali, babelukhila mu Efuraimu ne Manase).

⁵Bakileati baamba kamafubukho ka Yoritani. Nga Omuefuraimu yesi yesi owaba ne alikho elukha, Bakileati bamureebanga bali, “Ewe oli Omuefuraimu?” Kaaba bali aloma ali, “Tawe”

⁶Bamuboolela alome ali, “Shiboleti” Ne naye aloma ali “Siboleti.” Sikila babaandu Baefuraimu se banyalanga khuloma likhuwa elio bulayi tawe. Nono liakila Bakileati ne babereera mu lifubukho lia Yoritani. Siise esio Baefuraimu chielefu kamakhumi kane ne chimia chibili beerwa.

⁷Yefuta emeelela Isiraeli khulwe kimiiko sita. Afwa mala asiikhwa mu lukoba lwe mungo[20] mwewe e Kileati.

⁸Enyuma we lifwa lia Yefuta, Ibusani owe Betelehemu emeelela Isiraeli.

⁹Aaba ne babaana be sisoleeli kamakhumi kataru nende be siikhaana kamakhumi kataru. Aakha bakhaana bewe khu baandu be enje bakhali be ekholo eyeewe tawe, lundi areera bakhaana kamakhumi kataru khukhwama enje we kholo yewe khu basoleeli bewe bakhwe babe bakhasi babwe. Ibusani emeelela Baisiraeli khulwe kimiiko saba.

¹⁰Afwa mala asiikhwa e Betelehemu.

¹¹Enyuma we lifwa lia Ibusani, Eloni khukhwama mu kholo eya Sebuluni emeelela Baisiraeli khulwe kimiiko likhumi.

¹²Nio afwa mala asiikhwa e Aiyaloni mu maloba ka Sebuluni.

¹³Enyuma we lifwa lia Eloni, Abutoni okhwa Hileli khukhwama Pirationi emeelela Baisiraeli.

¹⁴Aba ne basoleeli kamakhumi kane ne babechukhulu be sisoleeli kamakhumi kataru, babakeendelanga khu punda kamakhumi saba. Abutoni emeelela Baisiraeli khulwe kimiiko munaane.

¹⁵Nio Abutoni afwa mala asiikhwa e Pirationi mu maloba ka Efuraimu mu sibala sie lukulu lwe Baamaleki.